Von Fischen und Pannen

Nachdem üses Elektrosystem in San Pedro den Geist aufgeh hat (es bliebt wieterhin unklar, ob d Mus schuldig isch oder nid), simmer ohni Strom wietergfahre nach Antofagasta.
Eigentlich hend eus alli vo dere Stadt abgrate (sig dreckig und super gföhrlich), aber mer hend ghofft mer bechemed dötte üsi elektronik gflickt und drum alli guet gmeinte Ratschleg ignoriert.
Zum glück, will eus hed Antofagasta eilich ganz guet gfalle. Nid z letscht, will mer dötte d erschte Mal uf dere Reis s Meer gse hend.
Mer hend dött zwei Nächt ufeme Camping mit top Blick übers Meer (und de grusigschte WCs uf de ganze Reis, und da sell was heisse) verbrocht. Aber im Meer hemmer chönne go Bädele, und am abig hemmer Gfisched und de Marius hed sogar zietnöch en Minifisch gfange und wieder innegschmisse.
De Marius isch wieder id Berge, und ich han mich Schlau gmacht, was mer a eusem Solarsystem münd ersetze, und wo mer die Teili bechund. So nachem Motto, zerscht selber probiere, und erscht denn zum Profi🤣
Obwohl mer da Teil au becho hend, hemmer eus denn doch no entschlosse zum Profi z goh.. Aber leider keine gfunde wo grad Ziet gha het zum eus helfe. Drum simmer denn bitz ungeduldig gsi und ohni Strom wietergfahre richtig Süde.
S ziel isch Caldera, es Küschtestädtli mit tolle Stränd, womme cha Tauche, Surfe usw. wo mer no chli Strandferie wend mache.
Uf halbem Weg hemmer aghalte und eus en wietere tolle Wildcampingspot am Meer gönnt.
Mer sind sozege ellei am Beach gsi, nur eis anders Auto vom Jose, wo grad mit sim Sohn am Fische gsi isch (mit Taucherazug und Harpune). Si sind super herzig gsi, sind no mit eus cho pläuderle und hend eus ihre halbi Fang gschenkt (nid ganz, aber en grosse und en chline Fisch und zwei Pulpos). Zumal ich weder Fisch no Seefood gern ha, hed de Marius jetzt für en Wuche z ässe😅
Am nöchdchte Tag simmer denn zügig wieter, will mer ja no immer kei Elektrik hend zum de Fisch chüele. Theoretisch weremer in 2.5h in Caldera gsi, aber uf halbem Weg, mitte i de Wüeschti ohni Handysignal hed d EDC Warnlampe vom Janosch ufglüchted, und de Motor isch abgstorbe. Und was mer au versuecht hend, mer hend en nümme Abracht... Weder mit Jumpstarter no mit Aschiebe.
Zum Glück simmer nid allzu wiit weg gsi vonnere Raschtstett, wommer hend chönne frage ob si eus en Abschleppwage organisiered..
De isch denn 2h spöter au cho, und hed eus zrugg as Meer zumene Mech gschleppt, wo d Batterie wieder glade hed und chli Silikon i irget es Rohr gsprützt hed, und denn isch de Janosch wieder gloffe.... Was genau s Problem sig heder aber au nid gwüsst (wahrschinlich heiger Luft agsoge, aber er chöns nid prüfe willer di richtige Grät nid heig).
Nachdem er eus doppled so viel Geld abknöpft hed wie ursprünglich gseid das Abschleppe choschti, simmer denn aber mit em Janöschli wietergfahre und am Abig erschöpft in Caldera acho. Alles in Allem nid ganz unglücklich, das mer hie jetzt vorerscht mal es wiili werded blibe, und somit chli Ziet hend eus um eusi unterschidliche Baustelle z kümmere.Read more