E fasch goudigi Wüeschtestadt

Mir sitze i üsem erschte Nachtbös. 13h vo Jaisalmer nach Udaipur. Mir hei chli Respäkt gha vor derä länge Reis imne indische Bös. Ds Ticket heimr a irgendere Chrützig amne ufgsteute Püutli kouft. Dr Verchöifer het es paar Zahle ufne Zeddu gschribe u für üs beidi e knappe 10ner (620Rupies) verlangt. Mir si nid so sicher gsi öb de das mit üsem agäbleche Doppubett wo mr anschiinend für dä minim Priis söue becho klappet. Itz si mir vor 10 Minute iigstige u hin und weg. Es eigets Kaböischen, klimatisiert, dür Schiebefänschter vom räschtleche Bös abtrennbar..zfride winemore. Uf dr ganze doppubettlängi Fänschter u we me da so zäme ufem Maträtzli höcklet u Indie usse verbizieht chunnts eim fasch vor aus wär me Daheime ufem Sofa am Arte-Doku luege. Üsi Hoteljungs hei üs aus Proviant Paranta (indisches Brot), Pakora u Pickels mitgä u mir hei üsi Reisefläsche mit Ginger Lemon Honey Tee gfüllt. Claudis Lämpli sorgt für die romantischi Belüchtig u Früschtüechli fürnes aagnäms Klima unger de Arme. So usgrüschtet fröiie mir üs richtig uf die Fahrt..u hei Zit für üs..ohni Händler u Huupis u uso..Zit zum z Erläbte z büschele..
Jaisalmer duckt sich ungernes riisigs Fort us Sandstei, bout 1150 n.chr. vomene Mogul wo ar Sidestraas het wöue Gäud mitverdiene. Dä einstig Riichtum merktme dr Stadt hüt no a. Me trifft i de änge Gässli immerwieder uf unfassbar schön verziehrti Stadpaläscht sogenannti Havelis, schön gschnitzti Houztüre u durchuus wohlhabendi Lüt. E Bsunderheit isch, dass das Fort aus eis vo de einzige in Indie no vo Mönsche bewohnt isch. D Brahme u d Warrior (höchschti u zwöithöchschti Kaschte) Teile sich dr Wohnruum und vorauem d Verchoufsflächi im Fort. Ds Fuessvouk läbt unger im Stedtli. Dür die änge, härzige, labyrinthähnleche Gässli im Fort ds schlendere isch zwar mega witzig aber d Mönsche würke uf üs unfründlech überheblech..u drum isch üs vo afang a im Stedtli bim Fuessvouk wöhler. Mir finde schnäu üse täglech Chaiverchöifer u dr Tabakliferant. Üses Hotel ligt chli usserhaub aber d Stadt isch so chli das mir vom Zentrum guet chöi heiloufe..Angscht muesme dadrbi keni ha..Auerdings hei mr müesse lehre, dass Strassehünd nid ohni si.. Dr Strassehunde-Mamma wo ihrne chliine Chappati zum Znacht hei bringt sött me nid diräkt id Ouge luege..läck isch die bäuend cho ds gummpe. Eigentlech sött me ja blibe stah u sich ruhig verhaute..aber mach das mau..mir hei di Hingere füre gno u si dür d Gässli uf u drvo. E schreck Sekunde; e Hundebiss wär übel gsi, vorauem da s in Jaisalmer nid würklech es Spitau hät, oder nume eis wos z vermiide giut. Mit em Schrecke drvo cho, bi üs uf dr Hotelterasse e Beruhigigschai u e Zigi, u aues wieder guet.
Am Charm vom Fort hei mir üs aber de doch nid ganz chönne entzieh. I de aute Wehrtürm hets soumässig härzigi Dachrestöräli wo me sich, über ds Fort, d Stadt u die angränzendi Wüeschti blickend wie in 1001 Nacht füut. U we de no d Flädermüüs wo ds Forttor bewohne bi Sunneungergang usflüüge isch d Ambiance perfekt. Im Panoramic Restaurant mitere Fläsche indischem Wyy mim Schatz si Geburi gfiiret u im Fort Rooftoprestaurant ds beschte Lassi ever (nei kes BanghLassi😉) trunke..ja ds Läbe isch schön in Jaisalmer.
Aber itz hei mirs ou gseh das Jaisalmer. Das Wüeschtevouk isch e ruuche Schlag vo Lüüt. Gröber im Umgang ungerenang u mit de Touris. Bsunders gmerkt hei mirs im diräkte Umfäud vo üsem Hotel. Us Not hei sich dert Bishnoi (Wüeschtebewohner) niedergla wo sich irgendwie düreschlöö. Ihri Chind schicke si nid id Schueu wo grad 30m näbe dran wär, sondern lö se la bättle oder eifach ungerforderet la umelungere. Das füert drzue das si ufne spezielli Art verrohe. Si belagere u bättle henne bedrängend, plage Tierli u würke totau überspannt. Das so vom komfortable Hotelterässli us z beobachte faut schwär. O we mir versuecht hei ihne ds zeige wie me mit Hundebebes umgeit, das bringt natürlech nüt u git nume üs ds gfüu irgendöpis gmacht z ha..janu Crazy India zeigt sich immer involler Läbenschraft u ganzer Bandbreiti. Das ghört äuä eifach drzue!
Udaipur..we are on the road!!Read more