Laguna de Mojanda

Hüt isch de Wecker früeh gstellt wil de Plan isch zum go wandere. Dummerwiis regnets aber au am Morge na und mir seged drum das ganze ab. Zmögele tueni aber trotzdem mal wil alles scho extra parat isch... Nachher hanis na bitz gmüetlich i mim Bett bis plötzlich s'Telefon chunnt, dass di andere zwei glich wend go wil s'Wetter grad viel besser worde isch - also los. 30 min spöter höcklemer im Taxi, wo eus über e zimli alti und schlecht unterhaltnigi Strass zude Laguna de Mojanda bringt. Dobe hämer kei Handyempfang und au ned viel Lüt, drum entscheidemer eus dezue, dass de Taxifahrer eifach söll 3 Stund uf eus warte. Ide Schwiiz unbezahlbar - do chosteds eus 35 Dollar für alles :)
Während ide Stadt d'Sunne no gschune hät, simer ufem Ufeweg i dichtem Nebel gsteckt und jetz da obe isches eigentli wider ganz vertrettbar mit de Sicht und im Moment regneds au ned. De Gipfel striichemer aber, det obe häts Wulche. D'Alternative isch entlang vode erste Lagune spaziere und denn zude zweite abzwiege. Mit de Wulche isch d'Stimmig sehr mystisch und mir gfallts au dank de Menscheverlasseheit super :)
Bide zweite Lagune treffemer zwei Sache a: Chüeh und zimli starche Rege und drum blibemer au ned lang. Di erst Lagune isch eh schöner ^^ Ufem Zruggweg häts schliessli denn scho rechti Bäch und Tümpel im Weg und ab und zue müemer bitz nacheme mögliche Durchgang sueche aber es klapped ohni grösseri Usrutscher. D'Schueh sind nachher eifach meh brun als blau aber das chamer ja butze. Es chömed eus au na zwei Jeeps entgege, wo die sehr löchrig Stross bestimmt mit viel Vergnüege hinter sich bringed. Chum simer zrugg am Startplatz, fangts wider a regne und mir sind froh, dasmer en Unterstand hend zum Zmittag esse - mit bester Ussicht uf de Bergsee :)
Nachher nimmt eus de Chauffeur wie versproche wider mit. Unterwegs wür en Indigene gern zuestiige aber de Taxichauffer meint, ahalte segi ab und zue sehr gföhrlich wil nie weisch ob denn na meh Lüt uftauched und di usraubed. Und au do durelaufe segi ned sone gschiidi Idee. Faszinierend... Zrugg dehei plani mini Witerreis z'Ecuador es bitz, gnüsse e erholsami Duschi und mache mi denn mit de Anita zeme uf Magnetlijagd. Am Samstig isch amel z'Otavalo de gross Märt und mir verwütsched grad na di letste Ständ devo zum bitz Touriste spiele. Au sie brucht für de Amazonas no s'eint oder ander und so suechemer zeme verschideni Sache. Und finded natürli alles! Nachher gangi wider hei und fange mal a packe bevors Znacht git. D'Pepe hät all mini Chleider gwäsche - danke 1000! Und au choche chan si definitiv sehr guet 🤗
Nachem Znacht gömer denn na all zeme ine Bar ide Stadt. Sogar d'Tochter chunnt mit wil si kei Lust hät zum bide abuelita go schlofe. Obs ide Bar ufem Bänkli echt bequemer isch? Han si ned gfroged nachher... D'Stimmig isch bitz müed, bi eus allne isch bitz d'Luft dusse 🙈 En "Ufsteller" isch d'Tamara wo "endli mal das Traditionsgetränk Michelada wett probiere". Ich han ihre gseit dases nüt guets isch, ich hegis z'Mindo probiert. Si bstellts trotzdem und bereuts zimli schnell. De Darío und Pepe hends aber gern. Vilicht bruched mir Fremde eifach meh Ziit zum eus a das salzige Bierding z'gwöhne 🤣
Sehr müed simer schliessli irgendwenn nach Mitternacht dehei und ich legge mi es letsts Mal i mim Privatzimmer is Bett :)Read more