Sobre Quito

Es paar "cosas extrañas" über Quito:

Iiwohner gits zwüsched 2 und 5 Millione, je nachdem wer mer frogt. Ob das devo abhangt wie wiit ume dasmer d'Stadt no zu Quito zellt, wie viel Obdachlosi gschätzt werded oder sus öpis weissi ned...

Flach gits ned i dere Stadt. Si isch imene Tal zwüsched zwei Berg- resp. Hügelzüg baue. Mer lauft grundsätzlich entweder ufe oder abe. Und da isch uf 3000 m.ü.M. einigermasse astrengend.

Es git ganz viel Strasseverchäufer wo di wend vo ihrem Züg überzüge. Am afang ischs müehsam, denn ignoriert mers mit schlechtem Gwüsse und irgendwenn bemerkt mers scho fast nüm 🙈

Busfahre (de einzig ÖV ide Stadt):
- Es git ned würkli en Fahrplan. Mer stoht ad Bushaltestell, warted und hofft. Vorallem am Sunntig fahred ned all Büs...
- Es git verschideni Busarte. Di einte ersetzed d'Metro wos no ned git und sind einigermasse logisch. Di andere fahred chrüz und quer dur d'Stadt wie normali Büs. Ade Haltestelle gits denn au Linieplän vo de meiste Linie. Zum usfinde weli Haltestell di best isch chan Google helfe, mues aber ned...
- Dass d'Bustüre währedem fahre offe sind schiint recht normal z'si ^^
- Abgasfilter kennt mer do ned 😷
- Meh blinkendi Liechter (ine und usse) bedüted meh besser. Jede Busfahrer hät sin eigne Bus woner chan so usstatte wiener wett
- Ei Fahrt ide Stadt chosted 35 Cent, egal wie wiit dass si isch
- Es git nume zwei Tempi: Vollgas und Vollbremse
» Zum Glück gits au na Taxis und Uber zum vo A nach B cho

Eifach mal an Strosserand brünzle isch normal...

Wenn en Tag lang ned vo Iheimische agsproche wirsch, isches scho fast d'Usnahm ^^

Und jetz na zur Sicherheit:
- Sobalds dunkel isch, isch niemer elei dusse unterwegs. Au kei iheimischi Männer, sogar die fühled sich ned wohl. Das isch erst dur Corona so worde und vorher no ned sones grosses Problem gsi
- Wertsache ide Öffentlichkeit bruche und zeige isch wege Diebstahlgfahr kei gueti Idee. Drum gits au ned soo viel Fotis. Ich han nie Problem gha oder öpis beobachted aber jede woni gredt han demit hät scho betroffni Lüt troffe...
- Wemer sich a die beide Regle halted chunnts glaub ned so schlecht. I has amel guet überstande :)

Es git sehr vieli cooli Graffitis :)

Verhältnismässig gits viel Pärk, Grüenstreife und allgemein Bäum ade Strosseränder. De Verchehrslärm und die dreckig Luft werded dur die aber leider ned wettgmacht.

So, ich glaube das isches. Quito hät viel zum entdecke, feini Empanadas, glamourösi Chilene, beidruckendi Ussichte und guets Bier. Nach drü Wuche bini jetz aber trotzdem froh, dasi ine chlineri Stadt chan, womer au mal mit guetem Gwüsse nach Sunneuntergang na chan dusse si :)Read more