Erg Chégaga - Last day in Desert 🏜️🐪

Eimol meh früeh am morge simmer losglaufe zu eusem ledschte Ziel. Wieder eh längeri Route vo circa 13 km. Zerscht simmer direkt uf de Erg Zaher ufe, die gröschti Düne ihde Umgebig (ca 100 Meter hoch) Eimal meh es wunderschöns Panorama.

s‘verruckte ish im Sand chash afach Grad ufe und abe uf die Dünene laufe oder über de Grat fascht drüber springe, es cha dir nüt passiere und dini Füess hebed immer.

Nachem Erg Zaher ishes witer über diversi chlini und grossi Düne gange, das ish es ziemli guets Training xi 🙈

Im Verlauf hemmer die sandigi Wüesti verlah und hend es mittlerwile uströchnets Flussbett vom Dra Fluss überquert. Nachem Mittag simmer inere Oase acho, laider giz döte ih Moment kai Wasser meh well d‘Regierig amne andere Ort en Stausee baue het. Ih de Oase hets viel Tamariske gha.

Wiiter ishes wieder dur sandigi Wüesti wo mir au euses ledschte Lager ufgschlage hend. De Namitag hend mir dank wenig Wind wieder chöne uf de Düne gnüsse. Chli laufe, läse oder pfuuse 😴

Am Abig hemmer sledschte mol dörfe sfaine Esse vom Kuchichäschtli gnüsse mit waschechtem 1001 Nacht Feeling 🥰

Mir hend d‘Manschaft mitme grosszügige Trinkgeld und Kleider wo mir nüme bruchet verabschidet. Kleider chönd sie selber phalte oder ihrne Familie bringe.

Voller Froiid uf die morgigi Duschi und viel tolle Idrück bini igschlofe 😴Read more