Portachuelo

Hüt hemmer eus für en ruhige Morge entschide. Mir hend die Ziit gnutzt wiedermal mit Dihei z‘telefoniere und gmüetlich üse Avocado-Toast z‘esse. Am 12i isch den euse Bus uf Ica gfahre. Mir hend die Stund beid gnutzt zum chli nappe. Det ahcho hemmer es Taxi zu üsem Hostel (Wild Olive Hostal gnoh. Das isch nämlich chli usserhalb vo de Stadt ide Wüesti ah de Oase Huacachino gsi. Mir hend det üse Rucksack in Dorm grüehrt und hend d‘Ortschaft nochli welle uskunntschafte. D‘Oase isch echt eifach eher en winzige Tümpel wos minere Meinig nah viel zviel Pedalos vermietet wies eich Platz het… Aber aöl die Sanddüne rundume sind sehr ihdrucksvoll. Mir hend üs den en Iiskaffi gholt und sind chli in Schatte gsesse. Am 4i isch üsi Namittags-Tour losgange. Mir sind mit de Beachbuggys abgholt worde und chli tüüfer id Wüesti gfahre. Üse Fahrer isch echt wild gsi und het alli überholt. Eus ihde hinterste Reihe hets recht umegschlezt, aber es isch mega lässig gsi. Mir hend den bimene steile Hügel ahghalte und hend den mit den Sandboards ufem Buch chöne abeschlüüdere. Da ih dem Wüesteberreicv zu dem Ziitpunkt sicher öppe 100 Buggys unterwegs gsi sind hemmer überall d‘Lüt chli gseh umecruise und de Hang abeboarde. Die ganzi Abigstimmig isch echt wunderschön gsi. Bimene 2te Halt hemmer den na chöne de Sunneuntergang ahluege. Es isch würklich en ussergwöhnliche Ablick gsi, womer nid so schnell wieder vergisst. Zrugg im Dörfli simmer hungrig go Znacht esse. Im Bamboo Caffe hemmer Falaffel mit Hummus bstellt, wo nur mässig guet gsi sind. Bi eusem Hostel hets vornedraa no eh Trattoria gha und mir hend beschlosse det na uf en Schlummi zgah. Zu eusem entsetzte isch sie aber pumpevolle gsi und mir hend zunere Frau müesse an Tisch sitze. So viel Touris und Lüt generell sind mir eus nüm gwöhnt. Mir hend denn no en Pisco Sour und es Brownie mit Glace zum Dessert bstellt. Nacher unter de Duschi hemmer us eusne Schueh die halb Wüesti usgleehrt. Ich bin gspanne wenni s‘letzte Chörnli Sand ah mim Körper find👀Read more