Amazonía martes °1

Usgschlofe aber mit na ganz wenig Chopfweh isch am Morge am 06:15 Tagwach. Mir started mitere churze Boottour flussabwärts und gsehnd folgendi Tier:
- Monk Sapi
- Marching Vasps. Die heissed so wils bi Gfahr alli zeme im Rhythmus mit ihrne Flügel schlönd und dur das töned wie e amarschierendi Herde Soldate
- Nachtaffe, wo zumene Baumloch use güggsled
- Eisvogel
Nachher währedem Zmorge gits e Unterbrechig, wil eine vode Mitarbeiter e Falschkorallenattere im Camp gsichted hät womer eus ned wend entgo lo! Crazy Tier mit sine rote Streife. Giftig isch das Exemplar aber ned. Bis zum Zmittag gömer z'Fuess de Dschungel go erkunde. Debi lernemer, dass sehr viel Pflanze für Medizin chönd verwendet werde. Weli genau für was weissi natürli nüm aber es git gege alles öpis: Schlangebiss, Insektestich, Gripp, Entzündig und so wiiter. Denn gits au na s'eint oder ander Blatt wo als Gwürz oder sus zum choche brucht wird. Eis schmöckt bim drufbiesse wie Chnobli und de Gschmack blibt denn au bis zum Zmittag ^^ Vieli vode Pflanze sind für eus Fremde unagnehm wemers berüehred, eigentli wie Brennessle, eifach halt potenziell au schlimmer, drum wird eus streng empfohle zum ned eifach Züg alange solang de Guide ned gseit hät dases okey isch und immer langärmligi Kleider träge. De zweit Teil isch bim füecht-heisse Klima nume so halbe lustig aber wemer sichs gnauer überleit, chunnts gar ned mal drufa. Schwitze tuetmer sowieso... Au Tier findemer wider. Hauptsächlich Gekräuch und Chäfrigs. Nach langer Suechi und verfolge vode passende Rüef findemer wiit obe ide Baumchrone en gelb-blaue Ara - eine vode schönste Vögel wos da git. Zum würklich öpis erkenne brucht mer entweder am Guide sini Superfeldstecher oder am einte Tourteilnehmer sini krass Vogelkamera. Ich gseh de Ara dur beides :) S'Orientierigsgfühl isch nach dere Aktion so zimli verlore aber he, mir hend ja en Guide wo do jede Pfad kennt (und eus au scho es paar Gschichtli vo verlorene und zum Teil erst nach es paar Täg wider gfundene Gruppe verzellt hät ^^). Au speziell sind d'Blattschniiderameise. Si sammled Blattteili und bringed die über Highways i ihren Bau, wos denn d'Blätter als Heizig für ihres Pilzsystem bruched. Ufem Zruggweg merkemer denn na, wieso dasmer ide Gummistiefel unterwegs sind. Es wird zimli matschig 😅 Chum simer zrugg im Camp und essed Zmittag, öffnet de Himmel sini Schleuse und es schiffed richtig. Das mitem Timing chömer so wiitermache :)Read more