Reset search
Latinamerica: EcuadorLatinamerica: Ecuador
SatelliteEdit route

Latinamerica: Ecuador

February - June 2023
A 124-day adventure by Maria Read more
  • 67footprints
  • 2countries
  • 124days
  • 794photos
  • 11videos
  • 11.3kkilometers
  • 3.4kkilometers
Follow Calendar Share Bucket list
Date ascending
  • TravelerLatinamerica: Ecuador

    Las preparaciones

    February 24, 2023 in Switzerland ⋅ ⛅ 13 °C

    Vor öppe vier Jahr hend mini Vorbereitige für die Reis meh oder weniger unbewusst agfange – mit Spanisch lerne. Wilmer ja währedem Studium ned soo viel z’lerne gha hend, isch die Idee mitem Spanisch ufcho und sit dete bini dra. Würklich konkreter isch denn d’Idee mit Südamerika erst im Summer letst Jahr worde. Nach es paar Blogs lese hani mi entschide zum Ecuador und Peru bsueche und mit 4 Wuche Sprachschuel in Otavalo starte. Also ab uf s'Reisebüro zum bueche. Chum sind d'Flüg fix gsi, hät sich di politisch Lag in Peru so starch verschlächtered, dasi mi entschide han, zum Peru komplett striiche. Alternativ wirds jetz uf Bolivie uselaufe - gits halt statt em Macchu Pichu d'Salar de Uyuni :)
    Es paar anderi Sache hend au no müese gmacht werde: Impfe, Medis organisiere, Untermieter sueche, Pass prüefe, Versicherige kläre, Fasnacht gnüsse und denn schliesslich packe und butze. Hät alles klapped, so dasi theoretisch parat bin für das grosse Abentür. Praktisch bini doch einigermasse nervös wili ned soo genau weiss, was mi alles erwarted s'erst Mal so ganz elei untergs...    Read more

    See translation
  • TravelerLatinamerica: Ecuador
    Day 1

    Viaje y Llegada

    February 25, 2023 in Ecuador ⋅ ☁️ 12 °C

    Und los gohts!
    Am Morge am 5.30 heissts aatrabe für Check-In und denn tschau sege. Fallt mer nüm ganz so schwer wie vor 5 Jahr bide letste grosse Reis. Wirdi erwachse? Oder erfahre?😱
    Sicherheitscheck und Umstiege sind keis Problem, so dasi 15 Stund, 2 Film, es Buech, 2 Podcasts, 3 Mahlziite und es bitz Schlaf spöter Quito sichte 😍
    Bald machi mini erste Schritt uf Südamerikanischem Bode in Richtig Immigrationskolonne und Gepäckband. Au das lauft wie am Schnüerli und vorem Flughafe chunnt au grad min Chauffeur zude Gastfamilie z'fahre. Zerst redter mal nume Spanisch zum mis Niveau checke wil er de Schueldirektor isch - bin grad bitz überfordered aber chume klar bismer schliessli uf Englisch wechsled. Nachere Stund Fahrt simer immerna z'Quito und mini Gastfamilie nume na 10 min entfernt gemäss am Eugenio. Do wirdi mistrauisch, hani doch d'Schuel in Otavalo - also 2 Fahrstunde abem Flughafe bueched...? Stellt sich use dases es Duenand bide Buechige geh hät und er mich usversehe z'Quito iquartiert hät - ups... I blibe jetz zerst Mal do und luege denn nachere Wuche, obi blibe oder ob mer d'Stadt z'gross isch undi uf Otavalo wechsle wett.
    D'Gastfamilie nimmt mi schliesslich herzlich in Empfang - und ich probiere uf Spanisch z'erkläre dasi gar ned sött do si. Gar ned so eifach 🤣 Es sind grad na zwei dütschi Mädels ume wo aber na abreised bis am Mäntig. Für es bitz Ustusch langeds na bevori denn doch zimli müed is Bett gange.

    Am Sunntig wird usgschlafe bevor mi es richtig guets Zmorge erwarted. Nachher heissts es bitz chille bisi mit de Gastmuetter, de Patricia, mal Richtig Altstadt gange zum de Schuelweg kennelerne und so en allgemeine Überblick übercho. Relativ gli simer wider zrugg und denn isch wider es bitz lese, Reis plane und relaxe agseit. Es bitzeli müed bini na, was wohl uf d'Reis, d'Meereshöchi und e chlini Verchältig zruggzfüehre isch...
    Morn gohts denn los mit de Schuel. I bi gspannt wies wird 😁

    Hasta pronto de Quito :)    Read more

    See translation
  • TravelerLatinamerica: Ecuador
    Day 5

    Los primeros días en la escuela

    March 1, 2023 in Ecuador ⋅ ☁️ 21 °C

    Usschlofe chani ned so guet wil d'Sunne ab 06.30 direkt i mis Zimmer schiint, aber git schlimmers. Mini Gastmuetter macht jede Morge es super Zmorge mit Fruchtsaft, Tee, Eier, Frücht und Brot parat - a das chönnti mi gwöhne :) De Schuelweg findi denn tatsächlich problemlos wider am Mäntig Morge und zimli schnell hocki mit zwei andere Schüeler und enere Lehrerin im Klassezimmer und han agfange Spanischtheorie büffle. Nach 4 Stund rauched alli drü Chöpf und mir sind froh über de Firobig. D'Schuel organisiert für zimli jede Tag e zuesätzlichi Aktivität womer chan teilneh. Hüt isches en Usflug zude Virgen del Panecillo, enere 30 Meter höche Maria-Statue ufeme Hügel zmitzt ide Stadt. Mitem Taxi fahreremer ufe und gnüssed dete di beidruckend Ussicht über di ganz Stadt. Wahnsinnig, wie viel Platz 2 Millione Lüt bruched zum lebe (ufem Foti isch "nur" di halb Stadt druf). Dobe gnüssed di einte no es Empanada con Queso, e Spezialität vo do. Ich han immerno en volle Mage vom Zmittag. Und denn machemer eus z'Fuess uf de Zruggweg und gnüssed di verschidene Blickwinkel uf d'Statue und d'Stadt. Wider dune acho machi mi uf de Heiweg. D'Schuel und d'Meereshöchi bruched zimli Energie. Dehei heissts Husufgabe mache, Vocci lerne, esse und denn zimli bald go schlofe.

    De Ziistig gseht bis zum Zmittag öppe glich us wie de Mäntig. Leider isch eusi Lehrerin jung und unerfahre und chan ned würklich uf üs igoh und verstoht eusi Froge ned. Mir melded das de Schuelleitig und sind gspannt, was passiert. Hüt hani mi für de Namittagsusflug ned agmeldet wil d'Wiitsicht ned ganz so guet isch und de Usflug mit de Seilbahn uf de Huusberg wär. Vilicht machi das mal am Wuchenend und kombinieres mitere grössere Wanderig dobe. Wobi gross uf 4000 müM vilicht bitz anderst definiert wird als sust 😉 Mis Programm bestoht us SIM-Charte organisiere, Zmittag sueche, im grosse Supermärt go es paar Sache pöstele und denn hei go Husi mache und erhole. Am Abig hämer abgmacht für es Znacht und is Kino. Zwüsched Resti und Kino ligged nume 800 Meter und trotzdem heissts für mich es ersts Mal elei es Uber neh wils scho dunkel isch. Klapped logischerwis super au weni es bitz Respekt gha han. De Film isch uf Englisch mit spanischen Untertitel und duured 2.5 Stund. Ganz schön astrengend... De Heiweg nehmemer alli im gliche Uber in Agriff und schliessli bini super kaputt irgendwenn dehei.

    Au de Mittwuch started normal aber mir hend e neui Lehrerin übercho - danke 1000, jetz chömer endli viel meh rede zum das womer lerned au grad üebe. Nach vier Stunde rauched eusi Chöpf wider bedenklich starch. Zmittag gits imene Foodmarket mit vielne Ständ zum sich öpis ussueche. Was genau dasi isse weissi bis am Schluss wider ned aber es isch fein. A das muesi mi wohl eifach gwöhne... Für de Namittag lohni mer vonere andere Schüelerin de Park "La Carolina" zeige, quasi de Central Park vo Quito. Ich gnüsse d'Rueh ohni Verchehr so richtig und legge ufeme Bänkli e Husufgabe-Session i. Zrugg dehei plani mis Wuchenend und mini ungefähr Wiiterreis nach de Sprachschuel und mues na Vocci büffle 😅

    Hasta la vista de Quito :)    Read more

    See translation
  • TravelerLatinamerica: Ecuador
    Day 6

    Conocer mejor Quito

    March 2, 2023 in Ecuador ⋅ 🌧 15 °C

    De Donstig started normal mit Zmorge und Schuel. Bis am Mittag wüssemer vo ganz viele unregelmässige Verbe, wie dass konjugiert werded. Jetz müemer nume no lerne, was si all uf Dütsch heissed. Wird wohl es Problem vom Wuchenend werde... Nach de Schuel chochemer ide Schuel "Loco Quiteño", e ecuadorianischi Spezialität wo meh oder weniger e Härdöpfelsuppe mit Frischchäs und Avocado isch. Nachher hani mit de Reiseverantwortliche vode Schuel abgmacht. Mir reded meh als e Stund - uf Spanisch - über möglichi Usflüg in Amazonas, möglichi Usflugsziel und Reiseroute nachem Amazonas und über d'Galapagosinsle. Sind vieli hilfriichi Infos, jetz liits a mir zum mi für eini vode Lodges im Amazonas entscheide. Na isch de Namittag jung, so dasi mi uf mache zum ide Altstadt d'Iglesia de El Sagrario aluege. Für mich isch die vom 16. bis 17. Jahrhundert bauti Chile fast bitz zu goldig aber trotzdem schön. Gegenüber gits namel e Chile wo na viel goldiger söll si, die bsuechi denn es anders Mal. Es bitz störend isch de Lärm vode touristische Strass vorem Iigang... Ufem Heiweg liit denn schliesslich au no d'Basilica del Voto Nacional woni scho sitem erste Tag wett besichtige. Si ragt mit ihrne drü Türm ufeme Hügel über d'Stadt. Die Basilika isch no sehr jung, si isch vo 1883 bis 1924 im neugothische Stil baut worde. Sowohl d'Basilika selber wie au d'Ussicht uf de Türm isch sehr beidruckend und schön. Absturzsicherig wird in Ecuador übrigens ned ganz glich grossgschribe wie ide Schwiiz... De Weg uf de zentral Turm füehrt über e Stege, wo ned für all so eifach überwindbar isch. Es lohnt sich aber! Faszinierend sind di verschidenste Ziite ade Türm. Korrekt isch keini devo ^^

    Und au am Fritig derfemer üs mit neue unregelmässige Verbe beschäftige. Jetz sötteds aber alli si. Sind au nur öppe 150 woni no ned kenne... Am Namittag machi mi uf zum Parque Itchimbia, wo überraschenderwis ufeme Hügel liit. D'Gässli woni det here verwütsche würked zum Teil bitz verlasse, ned so das womer sett neh als Tourist aber janu... Dobe acho triffi en bluemeriiche und sehr ruhige Platz a. Do gfallts mer namel es bitz besser als im La Carolina. Schliessli findi dur Zuefall e verlassni Ussichtsplatform woni würkli mini Rueh chan gnüsse. Ufem Zruggweg flattered bimene Bächli sogar en Kolibri ume - min erste in freier Wildbahn 😍 Woni wett es Foti mache, merki, dass d'Kamera spinnt. Neustarte hilft ned und Google seit, i söll mi bimene Händler melde. Also gangi anstatt hei id Neustadt zum offizielle Sony-Händler. Das mitem umecho in Quito isch immerna schwierig. Es hät viel Büs, aber wele dasi mues neh ischmer es Rätsel. Also entscheidi mir wider für dä woni sicher weiss daser einigermasse id Nöchi fahrt. Denn sinds nume no 15 min zum laufe. Dummerwiis seit de Händer, dass si mir ned chönd helfe und schicked mi zumene Mech. Wo natürli 2 km i di ander Richtig isch. Also Abmarsch. Dete acho wird mer gseit, dases es Problem isch wo si 48 Stund bruched zums löse. Schad, ich hett d'Kamera eigentli am Wuchened brucht aber naja, wird au ohni klappe. Hoffe eifach, dasi si komplett funktionierend wider überchume am Mäntig... Nach dere einigermasse nerveuftribende Aktion gohts hei go esse, lerne und packe für de Wuchenendusflug.

    So langsam aber sicher hani mi sogar ad Grossstadt gwöhnt und weiss einigermasse, wieni klar chume und wies allgemein so funktioniert. Usser d'Büs natürlich 🤦🏻‍♀️ Und au s'Rede mit de Gastmuetter wird immer eifacher - do wirdi für s'Vocci büffle belohnt 💪😁    Read more

    See translation
  • TravelerLatinamerica: Ecuador
    Day 8

    Mindo día uno

    March 4, 2023 in Ecuador ⋅ 🌧 20 °C

    Das Wuchenend stoht en Zweitagesusflug us de Stadt use a - endlich Mal es bitz Natur... Mindo isch s'Ziel und bekannt als ruhigs Dorf im Regewald mit adrenalinriiche Aktivitäte und enere vielfältige Vogelwelt. Eusi Areis wird vomene komische Grüsch am Vorderrad vom Taxi unterbroche. Stellt sich bim Mech use, dass sich eifach nume en Draht verfange hät. Glück gha... In Mindo selber gits zum Empfang es Zmorge nach ecuadorianischer Art, was mir ehner würed Zmittag nenne... Nachher warted scho s'negste Taxi, wo eus zunere Seilbahn ide Hügel fahrt, wo üs denn widerum uf di ander Siite vom Canyon bringt. Atribe word d'Bahn selber bastled vomene Automotor... Uf de andere Siite acho, machemer en Regewaldspaziergang entlang vo verschidene Wasserfäll. Leider macht de Wald sim Name denn au alli Ehr und en regnet relativ lang zimli fest. S'Guete: irgendwenn simer eh pflutschnass und chönd au guet na go bädele. Es isch zwar chalt aber wunderschön 😍
    Au de Zruggweg mit de Bahn und hinde ufeme Pick-Up findet bi strömendem Rege statt aber das ghört wohl dezue... Zrugg im Dorf gits Zmittag (es isch 15.30 😂) und nachher entscheidemer eus für e Tour im Schoggimuseum. Es isch aber meh e Do It Yourself Prozendur mit Probiererlis zu verschidene Ziitpünkt - genial. Kakao isch übrigens guet für d'Huut! 🤭
    Denn gits na es bitz Shopping ide Touristelädeli und Znacht, bevormer inere Bar es traditionells ecuadorianisches Geteänk gönd go probiere. Dummerwiis häts niemer vo eus gern aber immerhin gsehts guet us...    Read more

    See translation
  • TravelerLatinamerica: Ecuador
    Day 9

    Mindo día dos

    March 5, 2023 in Ecuador ⋅ 🌧 20 °C

    De zweit Tag fangt miteme "normale" europäische Zmorge bi bester Ussicht begleited vom einte oder andere Kolibri a :)
    Nachher stoht de Bsuech vode "Marioposas de Mindo" a, de Schmetterlingufzuchtstation. Ganz schön schöön mit so vielne verschidene Schmetterling uf wenig Platz. Und mit bitz zeukle höckled denn au de eint oder ander Mal uf di eige Hand 🤭
    Direkt nebeddra startemer de Adrenalinteil vo hüt: s'Riverrafte. Im immerna füechte Badzüg vo gester (isch halt Regewald, do tröchned ohni de Föhn grundsätzlich nüt...) und mitere Rettigsveste höcklemer uf eusi Reife und los gohts. Es isch zimli sehr chalt aber macht genau so viel Spass und d'Ussicht vom Fluss us uf de Regewald isch fantastisch! Öppe so gfühlt bi jedem Wackle vom Boot hani Angst, dasmer öpper verlüred aber es chömed all heil dune a 💪
    Nach dem Abentür chömer im Hoster dusche, Zmittag esse und namel bitz chille und durs Dorf spaziere bevors scho Abschied näh heisst. Zwüscheddure hani immer mal wider es bitz Ziit gha zum um s'Hostel ume Kolibris beobachte. Muy bonita 😍
    Mitem öffentliche Bus nehmemer die 1'600 Höhemeter zrugg uf Quito in Agriff und erreicheds 2 Stund spöter au heil. Muesi nume na de richtig Bus zu mir hei finde... De richtig Perron hani bald gfunde aber wo 20 min spöter immerna kein Bus ume isch, entscheidi mi für e anderi Linie wo au sött funktioniere und öppe so all 4 min en Bus chunnt. Im Bus fanged irgendwie irgendwelchi Lüt a rede mit mir. Isch das guet oder schlecht? Ich weisses bis am Schluss ned. Mini Gastmuetter meint aber us mine Erzählige, dases wohl Lüt vom Typ guetmüetig gsi sind aber dasi glich immer söll ufpasse - ich weiss 😉
    Nachher sind wider Husufgabe und Vocci lerne agseit. Fertig sind die Churzferie ide Ferie 😅    Read more

    See translation
  • TravelerLatinamerica: Ecuador
    Day 11

    Quito sigue

    March 7, 2023 in Ecuador ⋅ 🌧 16 °C

    Zum Start i di neu Wuche gits zum Zmorge e Humita. Das isch quasi Mais mit Härdöpfel vermantscht und in Maischolbeblatt serviert. Isch super fein aber ehner chli gnueg für es Zmorge... Ich starte denn au inere neue Klass und mit emene neue Lehrer. Ich wirde es bitz upgraded 💪 Sus blibts bim alte, also konjugiere und Vocci büffle...
    Am Nami isch de Schuelusflug in botanische Garte im parque La Carolina. Eusen Guide vode Schuel verzellt vieles über d'Pflanze. Zemefassig: Tee chamer eigentli us allem mache ^^
    Nachem Park ziehts mi is nöchglegne Shoppingcenter. Mini Unterwösch isch kaput gange 🤷🏻‍♀️😂 Wirde schliessli fündig und chan mi mit guetem Gfühl uf d'Suechi nacheme passende Bus für de Heiweg mache. Erstuunlich schnell wirdi - glaub - fündig. 25 Busminute und e Unterhaltig mit fremde Lüt im Bus spöter chumi tatsächlich dehei a :)
    Eigentli hetti ja na wele mini Kamera go abhole, die isch aber no ned parat und s'Kafi mit de Mitschüelerin fallt au is Wasser - d'Höhekrankheit hät si verwütscht. Hoffentli blib ich verschont...
    Schwer beschäftige tüend mich mini Muggedtich vo Mindo. Si wend eifach ned ufhöre biesse...
    Znacht gits - achtung Überraschig - Riis, Härdöpfel, Bohne und Fleisch ^^
    Vorher und nachher hani Ziit zum Husi mache, Vocci büffle und bitz entspannt im dütsche Buech lese :)

    Am Ziistig gohts nach de Schuel zude "Mitad del Mundo", also zur Mitti vode Welt. S'riesige Monument stoht sit Ewigkeite dete und au sit Ewigkeite 240m nebedem tatsächliche Äquator. Zum Glück gits irgendwenn GPS zum das korrigiere... Mir bsueched s'Museum Intiñan, womer mit Fakte rund um Ecuador und de Äquator versorgt werde und schliesslich au es paar Äquatorexperiment ufem richtige Äquator mached. Es paar Fakte zemegfasst:
    - Ecuador heisst Ecuador wils ufem Äquator liit und es bedüted "glich wiit weg"
    - Quito heisst offiziell San Francisco de Quito
    - D'Uriwohner hend na Quitu gseit - de Buechstabe "o" gits bi ihne ned
    - Im Amazonasfluss sött mer ned brünzle. Es git Parasite wo dur das azoge werded und chönd i ein idringe - wääh
    - Meersäuli heissed do "cuy" wil d'Tön wo die Tier vo sich gebed öppe cuy mached
    - D'Erde dreiht sich am Äquator mit 1700 km/h
    - D'Aziehigschraft isch wege de Höchi do weniger starch. Mer isch in Quito öppe es Kilo liechter als sus
    - Es Ei ufeme Nagel zum sta bringe isch gar ned so schwirig. Au da hilft d'Höchi und ned de Äquator, wie vieli Lüt meined
    - Das mitem Wasser wo uf de nördliche Halbchugle im Gegenuhrzeiger und uf de Südhalbchugle im Uhrzeigersinn abflüsst, funktioniert dank de Colorischraft scho wenigi Meter vom Äquator entfernt. Ufem Äquator wird gar kein Strudel erzügt. Tornados und Zyklone dreihed sich au i unterschdilichi Richtige, je nach Halbchugle...
    - Mit zuene Auge ufem Äquator laufe isch schwiriger als sus wil bim lingge Arm ned di glich Chraft würkt wie bim rechte.
    Bei Fragen zur Physik dürfen Sie gerne Ihren Grundschullehrer fragen!
    Schliessli gohts mitem Bus wider e Stund zrugg is Stadtzentrum. I chan quasi bi mir dehei vor de Hustüre usstiege und mich wider as normale Abigprogram mache.
    Hasta pronto :)    Read more

    See translation
  • TravelerLatinamerica: Ecuador
    Day 12

    Papallacta

    March 8, 2023 in Ecuador ⋅ 🌧 9 °C

    Letst Nacht häts s'erst Mal richtig gregnet, jetz ischs aber wider besser. Am Morge heissts Badhose packe wils nach de Schuel uf Papallacta id Therme goht. Mit zwei Autos wo vo zwei Lehrer gfahre werded machemer eus uf de Weg. Währed de Fahrt isches no verregnet aber 1.5 Fahrstunde östlich vo Quito isches denn troche. Mir gnüssed es usgibigs Zmittag im Resti und ich wages tatsächlich, zum di lokal Forelle bstelle - isch gar ned mal so schlecht wemer ignoriert, dass si mich na aluegt währedem esse :)
    Bevors denn würkli id Therme goht, machemer entlang vom Rio Quijos en chuze Spaziergang, wo eus de Schueldirektor es bitz öpis zude Pflanzewelt verzellt. I dem Bach lebed übrigens au Forelle. D'Landschaft, Pflanze und au Tierwelt isch da im Voramazonasgebiet scho wunderschön. D'Pflanze werded do obwohl mer uf 3400 müM sind dank em viele Suurstoff ide Luft au scho grösser als wiiter westlich. Ab und zue zieht au de Nebel uf, so dasmer uf de Vulkan Antisana gsehnd, wo für s'warme Wasser im Bad verantwortlich isch. D'Engelstrompete gits do in verschidene Farbe. Wenn z'Ecuador ide Nöchi vomene Wohnhus Engelstrompete wachsed, bedüted das Glück ide Familie. Ide Nöchi vom Büro es guets Gschäft. I andere Länder z'Südamerika wird si aber als Droge brucht...
    So gege di sechsi simer wider zrugg und parat zum im Bad entspanne. Verschideni Becki mit unterschiedliche Wassertemperature und Sprudeldinger sind für das genau richtig. Die zwei Stunde bis s'Bad schlüsst gönd viel z'schnell dure... Tüfeentspannt gömer uf d'Heifahrt. Und dete passierts - euses Auto verwütscht es Schlagloch und mir hend en Platte. Selber wechsle chömer ned, s'Werkzüg fehlt wil als Diebstahlsicherig spezielli Schrube verwended werded. Au euse zweiti Fahrer (wo erst nach 25 min wider da isch wil er vorusgfahre isch und erst nach 15 min wider Netz gha hät zum eusi Nachrichte empfange) chan au ned helfe. Also bstellemer de Pannedienst. E Stund spöter stellt au er fest, daser ned chan helfe wechsle, also werdemer nach längere Diskussione über kei Ahnig was ufglade und zrugg uf Quito gfahre. Zwei Studis und d'Lehrerin hinde obe ufwm Abschleppwage im Auto und de Rest im andere Auto. Churz vor Quito packemer au di andere zwei na bi eus in Kofferruum damit all chönd heigfahre werde. Mit 2.5 Stund Verspötig bini schliessli müed dehei. Was macht mer übrigens währed so lang uf Hilf warte? Richtig: umesta, Spass ha, probiere Helfe und Huusufgabe erledige :)    Read more

    See translation
  • TravelerLatinamerica: Ecuador
    Day 14

    Dos días de clase (casi) normales

    March 10, 2023 in Ecuador ⋅ 🌧 16 °C

    De Donstig isch en lernintensive Tag. Müed wege de churze Nacht (di erst woni ned ganz so guet schlafe) überstömer d'Schuel doch souverän. Zum Zmittag gangi mit zwei andere Studis id "Neustadt". Sie wohned dete und ich chas grad mit Kamera abhole verbinde - endlich hani si wider. Nach 20 Sekunde im Lade hani si ide Finger, nach 2 Minute zahlt und denn duureds aber namel 20 Minute bis si endlich e Quittig parat hät und ich wider chan go... So richtig tested hani ned ob alles lauft aber wird scho passe und sus weissi ja wo de Lade stoht. Dehei muesi s'erst Mal wäsche und legge en intensivere Lernabig here. Aus das mues Mal wider si weni würkli öpis wett chöne nach de Schuelziit...

    Am Fritig machemer für de Obig ab zum es Bierli go trinke. Oder meh, je nachdem. Vorher wetti endli mal e Rundi go jogge und luege wie das so isch uf 2800 müM. Fazit: sehr astrengend! Dasi siteme Monet nüm gsi bin und Quito sehr hügelig isch, hilft au ned grad aber hät guet tue :) Denn hani na Ziit zum bitz büffle bevors bi wiiterhin sehr spontan wechselndem Wetter id Stadt goht. Ich bi pünktlich es paar Minute z'spoht bide abgmachte Bar. Für ecuadorianischi Verhältnis isch das würklich pünktlich! Und nach wiitere 20 Minute chunnt denn au de Rest mal na aztrudle - danke für nüt ^^ D'Bar beinhalted unter anderem en Ruum wo e Kapelle isch oder gsi isch - intressant. Irgendwenn wemer wiiter ine Karaokebar. Die hät eigentli scho fast zue, macht aber für eus namel uf und schliessli chömemer au na Gsellschaft über vones paar Hostelmitbewohner. So wirds en lustig Obig wo mitere churzwiilige Taxifahrt bis vor d'Hustüre endet 🥳

    P.S. S'Wetter wird ide Nacht ned besser und isch für di ganz Wuche zimli regnerisch prognosdiziert :/    Read more

    See translation
  • TravelerLatinamerica: Ecuador
    Day 15

    Un sábado muy lluvioso

    March 11, 2023 in Ecuador ⋅ 🌧 14 °C

    Es regnet in Ströme. Mini Idee zum go wandere wird also verschobe...
    Bim Zmorge lerni min neue Mitbewohner kenne, wo denn abem Mäntig au d'Sprochschuel macht. Nachher isch Vocci lerne ufem Plan und gliichzitig zum Fenster useluege und s'düstere Wetter "bestuune". Vorem Mittag beschlüssi, dasi is Museo de la Ciudad gange, wo sich imene ehemalige Spital befinded und d'Stadtgschicht vo Quito erklärt. Ufem Weg machi Halt bim Italiener - ich bruche unbedingt mal wider Pasta! D'Portion isch denn tatsächlich so gross, dasi ned alles mag... Und denn gohts los is Museum. Es isch super guet gmacht aber leider sind alli Infotafle nur uf Spanisch. Theoretisch verstohni s'Wichtigste, es isch halt eifach super astrengend zum lese. Nach zwei Stunde hani s'Gfühl bini dure mitem Rundgang und au s'Hirni mag nüm. Theoretisch wäri jetz gern ine Tanzstund mit de Jaclyn vode Schuel aber si liided immerna wege de Höhechrankheit. Di lockerer Alternative isch en Secondhandbuechshop womer bitz umelueged. Bis sie plötzlich völlig überstürzt wett go. Stellt sich use, dass de Grund defür de Bsitzer isch, wo zimli sicher e ned sehr tolli politischi Istellige z'ha schiint. Wases uf sich hät, erklärt mer d'Jaclyn inere 20 minütige Gschichtsstund über amerikanischi Bürgerchrieg und so. Zum Uskling gömer schliessli ines Kafi ide Nöchi und gnüssed e heissi Schoggi, e Empanada und en lokale Drink namens Canelazo.
    Schliessli chumi au hüt dank Uber sicher dehei a :)    Read more

    See translation
  • 2024© FindPenguins
  • Home
  • About us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice
  • English