Amazonía miercoles °1

Au hüt morge regnets ned und mir chönd de Tag mitere Rundi ufem Kanu starte. Chum simer richtig ufem Fluss hämer uf beidne Flussiite vo Möncheaffe und Schwarzruggetamarine zum beobachte. So macht de Start in Tag Spass 😍 Nebst dene Affefamilie sind hüt am Morge au allerlei Vögel sehr aktiv, z.B. de Riverside Falke, verschideni flügendi Tukans und de Rotkopfkardinal.
Nachem Zmorge stoht de Bsuech binere iheimische Familie vom Volk Siona a. Ufem Weg det here entdeckemer grad bim Iistig namel Totechopfäffli, unterwegs e Schwarzchopfschlange, wo sich anschiinend grad uf ihri Hütig am Vorbereite isch und au wider vieli Vögel, unter anderem eine vo 5 Iisvogelarte 😊
Churz vorem Alegge bide Iheimische entdeckt de Rom e Frucht, womer für Tatoos chan bruche. Mir riibed eus mitem Fruchtsaft i und sind gspannt, wie dunkel und intensiv dass d'Tatoos wohl werded... Bide Familie erwart ich eigentli öper wo eus abholt oder so, aber es isch meh so gmacht, dasmer eifach au dete sind und ihres Lebe ganz normal wiitergoht. Mir werded mitere ältere Dame zeme Zmittag choche. Es git quasi Faijtas und s'Brot dezue stellemer selber us de Yukawurzle her. Di verschidene Schritt defür sind ernte, wäsche, raffle, tröchne mit Hilf vonere Vorrichtig zum alles uswinde (es blibed debi nume 5% vode Füechtigkeit erhalte) und denn wie e Omlett abrötle - ganz schön ufwendig... Währeddesse erfahremer Sache über s'Lebe do. Gredt wird i ihrere eigne Sprach, wo für mich tönt wie es Gmisch us Chinesisch und Französisch. Die paar Sätzli womer zeme lerned hani relativ gli scho wider vergesse 🙈 So zruggblibe wie mer vilicht wür denke, lebed d'Lüt do aber ned. Si lerned alli au Spanisch und d'Chind au Englisch, träged ganz normali Kleider und hend Strom. D'Chind mached d'Grundschuel innerhalb vom Volk und gönd für de Rest denn id Dörfer usserhalb. Zum sich das Lebe mit de modernere Sache chöne leiste, schaffed viel Lüt mit de Lodges zeme als Guides, Kanufahrer oder Lodgemitarbeiter vor Ort. Au s'tröchne und de Verkauf vo Kakaobohne bringed bitz Geld i. D'Fraue choched mit de Gäst und verzelled vode Kultur und stelled Schmuck zum Verkauf her. D'Bändeli sind us Palmbaumfasere gspindled und d'Chrälleli sind Kerne vode verschidene Bäum. Das mitem Bändeli mache probieremer selber us und es klapped sogar zimli guet 💪 Au es Apéro gits na, bestehend us Zapote (irgendemene sehr fettige Fleisch), Yuka-Chips, Banane-Chips, Madroño (kocheti Maronni) und iheimische Frücht. Schliessli isch s'Zmittag fertig und mir gnüssed das Yukabrot zeme mit mitbrachter Füllig - mmmh. Zum Dessert gits Bananefläde, wo zwüsched zwei Palmblätter überem Füür zuebereited worde sind. D'Tatoos werded übrigens immer stärcher. Si sölled öppe 2-3 Wuche sichtbar blibe und denn wider verschwinde - wasi au schwer hoffe wil sooo schön ischs ned worde ^^Читать далее