Siargao - Camping trip

Mer hend es Abentüür erläbt!

Mit 2 "Guides" simmer uf en Campingtrip öber d Insle. Gstuuned hemmer scho mal wo die beide Barfuess ond i de Badhose uftaucht sind, me brucht mer da anschiinend ned 😄

No schnell s Zält ond d Surfbrätter ufm Roller montiert ond los esches gange. Die beide hend sichs zum Uftrag gmacht üs die ganzi Schönheit vo ehrere Insle z zeige. Ond die Schönheit esch so atemberaubend, mer hends gar ned chönne fasse. Was mer a eim Tag alles erläbt hend... A einsame Stränd go bade, dur en Höhli chlättere/schwimme, i natürlich Pools go bade ond debii d Usssicht ufs Meer gnüüsse, riisige Palmwälder gseh, einisch simmer dor en Palmwald gwanderet, öber Stock ond Stei gchlättered (üsi Guides natürlich emmer no barfuess) ond denn simmer zumene alte Lüüchtturm cho. Mer send ganz zoberst obe aneghocket ond hend d Ussicht gnosse. Ich glaube das esch en Momänt womer beidi nie wärded vergässe, sooooooo vell Schönheit 😍
Wos dunkel worde esch hemmer amne Strand üses Zält ufgstellt ond hend no es Füürli gmacht. S verwache am nächste Morge esch so friedlich gsi, mer hend üses Zält ufgmacht ond de wonderschöni Stand ond s Meer gseh. Da hemmer doch grad als ersts müesse es Morgebädli go nä 😊 Ich bi nachär no go surfe und d Irina hed chli de Strand gnosse.

Ome Mittag hemmer üs de langsam ufe Wäg richtig hei gmacht. Mer hend no anere Art Lagune gstoppt womer nochli baded ond "gschätteled" hend. Jetzt liggemer im Hostel, mit dräckige Füess, verstrublete Haar aber funklende Auge ☺️Read more