Und domingo variado

Hüt wirdi vode Sunne gweckt und han d'Hoffnig dases klapped mit de Wanderig uf de Rucu Pichincha. Nacheme Blick zum Fenster use in Richtig Berge und eim in Wetterbricht mues das Projekt aber au hüt abblase werde. D'Sicht isch für nix und öppe abem Mittag sölls regne.
Bevor de Rege chunnt, ziehts mi in Parque Metropolitano, de grösst wo Quito hät. Im Gegesatz zude andere Pärk bestoht dä würkli no usem originale Wald. Zum det here cho gäbtis en Bus wo all 15 Minute direkt sött zum erhöhte Parkiigang fahre. Nach 25 Minute warte und emene wiitere Smalltalk miteme Iiheimische (das schiint do absolut normal z'si, dasmer mit Touriste afangt rede) hani gnueg und sueche e anderi Linie für id Nöchi. Das klapped denn au uf Ahieb... Ein breite Weg und vieli chlineri Trampelpfäd füehred mi 3 Stund lang dur de Wald und vo Ussichtspunkt zu Ussichtpunkt. In Richtig Oste fallt s'Gländ sehr steil inen Canyon ab und bi gueter Wiitsicht wür mer tatsächlich au de eint oder ander Berggipfel gseh aber ebe... Mini Gastmuetter meint au, dases für Märzverhältnis sehr verregnet und extrem chalt isch - danke ^^ Irgendwenn meldet sich d'Jaclyn wider wilmer "nachem Mittag" für e Kunstusstellig ide Stadt abgmacht hend. Isch zwar ned mini Welt aber stellt sich use, dases es paar jungi Künstler sind wo verschiedeni Sache herstelled und sich dete chönd präsentiere. Nachher laufemer im strömende Rege zum Mercado Artesanal La Mariscal, wo en Märt bestehend us gfühlte 500 Touristelädeli isch. Ich finde es Magnet für mini Sammlig und denn lömer eusi gmeinsami Ziit bimene Snack imene Café uskling. Für d'Jaclyn gohts am Obig no zrugg uf New York, während ich en gmüetliche Obig dehei mache :)Read more