Tschüss Boliviä und Hallo Chile

Noch üserä astrengende fahrt hemmer üs dennä ide Termas de Polques chli usgruebt. Da isch echt toll gsie, vorallem ide Nacht bevor de Mond ufgange isch und mer de doch en recht idrücklichi Sternehimmel het chönne beguätachte.
Ich bi dennä am nögschte Tag am 5:30 ufgstande und noh uf es witers Bergli ufe. Döttä bini nöd allai gsie, doh mer es jungs Hündli gfolgt isch. Er isch mer au nöd nur 10 min nohglofe, sondern für 4 Stund. Ha dennä ab und zue Wasser i irgendwelchi Müldeli gleehrt. Isch scho chli heiss gsie. Linda isch überraschendeewis au mol am 6i ufgstande. Sie het au wöllä de Sunneufgang gseh und noh viel wichtiger, sie het wöllä früäh afange baschtlä...
Noch dem ich vom wanderä zrug gsie bin (mit Hund) simmer dennä richtig Chile gfahre (ohni Hund). D Grenze isch recht guet gangä. Sie sind voll easy druf und mier entsprechend schnell drüber gsie. Linda het au döttä no freud cha, dassi ihres Leder immmer noh het.

Noch so 1 Stund noch de Grenze simmer denn noch San Pedro de Atacana cho, üse erschti Stopp. Mer hend dennä mol en Campingplatz ufgsuecht. Döttä het mer CHF 40 zahlt für 1 Nacht und de Janosch isch eifach uf emne Parkplatz gstande. Da isch en rechte Schock gsie, doh mer in Bolivia und Argentiniä kai Chance het meh also CHF 6 für en Camping d zahle. Und dötte isch de Camping au meh als en Parkplatz. Aber sind hald au zrug in Chile wo wiedr viel westlicher isch und nöd umsuscht d Schwiiz vo Südamerika gnennt wird. Mer sind dennä mol noch San Pedro innä und hend was wöllä trinke. Erschti Bar (komplett leer), sait nai nur wenn ihr au was ässed. Da isch vorallem komisch, doh mer kain Meter cha laufe i derä Stadt ohni dass die so en "chumm doch i diä Bar-Mensch" versuecht mit allne mittel iegendwo inäzbringe. Recht Astrengend.
Liecht verwirrt simmer dennä wiedr gange. Diä z weiti Bar seit genau s gliche. Jetzt bini noh meh verwirrt gsie. Ide dritte Bar hets dennä klapped.
De "chumm doch i diä Bar-Mensch" het gmaint ja da segggi kais Problem.
Das mit em kais Problem, het eifach gheisse mer bringed eu Falafel wo ihr nid bstellt hend zum Getränk und verechneds eu am schluss ohni z frage. Chumme bis jetzt nöd drus ob da ä Staatlichi Uflag isch odr was gnau. Aber wiäses mached isch chli Asi.
Aber susch het mer San Pedro super gfalle. Solang mer niä stoh bliebt und kai Augekontakt macht mit irgendwelche Lüt klappets ganz guet doh. Sobald mer diä Regle nöd ihalted wönds ein nötige 37 Toure z bueche odr susch was. Kai Sekunde chönns ein allai loh und personal space isch au öppis wos nöd kenned. Ab dem Punkt isch das San Pedro schüch für mi gstorbe gsie. Am nögschte Tag simmer dennä wiedr noch San Pedro innä zum 1 Tour z bueche, star gazing. Er het zwor versuecht üs 5 Toure z verkaufe aber het dennä ufgeh und üsi Wünsch akzeptiert. Nochdem mer d Tour buecht hend simmer zu de Laguna Cejar. Da isch so 30 min vo San Pedro über so e toli washboard Stross. Wo mer acho sind, hends ein nöd innäloh, dohs ab de 13:00 nur für Toure göffnet het. Da isch definitiv nöd ä Information wo mer am Igang vode Stross chönnti aschriebe. Da wär viel z viel verlangt.
Noch dem mer dennä en tolle wild camping spot gfunde hend (de isch würkli toll gsi, usnahmswiis mal kei Ironie) hemmer am Obig noh diä buechti Star gazing Tour gmacht. Diä isch ganz ok gsie aber jetzt für üs nöd de Wahnsinn doh mer scho einigi Sternehimmel gseh hend doh.
Am nögschte Tag hemmer noh s Valle de la luna agügslet mit em Janosch. Seb isch ganz toll gsie und i cha mit usnahmswiis nöd beklage. A doch mol da isch noh öppis. Bevor mer gange sind het diä einti üs noh wöllä e Fläsche Wässer verlaufe für CHF 3.50. Nur so zum verglich, für CHF 3.50 bechunsch doh in Chile im normalfall so e 20 L Trinkwasserkanister. S beschte isch jo noh gsie, dass de Verschluss scho broche gsie isch und da au noh Hahnewasser gsie wär. Aber versueche cha mers jo...
Am nögschte Tag simmer dennä noh mit zwei gmietätä Mountainbikes durd Devils Throat. Da isch au recht toll gsie. Abgseh dävo dass Lindas Vorderreife uf halbem Weg ufgeh het. Ich bin dennä allai witer und ha sie mit em Janosch abgholt. Und ganz nöd San Pedro like, hemmer sogar s Geld zrug becho fürs kaputte gmietete Bike. Ich bin nocher recht froh gsie, dassi das San Pedro ha chönnä verloh. Und ich empfehlä au allnä Reisende in Südamerika en grosse Boge drum z mache. Völlig übertüred und alli wönd der super nervig irgendwas verkaufe.
Jetzt simmer so wit gsie und sind endlich richtig Küschte gfahre. Uf em Weg hemmer dennä au no e chlini Salzlagune gmacht:). Döt hends üs au innäloh, sogar noch em 13:00:).En savoir plus