Let's go surfing

Gestert hämmer vo dä Bettina eusi erst Surflektion gha und sind euphorisch id Wälle gumped.
Mir sind beidi nöd komplett unbegabt und nach 2-3 Versüäch bereits gstande und händ bizeli "gsurft". Mega cool 😎
Natürlich mit dä absolute Afänger-Surfbrätter, aber egal, hauptsach mal stah und es Erfolgserläbnis ha 😃
Mir händ so lang güäbt bis eusi Chräft langsam nah lah händ. So cool, das es bim erstä Versuech grad so guet klapped hät!! Mir freued eus mega uf morn!

Am nägste Tag hämmer eus wieder volle Tatedrang id Wälle gstürzt.
Dä Nico, wie erwartet hi und her und ei Wälle nach dä andere gno. Die cheibe "Brätter" egal öb Rollbrätt, Snowboard oder offebar au Surfbrätt, liged däm Giel eifach 😉
Bi mir hät das leider biz anderst usgseh. Ich ha scho gestert nach öppe dä helfti vo dä Lektion Schmerze becho i dä Rippli, sie aber ignoriert und natürlich wiiter gmacht. Hüt isches am Afang eich no gange und so öppe bim 10tä Versuech häts mer eis uf dä rächte Siite bi dä Rippli "ine jagt". Kei Schnuuf meh und zimmli stächendi Schmerze da hani für mich entschide das für hüt guet isch für mich. Leider wie sich usegstellt hät nöd nur für hüt... ich ha än Tag pause gmacht und mich gschont, zum Glück isches da ja mega schön und gnueg Läsestoff hani au däbi. Ich has dänn nach däm Tag pause nomal probiert. Mini Schmerze sind leider nie wäg gsi, aber ich has mer eifach nöd wele näh lah zums nomal probiere. Eigentlich hetti nach em erste Versuech grad chöne höre, chum uf dem Brätt und bizeli Druck uf dä Rippe hani mega Schmerze und es verschlaht mer dä Schnuuf. Ok uf d Zäh bisse und paddlä aber nach 6-7 Versüäch hani müässe ufgäh, willi schlichtwäg kei Luft bechum vor Schmerze. Verdammti Scheisse ächt! 😡 Offebar hani mer öppis zerrt, agrisse oder ev. ä Rippefällentzündig... was gnau kei Ahnig, isch eich au egal, heisst für mich sicher mal 3 Täg pausiere und Medis frässe, zum Glück hät die guet Pflägefachfrau natürli alles debi.
Ich ha dämit grächnet dasi sicher nöd die glich Usduur han wie dä Nico oder mega Muskelkater und drum sicher mal ä Pause meh muen mache, aber so öppis nervt mi unglaublich. Eifach bizeli Muskelkater isches nöd, das wür mer dä Grind nöd zue lah dasi wäg so öppisem nöd gächti go surfe, aber mit söttnige Schmerze gahts schlichtwäg eifach nöd.
Guet da isch es wunderschön, eifach traumhaft, sött ja eich keis Problem si eifach chli z chille... ja natürlich, aber das fallt mer mega schwer. Ich bin es mega "Rangifüdli", bruch Bewegig und cha wenig still sitze, jetzt zwunge z sii, eifach nüt däfe/sölle z mache schisst mi verdammt ah. 🥺
Immerhin laufts bim Nico guet und er hät ussert eme churze Zwick in Zäche vome Chräbs alles im Griff und hät sogar scho chönne ufs chlinnere Brätt wächslä. 🥳Read more