Dos días con poco actividad

Ja was sölli sege? S'Wetter zeigt sich immerna füecht-nass und mini Motivation zum grossi Sache mache halted sich in Grenze...
Die Wuche simer nume na s'zweite ide Klass. Zwei Schwiizerinne :)
Nach de Schuel am Mäntig gangi na mitem Cameron go esse und denn uf direktem Weg hei. Dete bestoht s'Programm us chille, lerne, esse und lese während de Rege fliessig uf s'Dach prassled und ab und zue en Donner z'ghöre isch...
Am Ziistig hett d'Schuel en Usflug mit de Seilbahn uf de Huusberg planed. Wil aber pünktlich uf de Mittag wider starche Rege iisetzt wird das abgseit. Alternativ gangi go d'Iglesia la Compañía de Jesús besichtige. Vo usse isch scho de barokki Baustiel erkennbar, wobi d'Frontsiite komplett in Vulkangstei gmeissled isch! Im Innenereich isch alles komplett mit Blattgold deckt. Es wird gschätzt, dass öppe 1 Tonne Gold verbaue isch. Finanziert worde isch das Gold dur Jesuiteeltere, wo ihrne Chind demit Studieplätz ade zueghörige Schuel kauft hend. Baut worde isch de Tempel vo 1605 - 1765, es hät also sini Ziit brucht. Nebst de Überreste vode Mariana de Jesús, de erste Heilige vo Ecuador, häts au ganz viel Gmäld vo bekannte Künstler (wo ich ned kenne aber trotzdem beidruckend sind) ide Chile.
Nach dere Goldüberfluetig gangi namel zude Tourishops zum warmi Socke us Alpakawulle chaufe. Mit chalte Füess schloft sichs nämli zimli schlecht und langsam nervt das ^^ Ich hett Flauschesocke debi gha aber eine isch z'Mindo irgendwo verlore gange... Schliessli wirdi fündig und verbringe de Rest vom Nami im Trochne mit Film luege, lerne, esse, lese und schriibe. Ich wär parat für Sunneschii di negste Täg aber di (unsichere) Prognose seged ned viel Guets vorus :/

Oh und es isches jetz fix dasi am Wuchenend uf Otavalo wechsle für di letst Schuelwuche. Wenn genau dasi wett zügle chani und wirdi spontan am Frititig entscheide, je nach Wettervorhersag für de Samstig. Ich freu mi recht uf d'Verschiebig. Han mi zwar mit Quito agfründed und fühl mi fengs würkli wohl, trotzdem bini froh wenn d'Stadt chliiner, d'Luft reiner und d'Umgebig lockerer wird, so dasmer au mal miteme guete Gfühl ide Nacht chan dusse umelaufe :)Lue lisää