Nyanteja

Hermien het die oggend begin met 'n draf (dis malligheid). Ek het ook eventually opgestaan en toe het ons gaan ontbyt eet. Hierdie mense hou van omelette. Hermien sê sy dink dis al wat hulle ken. Hier is so baie avo's en ander goed, maar hulle maak net omelette.

Ons stap toe langs die meer op tot by die publieke 'strand', waar Ironman die vorige naweek aangebied is. Ons stap toe na die Serena hotel langs die strand, want die mense op die strand oorval mens met bootrit en foto aanbiedinge. Die Serena hotel is deftig. Ons dink toe ons gaan net 'n cocktail drink en besluit wat om verder te doen, maar hulle kom bedien ons toe op die gras onder reg by die water. Ons bly toe maar 'n bietjie langer en eet ietsie en lees boek en ontspan. Hulle het super lekker tempura vis en samoosas. Ek en Hermien sê heeltyd 'nog 'n harde dag in diep, donker Afrika'.

Vandaar kry ons moto's (motorfietsies) om ons ATM toe te vat dat ons kan kontant trek om by die supermark en toeriste winkeltjie iets te koop. Die 'middestad' is nogal besig. Ons stap af tot onder, waar ons die goed koop en toe 2 moto's kry om ons na 'n ander strand, 7 km weg, te vat. Dis 'n baie mooi pad met baie kronkels en draaie. Hulle laai ons af by 'n plek en die sekuriteitswag bel iemand om ons te kom haal en op 'n bootrit te vat.

Ons kry toe 'n uur en half bootrit, wat ons vat 'n klein en groter eilandjie, die metaangas 'plant', en ook na die warmwaterbron, want dis 'n vulkaniese land. Die warm water het 'n paar jaar gelede vir 6 dae heeltemal opgedroog toe 'n vulkaan êrens anders 'n uitbarsting gehad het. Die arme bestuurder van die warmwaterbron het toe elke dag gaan bid dat sy water terugkom. Dit het darem. Daar is 2 'baddens' waarin mense sit, en jy kan masserings kry. Hulle sê die minerale is goed vir 'n mens, maar die water lyk maar bietjie vuil vir my. Ons mag nie die mense in die baddens (moddergate met sandsakke om) afneem nie, maar Hermien het skelm.

Ons het nie genoeg kontant by ons gehad nie, maar die bootmannetjie ry toe ook op 'n moto saam ons na die ATM toe (dit was vooraf bespreek, hy het geweet ons het nie genoeg kontant nie). Ons stap toe deur 'n markie, maar dit was donker en almal begin oppak, so ons kry weer 2 moto's en ry tot by ons huisie.

Ons was nie vreeslik honger nie, so bestel sommer net hoender bruchette's (sosaties) by ons blyplek en wag 2 ure daarvoor, maar dit was darem lekker.

Gigi Gorilla (ons kar) het darem 'n rusdag gehad. Môre gaan ons Uganda toe, maar ons moet karre ruil met 'n kar wat deur die grenspos mag gaan, maar die ou by wie ons huur het nou laat weet die kar gaan eers later beskikbaar wees, maar ons wil vroeër ry want ons wil nie in die aand ry nie. Ons sien maar more wat gebeur.Read more