Weltreise

August 2018 - August 2019
August 2018 - Juli 2019
  • 144footprints
  • 27countries
  • 372days
  • 804photos
  • 0videos
  • 93.1kkilometers
  • 67.2kkilometers
  • Day 1

    Abreise

    August 4, 2018 in Switzerland ⋅ ⛅ 33 °C

    De Abschied esch scho schwär aber ich bi froh hani das hinder mer. Und denn esch mit ehm voll packte Rucksack ab uf London gange. Ändlich ändlich started die soooo lang planti Reis.

  • Day 2

    London

    August 5, 2018 in England ⋅ ☀️ 22 °C

    London esch soooo toll gsii. Mer händ ehn werklich cooli Ziit gha und händ mol ehn ganz anderi Siite vo London entdeckt als bis jetzt immer. Am erste Obig hämmer chli Bars ums Hostel ume erckundet und sind am Schluss ih ehnere "hidden bar" irgendwo ih ehmene Chäller vo ehmene Ahzugslade glanded.

    De nöchsti Tag hämmer mit ehmene typisch english Breakfast gstartet und sind denn mit ehnere Street Art Füehrig dor de Stadtteil Shoreditch gloffe. Znacht hämmer i de Hostelchochi grad sälber gmach :)

    Höt Morge eschs denn rechtig Camden Town gange. Nach ehnere viel z lange Uber fahrt (de Verkehr esch schrecklich) hämmers denn gschafft und händs mega gnosse dor all die chline Läde und Marktständ z schländere. Am Nomitag simmer no zum Covent Garden go scones ässe. Nachär simmer de ganz Wäg zrug zum Hostel no schnell via Tower Bridge gloffe. Am Obig simmer denn no is Shacke Shack go ässe und händ üs de Piccadilly Circus bi Nacht ahgluegt. Nach ehme letschte Bier und Scopa Spiel heissts jetzt früeh is Bett zum Morn fit sii für de lang Flug uf Vancouver. Chli ufgregt bini scho vor dem plötzlich alleige sii...aber das chonnd de scho no guet :)
    Read more

  • Day 4

    Ankunft in Vancouver

    August 7, 2018 in Canada ⋅ ☀️ 26 °C

    De langi Flug hani zimlich guet überstande, sogar de Zug zum Hostel hani ohni Problem gfonde. Woni ahcho bi hani schnell Kriise gha. Wär am liebste eifach go schlofe (scho logisch wenn Deheime morge am 3 wär). Ortsziit esch aber erst 6i also heissts halt no chli dure bisse. Min erst Gedanke esch gsii: ich wott s Meer gseh. Also hani mich mit ehmene Spaziergang zu und entlang de Küste abglänkt. Eini vo de beste Idee überhaupt. :)

    Für morn morge han ich mich ah ehnere vom Hostel organisierte Tour ahgmäldet dass ich chli öbbis zdue ha.
    Read more

  • Day 6

    Erste Tage in Vancouver

    August 9, 2018 in Canada ⋅ ☀️ 25 °C

    Mini Tour am erste Tag in Vancouver esch cool gsii. Mer sind mit ehmene Bus zum Lighthouse Park gfahre und denn det chli dure spatziert. Nach de Tour bin ich de mit 3 anderne alleige Reisende go d Happy-hour vo Gastown erkunde. Uf ehm Heiwäg simmer am riesige Fuessballstadion verbi gloffe wo per Zuefall grad es Spiel Vancouver vs. Toronto agfange hed. Tja so Zuefall muss mer nütze. Mer händ üs no schnell 4 Tickets ergattered und sind de legendäri Match go luege. Trotz üsem enthusiastische "go whitecaps" heds ufgrund vo ehmene Eigegoal i de 95te Minute leider nur für es Unentschiede glänged.

    Am nöchste Tag ha ich vorgha de "Vancouver lookout" Turm z bsueche. Uf ehm Wäg det hi han ich aber zwoi ahtroffe wo mit mer uf de Tour gsii sind (und eine defo au am Match). Also bin ich spontan mit ihne go de Hafe aluege. Wo mer de ganz Hafe entlang gloffe sind sind mer grad bim Stanley Park ahcho. Also hämmer (wedermol spontan) entschiede es Velo z miete und chli dur de Park z düse. Am Nomitag han ichs denn zrug im Hostel chli gmüetlicher gno. Ich ha mol mini Wösch gwäsche, chli Tagebuech gschriibe und bi denn go poste fürs Znacht. S erste Mol han ich d Hostelchuchi gnützt. Sie esch top usgstatted und mega suber. Ich ha mer es super gsunds Toscanapfändli gmacht als usglich zu dem ungsunde ässe wos ah dene Ständ immer ged. Bim ässe han ich wiederum d Lüüt vom Fuessballmatch/de Velotour troffe und mer händ üs fürs Pup-Quiz i de Hostelbar verabreded. Trotz üsem super Name "Nacho average squad" hämmers leider nur uf de zwoti Platz gschafft (die erste hätted 50.- Guethabe ah de Bar becho).

    Nichts desto trotz bin ich höt weder früeh uf zum ah de Tour ih Lynn Canyon teilznäh. Ih dem Park simmer zerst über ehn Hängebrugg gloffe und denn rund um so es Seeli ume. Am Schluss simmer zur erfröschig no ih es iischalts Flussbecki go bade. Es esch alles werklich wunderschön gsii! Wo mer zrug cho sind esch erst drüü gsii also hämmer entschiede no chli dur Chinatown und Gastown z laufe. In Gastown hämmer denn au es eher früehs Znacht gässe bevor mer quer dur d'Stadt zum Sunset Beach Park gloffe sind. Det simmer no chli go schwimme und händ de Sonneundergang gluegt. Näbe bi händ es paar Strossemusiker no chli Musig gmacht (mit Gitarre und Cajón). Es esch werklich traumhaft gsii.

    Wie ehr gsänd lauft bishär alles super spontan aber guet. Ich muss mich no chli ah das ganze ned plane gwöhne gnüss es aber bis jetzt sehr. Ich glaube es esch ehn guete Entscheid gsii chli viel Ziit in Vancouver ihzplane so cha ich no chli ahcho :)

    Ps: Da ich so viel tolli Bilder ha bruchts ehn zwoite Ihtrag
    Read more

  • Day 10

    MuralFestival, GrouseGrint, Granv.Island

    August 13, 2018 in Canada ⋅ ⛅ 20 °C

    Am Samstig han ich mich wedermol ah ehnere Hostel Tour ahgschlosse. Dasmol eschs ahs "Mural Festival" (Strossekunst Fäst) gange. Da mer erst am 11i los sind bi ich zerst no mit ehnere Kollegin vo Dütschland ufd Bank und ha ihre gholfe es Konto z eröffne. Es esch sehr spanned gsii mol z gseh wie das do so ablauft :). Nacher simmer den los ah das Strossekunstfäst. Es esch es extrem cools Fäst gsii mit jegliche Arte vo Kunst. Es hed wunderschöni Graffitis, faszinierendi Strossemusiker, Ässe us aller Wält, cooli Skateboard fahrer, gmeinschafts Bilder wo jede cha go drufmole (ja Mami ich weiss so cool :P), Biergärte und ganz viel Ständ mit sälber gmachtem Züüg gäh. Vorallem hed mich ei Künstler fasziniert wo siis Bild wäred ehm ganze Fäst vor Zueschauer gmolt hed. Es esch spannend gsii ihm zuezluege wie er inmer weiss wo de nöchsti Strich hii muess.

    Am nöchste Tag han ich mer de Grouse Grint vorgnoh. Das esch ehn ca. 1.5h langi Wanderig uf de Huusbärg vo Vancouver. Es esch de ersti Tag gsii wo ich werklich öbbis alleige gmacht han und ich bi werklich froh drum gsii. Ergendwie werds mit de Ziit ahsträngend immer mit allne so Smalltalk z füehre, die gliich Gschicht z verzelle ubd fründlich z sii. Ehn "free shuttle" hed mich ah Afang vo de Wanderig brocht. Ich bi relativ langsam los gloffe well ich d Infos im Internet gläse ha wo eim warned dass mer guet trainiert müss sii und jo ned zu schnell döffi laufe da mer ned döf chehre (de Wäg esch relativ steil dum döf mer nur ufe aber ned abe laufe). Ich ha denn aber schnell gmerkt dass die bizli übertriibed und bi ih normalem, gmüetlichem Tempo mit viel Pause de Bärg deruf spatziert. So bini zwar chli langsamer gsii als de Durchschnitt, ha mich aber die ganzi Wanderig dure wohl gfühlt und bi wahrschinlich eini vo de wenige gsii wo dobe grad wiiter gloffe esch ohni völlig kapput z sii. Au uf ehm Bärg obe heds vieli Attraktione gäh. Ich bi go d Bäre ahluege und ha paar Minute ah so ehme ober übertriibnig gspielte "Männerwettkampf" zuegluegt. (Sie händ müsse gäge ehnand Holz sage und so aber d Witzt sind so extrem ihgstudiert gsii dass es schoweder nömme lustig isch). Abe bini denn mit de Garaventa Seilbahn. Zrugg im Hostel bin ich mit minere Dütsche Kollegin (Julia übrigens) und ehmrne franzos wo neu ih mim Zimmer esch und niemert kännt und ned guet englisch reded (Antoine) go Poutin ässe. Es esch ned fein gsii aber vellecht hämmer au de falschi lade verwütscht.

    Am Mäntig han ichs denn ächt mol chli gmüetlicher welle näh. Ich bi am Morge mit ehere Australierin und wederum mit de Julia chli dur Vancouver spatziert. Mer händ Crèpes zum Zmittag gässe und send am Nomittag chli im Gmeinschaftsruum vom Hostel ume ghocked. Am Obig han ich entschiede uf Granville Island z goh und d Julia hed spontan entschiede mitzcho. Grandville Island esch mega toll. Es hed ehn riesige Määrt, ganz viel chlini Lädeli und überall spieled Strossemusiker. Das so chli s Fischerquartier esch heds au überall Restaurants wo vorallem Fisch serviered. Ih eim vo dene simmer denn au go Znacht ässe. Ich ha ehn Art ehn Lachssalat gha mit "House smoken Salmon" mmmmhhhh.....
    Read more

  • Day 12

    Bye bye Vancouver

    August 15, 2018 in Canada ⋅ ⛅ 19 °C

    Mini letschte zwoi Täg in Vancouver han ich nomol sehr gmüetlich gnoh. Gester bin ich chli alleige umegloffe und ha all das Züüg gmacht wo ich mol no ha welle mache, die Lüüt wo ich debi gha ha aber kei Lust druf gha händ. Zerst bin ich uf de Lookout mer mol ehn Überblick über die ganzi Stadt go verschaffe. De Stadtchärn esch relativ chli und so eschs interessant z gseh wo mer scho überall gsii und dure gloffe esch. Denn bin ich is "Meet" go ässe...es esch es Vegans Restaurant (hihi und es heisst Meet - verstande? ;)). Denn bini no chli wiiter gloffe zu de Public libary...eifach ehn riesigi Bibliothek. So viel durchläsnigi, teilwiis alti Büecher alli schön suuber sortiert :) es richtigs Paradiis. Denn bin ich no ah ehn Ort gloffe wo ich am erste Tag uf de Suechi nach ehm Hostel usversehe glandet bin und gfunde ha d Ussicht sig toll. Leider esch d Ussicht jetzt aber nümme so toll well ganz Vancouver voller Näbel esch vo de Waldbränd wo überall rundume fröhlich vor sich hii brönned - Kanada bruucht dringend Räge. Zu gueter letsch bini zrugg is Hostel chli go läse bevor ich denn am Obig mis (ganz Tag gültige) Ticket für de Lookout nomol im dunkle gnützt han. Vancouver bi Nacht esch unglaublich faszinierend gsii.

    Höt ha ich denn wedermol mit de Hosteltour mit welle. Sie händ ehn Kayak Tour ufs Meer use plant...das hani umbedingt welle probiere. Tja, leider hed aber au die wäg ehm usbliibende Räge müsse abgseid wärde. S Meer rund um Vancouver esch extrem verschmutzt. Normalerwiis spüelet sii s Meer mit früschem Rägewasser...das muss aber im Momänt wäg gloh wärde drum esch strikts bade Verbot. Als Alternative esch ehn Tour uf Granville Island ahbotte worde. Obwohl ich det scho gsii bin ha ich entschiede mit z go, da ich Granville Island werklich toll finde, de Guide sicher no spannends Züüg zum verzelle hed und d Lüüt wo mit sind ehn lustigi Truppe abgäh händ. Ich ha ah dem Tag werklich no einigi neui Lädeli uf Granville Island ebtdeck und vorallem sehr interessanti Gspröch gfüehrt. I üsere Gruppe sind nur solo Reisendi gsii und jede hed sini ganz eignigi Gschicht gha. De lustigst vo allne esch de blondi, rasta trägendi Tourguide gsii. Er hed üs churz ih es paar Grundsätz vo de Meditation ihgwiise (sin Näbejob). De Tourguide esch denn gange und mer sind sälber no chli dur d Läde gloffe. Zrugg im Hostel han ich packt, Wösch gwäsche und so, dass ich parad bin zum morn früeh ufstoh für mini Tour.

    Ich freu mich us de Stadt use z cho und chli meh ih d Natur z go. Es muss werklich beidruckend sii.

    Ps: Uf de Bilder vom Vancouver Lookout cha mer de Näbel vo de Waldbränd rundume guet erkänne.
    Read more

  • Day 13

    Moose: Vancouver to Kelowna

    August 16, 2018 in Canada ⋅ ☀️ 26 °C

    Am erste Tag esch mini Tour vo Vancouver richtig Banff ih d Stadt Kelowna gange. Nach öbbe ehnere Stund händ mer die ersti Pause bi ehmene wunderschöne Wasserfall gmacht. Mer send nach de Ahwisig vom Guide (don't climb up to the forbidden but far more beautiful and far better spot. I will look in the other direction now) ufe zum Wasserfall klättered. Det heds au no ehn churzi Vorstelligsrundi gäh. Bevor mer weder lang bus gfahre send. Im Bus esch s känne lehre denn wiiter gange.

    De nöchsti Stop hämmer i de Town of Hope gmacht. Es hed aber nur schnell zum usehüpfe und öbbis Zmittag chaufe glänged. Zmittag gässe händ mer denn im Bus uf ehm Wäg zum Shkaha lake. Ah dem See sind mer go StandUpPaddle, leider eschs aber immerno überall rauchig gsii und mer hed die schöne Bärge rundume gar ned gseh.

    Denn sind mer dure gfahre bis Kelowna wo mer üses Hostel gha händ. Mer händ Pizza gässe zum Znacht und sind denn no chli durs Städtli spatziert, dass mer das au no gseh händ.
    Read more

  • Day 14

    Moose: Kelowna bis Banff

    August 17, 2018 in Canada ⋅ ☀️ 20 °C

    De zwoiti Tag esch einiges ihdrücklicher gsii. De einzig planti Stop esch weder ah ehmene See gsii wo mer d Möglichkeit gha hed uf ehn Kayaktour z goh. Ich has mer lang überleid well mers ja no zuesätzlich muss zahle, has denn aber zum Glück gmacht. S Kayake esch sehr cool gsii. Mer händ ehn lustige g
    Guide gha wo immer dummi Witz (do gnännt Dad-Jokes) gmacht hed. Ih de mitti vom See händ mer gstoppt und ih Bärg ufe gschroue zum s Echo ghöre. Es esch s stärkste Echo wo ich je ghört ha. Rechtig mit Verzögerig und teilwiis eschs vo mehrere Siite zrug cho. Es hed Lüüt ih de Gruppe gäh wo werklich gmeint hed de Guide verarschi üs. Nach ehmene churze Snack uf ehm See hed denn jede no döffe vor ehn Wasserfall häre fahre zum es Foti mache.

    Denn sind mer bis am Obig wiiter gfahre und sind in Banff weder pünktlich fürs Znacht ahcho. Mer send dasmol usswärts gange d Hälfti ih d Spaghetti factory und die ander Hälfti is irish Pup. Für mich hed sich s irish Pup ergäh und ich has sehr gnosse. Es esch live Musik gsii und mer sind währed ehm uf de Burger warte no chli go tanze. Weil eine us de Gruppe 30 worde esch ah dem Tag sind mer denn au no chli wiiter in Banff go Party mache.
    Read more

  • Day 15

    Moose: Banff bis Lake Louise

    August 18, 2018 in Canada ⋅ ☀️ 14 °C

    Am dritte Tag händ mer ned so wiit müsse fahre und händ defür um so meh Stopps gmacht. Für mich esch das de absoluti Wandertag gsii well ich eifach bi Allem mögliche mitgmacht han.

    Als ersts sind mer zum Johnston Canyon gfahre. Det hämmer ca. 2h Ziit gha zum eifach sälber chli laufe. Da s so viel schöni Wasserfäll gha hed bin ich eifach immer wiiter gloffe bis ich am schluss ha müsse zrugg stresse.

    Am nöchste Stop heds scho Zmittag gäh. Mer hed entweder am Lake Minnewanka hocke oder mit ehm Tourguide go ehn Wasserfall sueche, wo er zwar ned gnau weiss ob mer det ahne chömed er aber ghört hed es sig no schön. Das dönt nach Abentür - esch es au gsii. Nach ehnere chline Chlätterihlag hämmers gschafft obe am Wasserfall z sitzte und det Ussicht so wie Zmittag z gnüsse.

    Nach ehm Mittag händ mer üs uf de Wäg zum Moraine Lake gmacht. Zerst heds det ehn chline Foti Stop gäh und denn weder ehn freiwilligi Wanderig wo ich sälbstverständlich ha müsse mitlaufe. Mer send echli wäg vom türkisblaue Wasser dur de Wald zu ehnere wunderschöne Stei-Wasserlandschaft gloffe.

    Ah dem Obig händ mer denn au no es BBQ verahstalted, händ Guetzli vo ehmene Meitli kauft wo uf neui Ski spart und sind ändlich mol früeh is Bett.
    Read more