Zrugg nach Panama City

Leider gahts hüt scho wieder zrugg nach Panama City und somit sind eusi letschtä paar Täg abroche. 🥺

Nach eme schöne letschtä z Nacht i eusem lieblings Resti vo Santa Catalina hämmer eich wele dä Abig ruhig usklinge lah... mal wieder macht aber leider min Mage nöd mit. 😖
Mis Rippli isch ändli langsam wieder einigermassen ok und ich chum ohni Schmerzmittel us und dänn das 🙄
Kei Ahnig was jetzt wieder isch... Die letschtä paar Reise sind immer "magemässig" guet gange, bis zum Ziitpunkt wommer hei händ müässe... langsam glaubi min Körper wehrt sich gäge s Hei gah... 😅 🤷🏼‍♀️
Villicht sötti eifach nöd hei, s Reisevirus isch eh scho wieder massiv entfacht und wüätet brutal 🤣🙈
Nei, nei chum ja scho gern hei, aber s Virus schlummeret halt scho permanänt 😏

Nach äre nöd so tolle Nacht mit wenig Schlaf und eme Morgä mit fiese Buchchrämpf und Übelkeit, hämmer eus mal irgendwie uf dä Wäg gmacht zu dä Busstation. Mit em ganze Gepäck simmer am Morge am 06:30 dä 1km is Dorf füre gwatschlät.

Dä Bus fahrt am 7:00 i 2h uf Sona, det mümmer umstiige uf dä nächst Bus wo dänn eus i öppe 4h+/- (wahrschindli eher + bi däm Verchehr) uf Panama City bringt.

Am früähne Morge hani mer no überhaupt nöd chönne vorstelle irgend än Fuess inen Bus z setze. Busfahre mit äre Läbensmittelvergiftig hani eimal müässe mache in Kolumbie und scho das isch eimal z vill im Läbe und wotti nüme müässe mitmache. 😱 Ä Läbensmittelvergiftig isches dasmal sicher nöd, aber trotzdem nöd so toll. Zum Glück hät "mer" ja ä grossi Apothek däbi und obwohl ich das blöde Imodium hasse, isches wohl oder übel s einzige wo macht das ich i dä Bus chan stiige.
3 Imodium, 1 Domperidon und 1 Itinerol später traui mi uf dä Bus. Immer no "chötzelig" und unwohl, aber immerhin überstahni die 2h im Bus. Kei Klima, überfüllt und sau äng, aber immerhin chammer d Fänster ufmache und so chumi zum Glück biz a früschi Luft.
Ohni Zwüschefäll jeglicher Art chömed mer pünktlich in Sona a.
Det isch alles tip top organisiert, d Lüüt mega fründlich, hilfsbereit und dä Diräktbus uf Panama City isch scho det, er fahrt aber erst i 1.5h.
Mir hetted au vorher chöne los, aber dänn hetted mer nomal müässe umstiige und da mir bizeli fuul sind, wartet mer geduldig und ich bin froh um suuberi Baños da 🙈

Dänn ändli gahts mit em klimatisierte und au wieder überfülle Bus los. Zum Glück simmer früäh det gsi und ziitig igstige, so das mer no zwei Plätz näbed enand ergattered händ. Mängisch macht sich die Schwiizer-Pünktlichkeit bewährt 😜
Die Iheimische wo zuestiiged müänd teilwiis leider stah oder chömed improvisierti Hocker für in Gang über.
Ein churze Stopp uf halber Strecki und dänn nach ewigem im Stau stah, chömed mer im Räge (!) in Panama City ah.
Zum Glück schiffeds nöd lang und mir gönd mit em Uber is Hotel. Da s Uber fahre so günstig isch da, gönned mer eus dä Luxus.

Icheckä im Best Western Plus und dänn hämmers ändli gschafft für hüt. Bin ich froh! 😓

Eigentlich funktioniert s ÖV System da sehr guet, au zimmli pünktlich und alli hälfed eim, wämmer nöd grad "unpässlich" isch, findis sehr agnähm so z reise.

Mir verbringend no än ruhige Abig und erkundet biz eusi Nachbarschaft und s Hotel und schmidet Plän was mer alles i däne zwei Täg i dä City möchtet mache und gseh.Læs mere