Lassowerfen und Cowboys in Tonosi

Hüt si mer nach Tonosi gfahre, wo es Fest het statt gfunde wie im Wilde Weste mit Cowboys, Lassowärfe und Chäubli. Es git im ganze Land so Wettbewärbe, wo Teams gäge enand aträte und versueche möglechst schnäu uf em Ross es Chäubli mit em Lasso izfah. Das Team wo ihri Chäubli am schnäuste gfange het gwinnt der Wettbewärb. Es winke Prisgälder, Ruhm und Ehr 🤠. Derzue gits musig, Bier und Rum und verschideni Ässensständ. D Cowboys und -girls putze sech use und am Abe wird no z Tanzbei gschwunge. Es richtigs Volksfest auso! Wo mer si acho isch ar Nadine i Sinn cho, dass sie ja allergisch uf Ross isch... zum Glück het üsi Chrankeschwöschter immer öppis im Sack für so Momänt. Z Medi het se zwar vor allergische Reaktione gschüzt, aber wo mer so zmiz i de Ross inne si gstande isch es ihre (und evtl. ou mir 🙈) chli mulmig worde. D Cowboys si afe chli volle xi vom vile Rum und we so e Gleber plötzlech usschlat tuets äuä scho no weh... 🤕😵‍💫 Die tierischi Attacke isch üs zum Glück erspart blibe und so hei mir e gmüetliche Namitag erläbt. Der Abe hei mer när ir Cantina no la usklinge, wie gwohnt mit Meeresfrücht, Balboa und Rum. 😋Read more