Amazonía martes °2

Womer zwei Stund und es paar Rundene Uno spöter wider is Kanu höckled, regneds nume na wenig. Bi richtig schönem Wetter wäremer zude Lagune - so wies jetz aber isch machemer e churzi Rundi und gönd defür vorem Znacht na ufen Nightwalk. D'Rundi mitem Kanu bringt Schwarzrückentamarine (black mantled tamarin), en Wiessbrusttukan und verbiflügendi Iisvögel mit sich.
Ide Nacht chamer dank de reflektierende Auge mit de Taschelampe einigermasse eifach Tier finde. Nume wenigi Meter vode Hüttene entfernt stossemer uf e Schlange, e zimli grossi Vogelspinne (tarantula), und es paar Insekte. Zum Glück hani es Moskitonetz womi vor all dem schützt ide Nacht... Und en Kolleg vode Sprachschuel wo letst Wuche im Amazonas gsi isch, hät mer de Tip geh, dasi eifach kei Angst söll ha, sus chanis ned gnüsse. Und mit dem häter wohl recht... Tüüfer im Dschungel findemer meh Insekte, Frösch, en Skorpion und ich erblicke schliessli au na es Paar Auge wo andchiinend zu dene herzige Nachtaffe ghöred 😍 Am beidruckendste isch de Moment, womer alli eusi Taschelampe abschalted und en Moment in kompletter Dunkelheit erlebed. So sind die ganze Tierrüef na viel intensiver! Ich bi denn aber gar ned mal soo unglücklich womer wider Liecht hend... Beidruckt und hungrig chömemer zrugg id Lodge und gnüssed es wiiters feins Esse - hüt gits Lasagne. Nachher verwiilemer na alli zeme am Tisch und reded über Gott und die Welt. Debi chunnt au Augmented Intelligence zur Sprach und ich denke mal wider en churze Moment as schaffe, was sus würkli ned sehr hüfig passiert :) Irgendwenn merkemer, dasmer alli sötted go dusche bevor am 10ni de Strom - und somit s'Liecht im Bad - wider abgstellt wird. Mir hend öppe 5 Stund am Tag Strom vomene Generator, di restlich Ziit lauft alles ohni. Si hetted eigentli Solarpanels für de ganz Tag aber die sind de höche Belastig dur Füechtigkeit zum Opfer gfalle und de Generator isch e unagnehmi Lärmbelastig, drum wirds möglichst reduziert. Ich find das toll :) Mini Dischi findet unter de Beobachtig vonere ned mal so chliine Echse statt ^^ Denn isch wider schlofe agseit wil au morn Morge warted wider de Usflug vorem Zmorge. Danke - mir gfallts :)
Oh und es isch übeigens au am 10ni na super warm und füecht 🥵Read more