Panama Kanal und flaniere i dä City

Ds absolute must see vo Panama City isch natürlech der Panama Kanal.
Mir si ja süsch nid so uf Massetouri Züg us, aber dä hei mer natürlech scho müesse go aluege. D Nadine het der Kanal zwar uf ihrere Wältreis scho mau xe, isch aber mir z lieb nomau mitcho. Sit ihrem letschte Bsuech isch aus chli gwachse, der abdunklet Rum mit Infofilm per Beamer isch em ne Imax mit 3D Film gwiche, gsproche vom Morgan Freeman.
Mir hei üs natürlech vorgängig chli informiert, damit mer de ou e Kahn gse, we mer scho da use fahre. Isch scho no idrücklech wie sech die Meeresgigante dür dä äng Kanal quetsche.

Vor der Kanalbesichtigung si mer no die historischi Altstadt go aluege und hei natürlech o chli gängelet... 😅
D Altstadt bietet e schöne Kontrast zur moderne Skyline mit ihrne Wolchechratzer.

Nach em Kanalbsuech hei mer üs per Uber wider id Stadt la chauffiere und si ar Promenade entlang richtig Hotel zrug spaziert. Zu üsere Überraschig hets zwüsche de Wällebrächer mega viu Waschbäre wo uf de warme Betonelemänt chille. 🤣 so härzig!
Der letscht Bitz vom Beach zum Hotel gieng dür d Stadt, was üs nid so amacht, wäre doch 40min loufe. Abgse dervo si mer i de Flip Flop underwägs und hüt scho 10km marschiert. Drum bstelle mer wider mau e Uber, was aber dasmau gar nid so eifach isch. Erstens hei mer üses Dateguethabe fasch ufbrucht, nur no paar Prozänt Akku und mir müesse irgendwo der drüspurig Highway überquere damit üse Uber überhoupt cha ahalte zum istige. 🙈 Nach em ne notfallmässige Datepaket Chouf, es paar mau hin u här schribe mit üsem Fahrer wäg em pick up point und öpe no 4% Akku stige mer ändlech is (wie immer viu z starch) klimatisierte Fahrzüg, wo üs zrüg zum Hotel bringt.

Vo Bettina und Mark hei mer no einigi kulinarischi Tipps übercho für Panama City. Die hei mer natürlech müesse go usprobiere (für aui hets leider nid glängt) aber mir Frässseck hei doch einigi testet. Mir lö d Bilder für sich la spräche... 😋Leggi altro