Langnau

Tag 8 und hüt isch s erste Mal es bizzli früsch 😅 Es het glaub i de Nacht grägnet und au für hüt nomal echli Räge agseit, aber dassi zwüsched durre sogar chalt wird ha, hetti nöd erwartet.

De ersti Teil vo de Strecki isch ziemli langwilig gsi. Es isch eigentli nur e Strass zwüsched Bäum gsi und ha nöd würkli öppis gseh. Und wills die ganz Ziit au liecht duruf gange isch, isches irgendwenn müehsam worde. Ich bi defür umso glücklicher gsi, woni äntli e Ussicht gha ha und d Berge ha chöne gseh. Trotz de Pause gester hani nöd so rächt möge und ha au s Wätter ziemli im Blick müesse phalte, willi Blitz gseh ha. Und ines Gwitter cho isch etzt definitiv nüt woni ha welle erläbe 😬 Dank em Meteo Schweiz Radar hani abr gseh, dasses nöd sött zu mir cho, was schlussäntli au richtig gsi isch 😮‍💨 Bin abr glich immer am Usschau halte gsi, wos Hüüser heti zum mich drunder stelle 😅

Insgesamt isch d Strecki mehrheitlich dur Wälder oder zwüsched Buurehöf verbi. Und immer mal widr hets e schöni Ussicht geh. Gäge de Schluss isches meh en mentale als körperliche Kampf gsi, damiti die letschte Kilometer (natürli widr duruf) gschafft ha. Und am 14:10 bini in Langnau im Emmental acho, wasi miteme Chai Latte ha müesse fiire 🥳 Check-in i mim Hotel isch ersch abem 4i gsi, will s Zimmer noni putzt worde isch. Drum bini lang im Kaffi ghocket und nacher no in Migros go umeschnoigge, damiti d Ziit umebring. S Coole isch, sie hend au i dem Hotel widr en super Veloruum womer au gad de Akku widr cha lade ohni dassi de Akku müesst usse neh 💪 Schlussäntli bini völlig KO i mis Zimmer zum chli erhole.Read more