Hola Otavalo

Pünktlich bini parat zum mit allem Gepäck abgholt werde. De Direktor warted dusse scho, was ich aber ned weiss, also wart ich dine au. Schliessli merkemer das irgendwenn und finded eus zum d'Tamara abhole und in Richtig Busstation losfahre ^^ Dete verwütschemer grad en Bus wo eus i 2.5 Stund Fahrt uf Otavalo bringt und 2.72 Dollar pro Person chosted. Schön billig isch au schön. D'Fahrt füehrt eus dur e Gegend wo vo Canyons, Hügel und Vulkän prägt isch - wunderschön :)
Ade Endstation wartemer uf eusi Gastfamilie, wo anschinend mitenand verwandt sind. Fast wie dehei 🤣 Nach es paar Minute chömeds um de Egge und schlönd grad vor, dasmer direkt zeme zude andere Familie hei gönd und vo dete us mit de andere Studentin wo scho do isch d'Laguna Cuicocha bsueche. Han sowiso det here wele aber hett ned denkt dases so schnell goht. Mini Gastmuetter nimmt mis Gepäck mit hei so dasi grad mit de adere Familie mit zum Vulkan chan. Läuft :)
Uf de Krete obe spazieremer bi grandioser Ussicht so wiit, bis di ander Studentin, d'Anita, nüm mag. Si chunnt us Australie und isch sich no am ad Höchi gwöhne ^^ Nacheme Empanada nutzemer d'Möglichkeit zum miteme Böötli e Rundi um d'Insle im See mache, was schön, chalt und beidruckend isch. De Captain verzellt vode Pflanze und Tier im Naturschutzgebiet und natürli au vom Vulkan. Er isch aktiv, wasmer sehr guet ade Blöterli im Wasser ekennt, wo dur Gas im Vulkaninnere entstönd. Zur Beruhigig vo eus allne: de Vulkan wird geotechnisch überwacht. Dodezue würi natürli gern meh wüsse aber mis Fachspanisch langed glaub ned ^^
Aschlüssend gömer z'Cotacachi go Znacht esse. Ufem Weg det ane findemer vode Gastmuetter dur Zuefall use, dass d'Schuel z'Otavalo während Corona gschlosse worde isch. Wo dasmer jetz Schuel hend? Bi ihre dehei natürlich! Wieso dass mir das ned gwüsst hend? Kei Ahnig, sus hetti ned gseit dasi ned am gliche Ort wett wohne wie d'Tamara... Mir isch ja egal wie dass d'Situation isch, aber kommuniziere chönnt mers ja richtig... Naja, egal. Bi mir gits zum Znacht es mit Mozarella überbaches Pouletbrüstli. Fast wie Cordonbleu, eifach mit meh Chäs - muy rico! Nachher hämer na Ziit zum bitz im Städtli spaziere. Es isch bekannt für d'Lederbearbeitig und dementsprechend viel Lädeli gits dezue. Ich la mi nume vomene ned ledrige Bag verfüehre :) Denn gahts mitem Bus zrugg uf Otavalo und zude andere Gastmuetter, also au id Schuel dementsprechend 😂 Dete wirdi vo minere Gastfamilie, bestehend us Eltere und zwei ungefähr Primarschuelchind abgholt und gseh denn au endli mal wo dass ich wohne wirde. Ich übernime s'Chinderzimmer, d'Chind schlofed im Elterezimmer respektive bide Tante en Stock wiiter une. Ob ich mich störend fühle? Ja, ganz churz aber si macheds ja freiwillig... D'Familie an sich macht sus en super nette Iidruck. Zimli müed vo dem ereignisriiche Tag ziehni mi i "mis" Zimemr zrugg, schribe ganz viel Blog und schlofe einigermasse früeh :)

Oh und übrigens isch d'Anita au no ei Wuche ide Schuel und wett nachher in Amazonas. Isch sehr guet möglich, dass si i di glich Lodge wie ich chunnt :)Read more