Adiós Panama

05:30 dä Wecker lüütet 😱

Wie so oft hämmer mal wieder nöd chönne online icheckä und das, obwohl mer dasmal es ESTA händ 😅
Nei, will mer z erscht mit Copa flüüged und nachher mit Swiss und d Buechig über Swiss lauft, isches trotz Verlinkig uf d Homepage vo dä Copa nöd möglich online i z checkä.
Egal, aber drum müämmer gnueg früäh am Flughafe sii.
Zur Abwächslig hämmer mal ä Uber-Fahrerin und d Fahrt an Flughafen gaht problemlos und ohni Stau.
Am Flughafen sött mer a some Grät icheckä und dänn nur no s Gepäck abgäh. Natürli gaht das det au nöd und mir müänd an "Assistent" Schalter, wie villi anderi au. Irgendwie verstah ich nach wie vor nonig ganz was die Grät sölled bringe, es brucht trotzdem immer 2-3 Lüüt wo det hälfed und gfühlt bi jedem 3 gahts nöd und mer muen glich an Schalter 🙈
Det gahts dänn riibigslos und dasmal wüssed mer au, das mer s Gepäck z Miami müänd hole und neu icheckä. Drum gits au nur en Koffer Chläber bis Miami. 👀
Ok, guet, dänn no dur d Personekontrolle und ab zum z Morgä.
Leider hät nonig vill offe und so hocked mer is einzige Kafi.
Dä Service det isch sowas vo unterirdisch gsi, eifach Katastrophe. Trotz moderner Bstell-Technik sinds mehrfach nöd fähig gsi eusi Bstellig richtig z bringe und so hämmer dänn irgendwänn resigniert. S Flugi wartet schliesslich nöd. Am Schluss wommer händ wele zahle chunnt er no mit em sit ere Stund vergässene Sandwich für dä Nico. Mir händ dänn eifach behauptet das heged mer nöd bstellt. Vo Englisch fählt jegiglichi Spur, meine in Guánico isch das voll ok gsi, aber ame internationale Flughafe wäred paar Sätz Englisch vo Vorteil. Dänn frägt sie no öbi Trinkgeld will gäh, äääähm definitiv "nei". 🙈

Dä Flug uf Miami gaht 3h so simmer no äs Wasser go hole. Was mer nöd gwüsst händ und offensichtlich villi anderi au nöd, isch gsi, dass die im ernst am Gate sälber nomal ä kompletti Personekontrolle mached. 🤦🏼‍♀️
Vorsicht isch ja guet, aber sorry das isch bescheuert. Zum Glück hämmer nur eis Wasser kauft, wommer chönd exä und dänn kämpfed mer eus dur dä ganz Zirkus. Am Nico nämeds kommentarlos dä Pass wäg und laufed mit däm dävo. Äh hallo?! Au so öppis, redet verdammt nomal mit dä Lüüt was Sach isch! Dä Pass liit muetterseeleallei uf eme Tisch. Er muss dur dä Scanner, ich immer eis Aug uf dä Pass, gang glichziitig au dure und dänn muss er zu dem Tisch und euses ganze Gepäck wird usenand gno. Aha, e Kontrolle, säged doch das eifach 🤦🏼‍♀️

Dänn ändli gahts in Flüger und richtig Miami, natürli hämmer kei Sitzplätz näbed änand becho. Tja egal 🙈

Det acho, hämmer ja eich gwüsst was eus erwartet, aber doch isches dasmal anderscht gsi.
Zerscht wieder über ä Stund müässe warte für die huere Passkontrolle, wär ja au z vill verlangt wänns det meh als 5 Schalter offe hetted für die 1000ig Lüüt wo da us all däne Flüger chömed. Fingerabdrück gits dasmal kei, däfür gnaui Frage und forschendi Blick.
S Gepäckband lauft scho gar nüm und eusi Ruckseck liiged irgendwo uf em Bode. Da mer neu müänd go icheckä und letscht mal au neui Chläber für d Ruckseck becho händ, hämmer wele vor schaffe und fanged a die Chläber weg näh. Uf eimal werdet mer unverständlich agschroue vo zwei Dame. Ich nur so "jaja alles guet, isch euses Gepäck" und dänn seit die eint, nei mer müässed d Chläber dra lah, es stächi ja scho Miami-Züri druffe. Hää?! So gnau hämmer die Chläber natürli nöd agluegt gha und hebe tüends jetzt natürli au nüm würkli. Meh erchlärt sie eus nöd und watschlet dävo. Wieso au immer händ die euses Gepäck vom Band gno, neui Chläber gmacht, aber s nöd für nötig gfunde eus z informieren. Da söll no eine drus cho?

Mer gönd also dä ganz Wäg bis zum Check-in, das isch zum Glück nöd mega wiit und känned mer ja scho.
Mir händ ja jetzt d Chläber und au s Ticket scho bis Züri, da müsstet mer ja eigentlich chönne an Baggage drop-off und fertig? Nööö, wills ä anderi Airline isch, mümmer i däre riese Schlange astah und wartet eimal meh.
Zum guete Glück hämmer dasmal 4h Ziit, es gaht alles länger und isch mega müähsam. Transit über Amerika mached mer ächt nie meh, so en Scheiss!! Absolut nöd z empfehlä, da flügi also lieber nägstmal länger oder zahl meh, aber dä Kack schisst mi ah. Vor allem wird chum öppis erchlärt und es gaht überall eeeewigs. Sehr schwierig für mini Nerve und Geduld 😅

Ändlich am Schalter isch die Frau det wenigstens nett und macht uf mini Nahfrag ohni zögere neue Chläber a euses Gepäck. Guut, jetzt bestaht Hoffnig das achömed.
Dänn nomal dur das ganze Trallalla vo Personekontrolle, dasmal kei Schueh abzieh aber däfür mummer glichziitig näbed änand her laufe und dä Drogespürhund chunnt go schnüffle. Dä arm Siech, im 5sek Takt schickeds d Lüüt dure, dä Hund muen so schnäll umchehre das er mit sine Pfote rutscht uf dem glatte Bode.
Jäggli mümmer dasmal au nöd abzieh, Boxe fürs Züüg gits au nöd, letschtmal simmer zäme gschisse worde wommer dä Rucksack eifach so ufs Band ta händ... da chunnt ächt keis Schwein drus. 😅🙈

Ändli ändli hämmers gschafft und zum Glück no gnueg Ziit jetzt.
Villicht schaffed mers dasmal für öppis gschids z ässe und trinke. Es hät nur eis Resti, wo aber guet usgseht. Also, los ihne und uf all das abe nämed mer je en Mojito, öppis z ässe und will mer no Ziit händ nomal öppis z trinke.
Mir Idiote, völlig naiv... natürli simmer nüme in Panama und ame Flughafe. 🤦🏼‍♀️ Wo dä Nico dä Rächnigsbetrag seit hani gmeint er verarscht mich. Scheisse, so tüür hämmer die ganze Feriä nie gässe! 🤣 Was sölls, shit happens 🤦🏼‍♀️

Dänn ändli gahts zum Boarding und in Flüger nach Züri.

Jetzt hocked mer da im Flugi, gschlafe hämmer nöd so vill, es isch früäh am Morge. I 30min landet mer in Züri, i dä Chelti und s normale Läbe gaht wiiter.

Leider scho alles wieder verbi...
Es isch mega schön gsi, spannend und ja, eifach toll! 🤩
Mir händ vill gseh und därfe erläbe. Unvergässlichi Momänt. 🥰

Näb allem schöne vo dä Natur isch mer mega ufgfalle, das d Mänsche mehrheitlich sehr sehr nett gsi sind und vor allem au hilfsbereit. Au wänn mer nöd diräkt mit Persone z tue gha hät, zum Bispil nur än Wäg krüzt hät, sind d Lüüt us em Wäg, händ "Hallo" gseit, glächlet etc. Das töhnt jetzt villicht komisch, aber a villnä Orte sind d Touris nöd immer gern gseh und vor allem so im Alltag amel au nöd so beachtet. Das isch mer da würkli sehr positiv ufgfalle und findi schön. ☺️

Ach, mir wänd nöd hei...

Panama danke, ich glaube mir chömed wieder! 🥰もっと詳しく