Medellin

För Neujohr simmer in Medellin ahcho. Ah üsem erste Tag hed s meiste zue gha well ja Silvester esch. Also simmer eifach chli sälber dord Stadt gloffe und händ üs au no chli loh Hoor abschniede. Am Obig simmer de ih ehn gmüetlichi Bar ghocked und händ churz vor ehm 12i mini Kollege vom Boot weder troffe. Mit ihne und hunderte Andere hämmer denn am 12i uf ehm grosse Platz ufs neue Johr ahgstosse. Nacher simmer no wiiter ih ergend so ehn Techno Club. Am erste hämmer denn ned so viel möge mache aber mer händ üs ih üsere Chuchi ehn mega feini Pasta gchoched und händ för de nöchsti Tag ehn Tour bueched.

Am 02.01 eschs denn also ändlich rechtig losgange mit besichtige. Ich ha am Luca uf Geburtstag ehn rundi Paintball ih ehmene alte Feriehuus vom Pablo Escobar gschänkt. Das hämmer de grad mit ehnere Tour in Guadape verbonde. Es esch ehn tolle Tag gsii. Paintball location esch werklich guet gmacht gsii und mer händ au no paar hindergrund Infos zum Läbe und de Verbräche vom Pablo Escobar becho. Nacher simmer no s Dörfli go ahluege und sind uf de Monolit gloffe. De Monolit hed üs beidi rächt beidruckt eifach so ehn riese Stei mit ehnere Stäge grad deruf.

Am 3.01 hämmer denn ändlich Medellin chli gnauer welle ahluege. Mer sind uf de Plaza Botero händ zum Zmittag s Nationalgricht "bandeja paisa" probiert, händ mer ändlich es neus Handy kauft und sind ih Botanischi Garte. Zum Znacht hämmer probiert es Restaurant z finde wo chli edlers kolumbianischs Ässe serviert. Us versehe esch das denn echli es sehr edels Restaurant gsii und mer send üs mit üsne Wanderschueh chli doof vorchoh. Da mer ja denn aber scho dete gsii sind, sie üs versichered händ das üsi Chleider keis Problem siged und de Priis no einigermasse zahlbar gsii esch hämmer gfonde mer gönned üs das. Und es esch ächt es Erläbnis gsii! Mer händ 10 (ohni seich 10!) chlini Gäng serviert becho. Mer hed ned chönne ab Charte bstelle sondern esch eifach mit eim nach ehm andere überrascht worde. Jede Gang esch ehn Spezialität us ehmene andere Gebiet vo Kolumbie gsii.

Zum no ehn letschte Teil vom ehemalig so gföhrliche Medellin z gseh hämmer üs ah üsem letschte Morge no für ehn free Graffiti walking Tour im district 13 ahgmäldet. Es esch s arme viertel und bis vor es paar Johr esch det no fliessig gmorded worde. Höt esch es aber ehn Touristeattraktion well die wunderschöne Graffitis verzelled öbbis überd Gschicht und s Liid wo die Lüüt ih dem Stadtteil händ müsse erfahre. Au üsi Tourfüehreri esch det ufgwachse und hed üs somit alles us eigniger Sicht chönne verzelle. Sie hed üs sogar ihres Huus zeigt und immer weder erwänt wie stolz sie sig dass die Nachbarschaft höt so sicher esch und sogar ehn Rollträppe hed, dass mer ned de ganz Hügel muss ufe laufe.Read more