Di letschte Meter mit em Janosch

Langsam wirds Ziet zum sich mit em Heigoh usenand z setze und Abschied neh vo üsem inzwüsche heiss gliebte Janosch.
Aber zerscht hemmer nomal paar Täg ar Chilenische Küschte verbracht. Leider isches eifach konstant am Morge (und oft bis i Namitag inne) wüescht Wetter, was entsprechend nid zum am Morge ufem Platz verwiele iladed. Drum hemmer eusi Plän vo "hie blibemer jetzt mal 2 Nächt" au Konstant übere Hufe gworfe und immer wieter richtig Norde düset und in Vina del Mar und Valparaíso acho. Di Grosse Bränd wo hie tobt hend sind inzwüsche glöscht, aber de Alejandro, Bsitzer vom einzige Camping i de Region hed eus zeigt und verzellt wir knapps unter anderem au für sin Camping worde isch. Keini 50m vo döt wo mier jetzt camped, isch alles kahl und schwarz. De Alejandro isch super froh gsi das mier cho sind (mer sind ellei gsi ufem Camping trotz Hauptsaison), aber bi eus hed d Gsamtsituation au bitz s Gfühl vo Katastrophetourismus usglöst...
Mier persönlich isch da aber so lang wie breit gsi, will ich mal wieder de Chäfer verwütscht ha und mich daher sowieso nur s Bett und d WCs interessiert hed. De Marius isch sowohl Viña del Mar als au Valparaíso go aluege, und vo beidne Städt wenig überzügt gsi ("es isch eifach Santiago am Meer"). Drum hemmer denn entschlosse, eusi letschte Täg im Janosch lieber no andersch z nutze.

Wo mer mit em Janosch vor 3 Mt. vo Santiago richtig Argentinie losgfahre sind, hemmer ufem aller erschte Wildcampingspot mini Sandale vergesse (bzw. glaub ich ja das di streunende Hünd si i de Nacht klaut hend).
Mit eusem letschte Tag im Janosch simmer die Sandale no go sueche. 2 h Autofahrt zrugg richtig Argentinie, zum Plätzli wommer vor 3 Mt. übernachted hend.
D Sandale sind natürlich nümme dötte gsi, aber irgendwie hed sich die ganzi Reis mit dem Usflug ganz rund agfühlt🥰
Übernachtet hemmer denn aber ufeme hübbsche chline Camping 1h Nördlich vo Santiago, wommer eusi letschti Nacht i eusem Gliebte Janosch gschlafe hend.

Am nöchschte Tag simmer denn losgfahre zrugg richtig Santiago und hend de Janosch emmene Früeligsputz unterzoge. Fairerwiis musi zuegeh das de Marius s meischte gmacht hed, und ich (immerno mit mim Chäfer kämpfend) hauptsächlich im Schatte ghöckled bi und chli mit meh Lumpe Staub hin und her gschobe ha🤣
Nach 3.5h putze simmer denn zrugg zu Suzi Santiago (die wo eus bim Autochauf "gholfe" hend) eusi lääre Koffere go hole, und hend in Santiago euses Hotelzimmer bezoge, wo mer di letschti Wuche vo eusne Ferie verbringe werded.Read more