MexiCola 🥤🤔

Mer send die letzte zwei Täg do in San Cristóbal metem Bsuech vo zwei indigene Völker ond emne Chochkurs tüüf id Gschicht vo de Mayas itaucht. Das Ganzi esch uf verschiedne Ebene sehr idrücklich xii ond vellmols au ned ganz verständlich för eus 🤔. Ufem erste ond ufem zweite Bild xehnd ehr d‘Chile vo Chamula - eimol vo usse ond eimol vo inne. S‘Bild vo inne aber hemmer usem Internet: Mer dörf nämli kei Fotis mache, will sie Angst hend, dass ihne so d‘Seel klaut werd ond sie afälliger för Chrankheite werdet. De ganzi Bode ide Chile esch bedeckt mit Pinienadle (heilig; nochegstellt ufem dritte Bild) ond ganzi Familiene hocked am Bode ond send am bete - met 1000ige vo Cherze, Opfergabe (gschlachteti Hüehner), Schnapps (Pox) ond ebe: Coca Cola 🙈. Coca Cola het vor viele Johr usegfonde, dass es chohlesührihaltigs Getränk de Bevölkerig bem Bete wörd helfe (will sie mit „rülpse“ die schlechte Geister versueched los z‘werde) - ond het das voll usgnützt. Mittlerwile esch s‘Cola viel günstiger als Wasser ond die Iheimische send abhängig devo. Keis Wunder also liit de Cola-Verbruch im Staat Chiapas bi bitz meh als 2 Liter pro Chopf ond Tag! 😳Read more