Adiós Otavalo

Theoretisch wär jetz usschlafe agseit aber es isch bald mal z'hell defür und so heissts ufsto und warte bises Zmorge git. D'Ziit nutzi namel zum mini Route plane. Ha ghöre sege über Ostere sött mer möglechst a eim Ort blibe wil denn ganz Ecuador am umereise isch. De Ostermäntig wird do übrigens gar ned gfiired. Debi wär doch das de wichtigst Tag...? Egal, ich han uf jede Fall en ungefähre Plan für mini Ziit bis am 24. April s'Flugzüg uf d'Galapagosinsle abhebe wird. Zmorge gits hüt ecuadorianisch, also mit Riis, Ei und Würstli. Nachher gangi namel e Rundi go renne, mues mer ja s'Zmittag irgendwie verdiene und bitz hunger übercho. Nachher gilteds endgültig ernst mit packe. Dank dem fette Pulli vom Märt wird de Platz scho langsam knapp aber es passt grad na 🙈 Zeme mit de Familie gangi id Stadt go ecuadorianisch Zmittag esse. Es git Fleisch, Härdöpfeltätschli, Spiegelei und Salat. Und kei Riis..! Gesse wird nume miteme Löffel und alles, was d'Schwiizer würed schniide, nimmt mer do eifach id Händ und biesst ab 🤷🏻‍♀️ Denn gömer dehei go Gepäck hole. Für uf de Weg macht mer d'Pepe na es Sandwich, Frücht und Fittas parat. Wär ned nötig gsi aber danke! Nachher wirdi an Busbahnhof gfahre, wos Abschied neh heisst. Mini Gastfamilie wett na gern wüsse, wenn dasi mit Maa und Chind uf Bsuech chume. Kei Ahnig, und wenn chömed si id Schwiiz? 😂
Und do höckli jetz im Bus (wo im Stau stoht) ufem Weg zrugg uf Quito. Dete fahrt hüt Obig na de Nachtbus los in Richtig Amazonas. Ab morn morge bini also im Regewald unterwegs. Freu mi riesig uf das. Ha ghört es segi sehr eifach zum Totechopfäffli und natürli vieli anderi Tier finde 🤗Read more