(stressige) Churzstopp in Miami

Nach fast 11h Flug hämmer än Zwüschestopp in Miami.
Zu eusere Überraschig hämmer bim icheckä erfahre, das mer in Miami s Gepäck müänd go hole und det nomal icheckä für dä wiiter Flug uf Panama City. Das hämmer au nur per Zuefall erfahre will dä Nico ufs Swiss App gluegt hät, dä Herr vom Check-in Schalter hät eus nüt gseit und bim bueche hämmer das au niergends gläse gha... Hetted mer das vorher gwüss, hetted mer wahrschindli anderscht buecht, will 1.5 Ufenthalt isch doch chli knapp mit nomal icheckä... Das töhnt jetzt alles sehr unorganusiert, vor allem nach däre ESTA-Gschicht, aber simmer eigentlich nöd 😅🙈
Tja, was sölls mir gönd eifach mal und lueged dänn.
Zum Glück simmer in Miami pünktlich glandet, händ aber ä Ewigkeit müässe astah bi dä Passkontrolle. Übrigens händs det nur blöd gluegt wonis ESTA-Formular here ghebt han, sorry gäll, aber offenbar isch das alles elektronische hinterleit... 🤷🏼‍♀️
Immerhin hät dä Nico es mega Lob becho vom Zöllner will er hüt dä ersti segi wo das mit dä Fingerabdrück so tadellos und so schnäll (und das als Bääärner 😜) here kriegt hegi.
Vo det simmer so schäll wie möglich an Check-in Schalter vo dä Copa, isch natürli nöd grad um dä Egge gsi aber immerhin guet beschilderet. Det acho, händs gmeint s Check-in segi scho "closed" und s Boarding segi scho am laufe. Bizeli "blabla", Schwiizerpass zeigt (schiinbar simmer nöd die erste wo das so buecht händ) und mer händ doch no däfe ichäcke. Boardcharte hät sie eus kei chönne drucke, will dä Drucker kaputt isch, aber mir händ eh die no gha wos eus eich schon z Züri usdruckt gha händ, die gächi dänn am Gate scho... okeee 😅
Und jetzt los zur Personekontrolle. Wämmer Päch händ gahts det au nomal ewigs... Dasmal hani däm Typ wo det gstande isch aber grad gseit mer müässes pressiere, mer heged scho Boarding und zägg hämmer däfe links dure und die ganzi Schlange vo Lüüt überhole und eus, under böse Blick, vorne ine quätscht.
Typisch USA nämeds äs ganz gnau mit Schueh us, Körperscann und und und... aber isch ja scho verständlich, im Stress fühlt sich das eifach alles ewigs ah.
Nachdem mer wieder alles azoge gha händ, simmer zum Gate gstresst. Also langsam langeds dänn mit dem hure umegestresse. Kurz Pippistopp, die Ziit muen si und dänn glaub als zimmli letschti Passagier zum, natürlich, hinderste Gate.
Boardcharte isch natürli nöd gange und die netti Dame det, hät eus dänn ä neue druckt. 😅
Ab is Flugi, pumpe volle und sauwarm, aber hauptsach mir sind drin. I die allerletscht Reihe und jetzt mal dureschnuufe.
Fast pünktlich simmer dänn abgfloge und nach ca. 3h ändlich in Panama City glandet.
Juhuuu mir händs ändlich nach Panama gschafft! 😃Læs mere