kontrolliere, diskutire, filetiere u….

Dr Fluchtwäg hei mir no einisch kontrolliert. Aber nid z Fuess, sondern mt äm Pickup. Ds Wätter isch hüt so unberächebar gsi u immer wieder nass.
Urs u ig hei die Ufgab überno.

Eigentlech hätt Urs u ig no gärn ä „rots“ Tanndli wöue umlah. O hie si mir bi däm nasse Wätter nid speziu motiviert gsi. Das Tanndli rennt üs ni dervo.

Zwar het ds Wätter immer wieder ä chli besseret u d Sunne isch chli cho füregügzlä. Wius eigentläch dusse warm isch gsi hei mir üsses Zvieri dusse uf dr Terrasse gwagt znä. Bim so diskutiere si plötzläch wieder Rägetropfe z gspüre gsi. Mir si eifach ganz a. d Wang ungers Vordach mit dä Stüeu u so heimer chönne wieder schnädere. Wos du aber starch het agfange Rägne hets üs doch wieder its Huus tribe.

Ds Nachtässe isch o scho gli nache gsi.
Brigitte u Urs hei ä ganze Lachs vo ihre Camperreis mitbracht. Dä het nachem Uftoue no müesse filetiert wärde. Isch cheibe guet glunge.
Mit äm Brätle isches chli schwierig worde.
Ufem Grill wärs eigentlech cheibe gäbig gsi.
Aber äbe, dä Räge. Haubiere hei mir die Lachssite leider müesse u so isch du das de super guet usecho.
Mit dä Grät u Abschnitte äs feins Fischsösseli gmacht u mit äm Dill vo üsem Chrütergärtli no verfinderet. Ärbsli/Rüebli u Ris het das Ässe abgrundet.

Nachem Ässe heimer no ä rundi Gjasset. Äs isch ganz knapp gsi bir Entscheidig. D Regle Stöck, Wys, Stich hei mir müesse awände.

U so isch dä verrägnet Tag verbi gange……..Read more