Reset search
Corinne WiederkehrCorinne Wiederkehr
SatelliteEdit route

Corinne Wiederkehr

traveled in 13 countries Read more Luzern, Schweiz
FollowRequestedUnfollowFollowingMessageStatistics
    • You&Me - Exploring the World
      Day 354

      Home Sweet Home 💕

      July 24, 2022 in Switzerland ⋅ ☀️ 30 °C

      Nach 354 Täg semmer weder zrogg ide Schwiiz ond am Endi vo eusem bis jetzt wohl grösste Abentüür! 🤩 Mer hend es uuunglaublichs Johr dörfe erlebe ond send extrem dankbar, dass alles so guet ufgange esch!

      Mer wetted de Moment gern nutze zom euch allne DANKE z’säge!! Egal wo of dere Welt mer xii send, ehr send emmer met debii xii! Mer hends gnosse, dass mer eusi Erlebnis met euch hend dörfe teile. Merci vell mol & mer freued eus, euch ide nächste Ziit weder persönlich z’treffe. 😘

      För eus fangt jetzt au de Alltag weder aa, aber d’Gedanke chreised bereits weder um es möglichs nächsts Abentüür! Mer freued eus uf alles was no chond ond werdet sicherlich no lang vo de Erlebnis ond Idrück vo dere Reis zehre! 🥰Als Abschluss hemmer nomol es paar Highlights för euch zämegstellt.

      Bis bald 👋🏼      Read more

      See translation
    • You&Me - Exploring the World
      114
      Day 351

      Fiji Time 😎

      July 21, 2022 in Fiji ⋅ ☀️ 27 °C

      Vinaka - thank you, Fiji Islands!

      Zwei Woche lang uf einere vo gsamthaft 333 Insle ond mer hend jedi Sekunde devo gnosse! ☀️ Nach so langer Ziit “on the road” hets eifach guet tue, mol es bitz z’verwiile! De perfekti Abschluss vomne no vell perfektere Johr!! 🤩

      Momentan semmer in Istanbul ond warted of euse Aschlussflug id Schwiiz. Ergendwie unglaublich, aber mer send tatsächlich ofem Heiweg… s’esch ned ganz eifach för eus, aber mer send super happy, dass bis jetzt alles so guet gange esch ond mer freued eus of EUCH alli! 💕      Read more

      See translation
    • You&Me - Exploring the World
      1
      Day 349

      Nananu-i-Ra, Fiji 🏝

      July 19, 2022 in Fiji ⋅ ☀️ 27 °C

      Mer gnüssed eusi letzte Täg uf Fiji in volle Züg. Die ersti Woche eschs bitz ruhiger xii mitem Wind, jetzt aber chuutets ond mer verbringed ganz vell Ziit ufem Wasser - Kitesurfe macht eus beidne riesig Spass ond mer werdet jede Tag es bitzli besser! 🪂

      S’Internet aber esch reeechtig schlecht, drum längts nome för eis Foti 😅 wiiteri Föteli folget chli spöter.      Read more

      See translation
    • You&Me - Exploring the World
      3
      Day 338

      Brisbane & Sydney ☔️

      July 8, 2022 in Australia ⋅ ☀️ 14 °C

      Nach dene velle extrem tolle Insle hemmer im Oste no zwei Grossstädt vor eus gha. Zerst hemmer in Brisbane en Halt gmacht ond s’het eigentlich - bis am Morge wo mer denn weder wiitergfahre send - dure gregnet. Mer hend drum ned vell vode Stadt xeh, hend aber deför Ziit gha zom chli shoppe! 🛍

      In Sydney eschs denn leider mitem Rege zerst nome no schlimmer worde. Es het soo fest gregnet, dass euses Zelt duregloh het ond mer eus inere Nacht- ond Nebelaktion es Hostelzimmer hend müesse sueche! 😅

      Dass während de zwei letzte Täg denn d’Sonne vörecho esch ond de Rege ufghört het, esch ned nome för eus, sondern vor allem för d’Lüüt vo do, wo stark glitte hend weg de Überschwemmige, extrem schön xii! ☀️

      Morn flüged mer wiiter uf Fiji, euse letschti (!) Halt bevors denn weder zrogg id Schwiiz goht - för eus beidi ergendwie uuunglaublich ond jetzt scho sehr emotional…

      …ABER mer wennd eich no gar ned z’fest übers Heicho nochedenke ond gnüssed drum jetzt zerst mol eusi Ziit of Fiji! 🏝🍹🪂👙🥥      Read more

      See translation
    • You&Me - Exploring the World
      1133
      Day 328

      K'gari Island 🐋

      June 28, 2022 in Australia ⋅ ⛅ 17 °C

      …oder besser bekannt als „Fraser Island“. Mit 1840 Quadratkilometer eschs die grössti Sandinsle vo de Welt ond es UNESCO Weltkulturerbe. 🏝

      För euse Trip uf d‘Fraser Island hemmer euses Auto gege en 4x4 iituuschet, well mer uf dem Sand nome met somne Auto vorwärts chonnt. Ond das het reeeeeeeechtig Spass gmacht! 😅 D‘Insle het paar sehr schöni Flecke, ABER s’BESTI dra esch xii, dass met dere „roughness“ eifach es riiiese Abentüür xii esch ond mer eus met dem grosse Auto wie Aussies gfühlt hend! 🥳

      Nebst em 4WDing - wies d‘Australier nenned - send d‘Buckelwal es riiese Highlight xii! Zwar eschs no afangs Saison, aber mer hend eifach vode Küste uus 100i Humpbacks xeh schwömme ond springe, extrem iidrücklich! 🐋

      Ahh, ond es lebed zimmli velli Dingos of dere Insle ond s‘het au scho de einti oder anderi Agriff geh gha - drum werd mer au öberall gwarnt. Bim wild campiere semmer denn au zweine begegnet… ond de einti het eus doch prompt en Sack Popcorn klaut. 😅🐕

      För eus gohts jetzt via Noosa Heads wiiter nach Brisbane.      Read more

      See translation
    • You&Me - Exploring the World
      115
      Day 322

      Whitsunday Island 💍

      June 22, 2022 in Australia ⋅ ☀️ 21 °C

      Vo Shute Harbour semmer met erere chline Fähri nach Whitsunday Island gfahre, wo mer drü Täg lang d’Insle i erere volle Pracht hend dörfe gnüsse. ✨

      De Camping esch ganz chli ond familiär xii ond mer hend s’Zelt direkt am weltbekannte Whitehaven Beach gha. De Strand esch ganzi 7 Kilometer lang, de Sand esch wisser als wiiss ond s’Wasser esch uh mega klar ond schimmeret hellblau bis türkis, je nach Sonnestand. Es absoluts Paradies, vor allem au wills zu eusem Erstuune wörkli nome wenig Lüüt gha het. 🏝

      Jede Tag semmer vo eusem Camping die 7km em Strand entlang spaziert uf de Suechi nachem “Swirl”: Bi Ebbe vermischt sich de wissi Sand mitem wenige, türkise Wasser ond das xeht eifach bombastisch uus! 🤩 Eigentlich erreicht mer die Lookouts nome meteme Boot, bi Ebbe aber glangt mer halb schwömmend/halb laufend ebefalls of die anderi Siite ond chan so die wunderschöni Ussicht au ohni en Tour müesse z’bueche gnüsse. 🥳

      De Ort werd för emmer ganz en spezielle Platz i eusem Herze ha & mer hoffed, dass mer ergendwenn weder do hii chönd zrogg cho. 💞      Read more

      See translation
    • You&Me - Exploring the World
      2
      21
      Day 315

      Magnetic Island 🐨

      June 15, 2022 in Australia ⋅ ☀️ 22 °C

      Vor de Küste vo Townsville liit d’Magnetic Island: Es chlises Paradies! ✨

      Mer send met de Autofähri öbere ond hend bide bekannte Horseshoe Bay ufem Koala Bay Camping euses Zelt ufgstellt. En unglaublich tolle Ort zum schlofe, wells ständig raschlet ond ergendwo weder es Wallaby usem Gebüsch springt ond jede Morge semmer pünktlich vo de velle ond relativ luute Kakadus gweckt worde. 🤭

      Mer hend d’Insle vor allem z’Fuess erkundet, uf herzige Wanderweg über Stock ond Stei. Eis vo eusne Highlight send die wilde Koalas xii. 🐨 Emmer mol weder het mer eine ufem Eukalyptus-Baum obe xeh fresse oder pfuuse. D’Koalabäre send früehner ufem Festland weg ihrem wasserdichte Fell gjagt worde - Tierschützer hend Angst gha, dass mer sie usrotted ond hend drum 20 Exemplar uf de Magnetic Island usgwilderet. Sie hend sich uf Ahieb wohl gfühlt ond d’Population esch bis höt of rund 800 Koalas agwachse. 🥳

      För eus gohts nach dere super schöne Ziit wiiter an Airlie Beach, vo wo us mer ines paar Täg d’Whitsundays werdet bsueche. Mer send gspannt ond freued eus riesig! 🙌🏼      Read more

      See translation
    • You&Me - Exploring the World
      1
      11
      Day 308

      Daintree Rainforest 🌿

      June 8, 2022 in Australia ⋅ ⛅ 25 °C

      Im tropische Norde vo Queensland liit de Daintree Rainforest. Er esch de grössti Regewald vo Australie ond de ältisti Regewald vo de Welt (meh als 135 Millione Johr alt).

      D‘Dichti vom Regewald ond s‘intensive Grüen hend eus wedermol extrem beidruckt! Mer send vell go wandere, hend onterwegs die schöne Ussichte gnosse ond send zwöschedure imne natürliche Pool en Abchüehlig go neh. 💦

      Ned nome eus hets gfalle, wie de Regewald of d‘Küste trifft - au d‘Krokodil 🐊 findet das zimmli lässig! Öberall bide Stränd hets drum au Warntafele ond s’heisst mer sell ned z’nöch as Wasser. Natürli semmer d‘Krokodil go sueche, hend aber leider keis gfonde.

      Gege Schluss hets denn nome no gregnet, so hemmer s‘Zelt zämepackt ond reised jetzt langsam d‘Ostküste durab. 🚙      Read more

      See translation
    • You&Me - Exploring the World
      4
      Day 305

      The Great Barrier Reef 🦈

      June 5, 2022, Great Barrier Reef ⋅ ⛅ 25 °C

      Nach zirka 4 Stond flüüge semmer am Samstig Morge früeh guuet in Cairns acho. Do mer s‘Mietauto erst ab em Mäntig reserviert hend, semmer die erste zwei Nächt ines Hostel go schlofe ond hend so guet Ziit gha eus Cairns azluege - es Städtli met Charme! ☺️

      S‘weltbekannte Great Barrier Reef esch vo Cairns us sehr guet z‘erreiche ond mer hend eus grad för am Sonntig en Usflug metem Katamaran buechet. Mer send en ganze Tag lang ofem Meer unterwegs xii ond hend drü verschiedni Riff/Ort bsuecht. De Andrin esch go schnorchle ond d‘Corinne go tauche. 🤿

      Nach dem Tag semmer beidi extrem beidruckt ond aber au „erliechteret“ xii! 😅 Mer send mittlerwile doch a einige Ort jetzt scho xii go tauche ond no vell öfters go schnorchle - ond zu oft hend d‘Riff eifach „tot“ gwirkt, s‘het nömme glebt ond mer het dütlich xeh, was mer (jo au mer zwei!) eusem Planet atüend… Wenn mer also nach somene Tag dörf usem Wasser cho ond mer het wedermol farbigi Koralle ond Schuele vo Fisch erlebt, denn eschs eifach es schöns Erlebnis! 🤩 Ond mer xeht, dass die Teil wo gschützt werdet, au wörkli weder ufblüehet ond das schenkt extrem Hoffnig!

      Gnüssed d‘Bilder & gaaanz liebi Grüess! 😘
      Mer hend ide Zwüscheziit s‘Mietauto abgholt ond verbringed die nächste paar Täg im Regewald. Nach so vell Trockeheit ond rotem Stei ade Westküste, wirkt das Grüen im Oste sehr erfrüschend. 🌳

      PS: Thanks Dave for the pictures! 📸      Read more

      See translation
    • You&Me - Exploring the World
      25
      Day 296

      Karijini National Park 🦅

      May 27, 2022 in Australia ⋅ ☀️ 22 °C

      Vo Exmouth velli velli Kilometer is Landesinneri liit de Karijini National Park. Mer hend eus lang öberleit, eb sich de wiitii Weg au wörkli lohnt…

      …rückblickend chömmer säge, dass es sich definitiv glohnt het! ☺️ D’Abglegeheit, d’Eifachheit ohni Luxus, kei Empfang, kei Trinkwasser, kei Strom, kei Duschene - mer merkt wedermol, wie wenig mer eigentlich brucht zum glücklich sii! 🥰

      Am beste gfalle het eus d’Schlucht (Gorge) ide Hamersley Region - de Ursprung vom Nationalpark ond en bedütigsvolle Ort för die iheimisch Bevölkerig. Nebst de Gorges hemmer s’schöne Wetter, d’Abchüehlige ide natürliche Pools, d’Dingoes (wie sie einem ums Zelt schliched & id Nacht ie hüüled), de stark lüchtendi Sternehimmel ond d’Ziit zu zweit gnosse. 💞

      Jetzt gohts ab zrogg nach Perth, wo mer denn no es paar Täg Ziit hend, bevor euses Abentüür im Oste vom Land wiitergoht. 🥳      Read more

      See translation

    Join us:

    FindPenguins for iOSFindPenguins for Android

    • 2025© FindPenguins
    • Home
    • About us
    • Group Tracking
    • Press
    • Terms
    • Privacy Policy & Cookies
    • Help Center
    • Legal notice