Reset search
Apulien
  • Sandra K.

Apulien

Mit dem Zug nach Puglia. Read more
FollowInsightsCalendarShareShareBucket list
Newest first
  • Trip start
    May 16, 2025
    Sandra K.ApulienTraveler

    Zugfahrt nach Brindisi

    May 16 in Switzerland ⋅ ☀️ 17 °C

    Am 07.15h isch de Bus vor de Huustür mit 2 Minute verspötig😉abgfahre. De Zug hed üs de uf Goldau brocht wommer üs es zMorgekaffi gönnt händ um de punktgnau as richtige Ort zstoh damit mer de Zug uf Milano chönnd näh. Vollbepackt ischs ned lustig vo Wage zu Wage zlaufe. zMilano simmer pünktlich a cho und händ im übervolle Bahnhof en Stund Ziit gha zum usefinde wo üse Zug fahrt. Das weiss do niemmert im vorruus. Alli stönd vor de Tafele und wartet gspannt bis ihre Zug ufgführt isch und de springt wieder en Hordi devo. Isch amüsant gsii. Mir händ üses Plätzli gfunde und die wunderbari Zugfahrt, dur Städtli, wunderschöni Landschafte und sBeste....am Meer entlang mit mega Wälle... gnosse. Vor Brindisi hännd üsi Zugnachbere rundume sich no überbote um üs Tipps zgäh was mer in ihrem schöne Apulien sölled goh a luege. So lieb. Nachere holprige Kofferfahrt simmer i üsem wunderbare Zimmer, wo mer jetzt 2 Täg bliebed, acho und händ üsi alte Chnoche no im Sprudel sich loh erhole und sind jetzt scho gspannt was morn do z'entdecke gid.Read more

    See translation
  • Sandra K.ApulienTraveler

    Brindisi... laufe.. laufe... laufe

    May 17 in Italy ⋅ 🌙 14 °C

    Nachdem mer fein zMörgeled händ, verrusse imene Kaffe, simmer in Hafe abe glofe. De Stefan hed scho bald uf diesere Ufersiite en grosse Turm gseh und gfunde,,, chuumm dit änne laufed mer. Es Abendtüür.. wells ned eifach gsii isch uf die anderi Siite zcho. Lang kei Brugg und ganz vell Militärsperrzone. Mir händs de aber scho gschafft. Es isch es Idrücklichs fast 70m höchs Monemänt mitere 10 Tonne schwäre Madonna fast zoberst drufe. Unde heds en Krypta in Form vomene Schiff. Es söll a alli verstorbene Seefahrer erinnere, wo im erste Wältchrieg gstorbe sind. Alli Näme sind ufgführt.. die vom 2. Wältchrieg sind de au no dezue cho. Spannend gsii. Zrugg hämmer zum Glück en Fähri gfunde... uff. Nacheme feine zMittag hämmer süscht no es paar spannendi Kathedrale und no en grossi Süülle bsucht. Die Süülle zeigt sÄndi vo de Via Appia (DStross vo Rom uf Brindisi frühner). Brindisi isch frühner dVerbindisstadt zum Oriänt gsii. Nachere usgibige Siesta simmer ines härzigs Strössli goh Aperöle. Das Gässli inklusiv em super guete Sänger, hämmer gester mit üsne Koffer im schlepptau, scho entdeckt. Hüt hämmers usgibig zum Aperöle gnosse und händ im tolle Sänger vell Applaus und Trinkgäld dite gloh. Nacheme Schlummertrunk am Hafe gids jetzt nochli ESC. Nach 23000 Schritt isch mol gnueg, sött jo mis Knüü chlii schone.Read more

    See translation
  • Sandra K.ApulienTraveler
    1

    nomol Brindis

    May 18 in Italy ⋅ 🌙 18 °C

    Gester Obig isch dStadt mega hektisch gsii mit ere Demonstration (obwohl bim nöcher hiiluege sind Chind mitglofe und ganz vell Rägebogefahne, und es isch um de Friede gange im NaheOste) . Und ganz vell Teenagers und Chind sind useputz gsii... irgendwo isch öppis los gsii. Hüt isch das ganz anderst gsii...ganz viel Familie sind gsunntiged unterwägs gsii und am Morge hed dStadt a de meiste Ort no gschlofe... ussert i üsem zMorgekaffi. De Stefan hed wieder krach gha mit sim Schoggigipfeli und so simmer nomol zrugg goh Chleider wächsle🤣🙈de hämmer no es paar Gässli erkundet und sind no is archelogische Museeum. Das chost ned mol öppis und nur scho sGebäude isch spannend gsii. De räst vom Tag isch mit feinem ässe (us versehe mol Sushi🤣) Siesta und nomol spaziere usgfüllt gsii. Am Schluss sinds natürlich wieder viel zviel Schritt gsii... zum Glück hämmer die Sprudelbadwanne.Read more

    See translation
  • Sandra K.ApulienTraveler

    Ankunft Polignano a Mare

    May 19 in Italy ⋅ ☀️ 21 °C

    Am Mäntig hämmer usgschlofe, packt unds zMorge im Zimmer gässe und scho isch de Fahrer cho wo üs a Flughafe brocht hed. Nach chlii durenand simmer de vorem richtige Schalter gstande. De Fahrer heds chli zu lieb gmeint. De blaui Corsa isch super. Fahrt sich zackig... de chunnsch do mit im Verkehr. Ich findes zwar sehr human wies do fahred. Nach knapp 45 Minute simmer scho in Polignano a Mare gsii und sind zerst mol as Meer goh zMittag ässe. Sehr en lustige Wiirt wo au ab und zue no heimlich en Schluck Wii gnoh hed ab de Fläsche🤣🤣. In Polignano a Mare simmer grad Schockverliebt gsii. Lueged die Bilder a😍... händ zwar no ned vell gseh... aber das❤️. Nachdem mer sAuto doch wieder gfunde händ simmer zu üsem tolle Airbnb gfahre wo en richtigi Perle isch. Völlig abgschottet i de Natur (mit Meersicht) aber i 2 Minute zFuss amene super traumhafte Strändli und au guet fuessläufig zum Städtli. Nachdem mer de Strand erkunded händ und im nöchste grosse Lade Grossichauf gmacht händ, hämmer de Obig mit eme Plättli und Grodino lo usklinge. Morn erkunde mer de sStädtli. 🎉🎉Read more

    See translation
  • Sandra K.ApulienTraveler
    111

    Polignano a mare, Ostuni & Stella Beach

    May 20 in Italy ⋅ ☁️ 24 °C

    Ich weiss gar ned wo afange... soviel erläbt....am Zistigmorge hed de Stefan usgschlofe und ich bin nomol as Meer. Es isch en herrlichi Morgestimmig gsii und ich ha echli de Fischer i ihrne hübsche Ruederböötli zu gluegt. Eine hed mich zwar grad gnärvt weller sini Zigi is Meer gschmisse hed... ja das isch au chlii min Minuspunkt a Puglia. Sie tränned brav alles aber mer gsehd sehr vell Güsel und Plastik i de Natur... Schade. Nachem zMorge simmer de richtig Altstadt marschiert... es isch sooooo schön...ha glaub 1000 Föteli gmacht... aber das wüssed hald au no ganz viel anderi Mänsche🤣irgendwenn hämmer de chlii rueh bruucht und sind zrugg glofe, um de am Obig, sDörfli über ne neue Wäge wieder wiiter goh zErkunnde und fein goh zNacht ässe. Es hed so viel hübschi Winkel..😍😍😍.mer händ ganz ganz viel Schritt gmacht🙈. Hüt simmer richtig Ostuni gfahre. Am Afang hämmer echli die falsch Richtig verwütscht und händ wieder müesse zrugg laufe. Damit sned wieder vell zvell Schritt gid hämmer de sones lustigs Töfflitaxituktuk gnoh und händ üs so dStadt loh zeige. Au es hübsches Städtli... mir händ dIdee gha ned i de Touristemasse goh zMittag näh und üs entschiede richtig Meer zfahre. Mer händ nach öppe 5mol verfahre es mega härzigs Strandrestaurant gfunde. Händ super fein gässe und händ de traumhafti Strand fast für üs gha. So hämmer dIdee no uf Alberobello zgho loh sii und händ de Nomi am Strand verbrocht. Mir sind de nur no (also au nochli mit verfahre🙈) im Hafe näbe Polignano a Mare goh e Bootstour bueche für morn und sind plutsch Nass is Auto cho. Die 50m Wäg hed üs es Gwitter voll verwütscht🙈🤣🤣... aber mer freued üs uf die Tour morn...🎉🎉Read more

    See translation
  • Sandra K.ApulienTraveler
    11

    Bootstour und Monopoli

    May 23 in Italy ⋅ ⛅ 25 °C

    Am Donnstig simmer uf die halbi 10ni i Hafe vo Polignano gfahre und händ, wie abgmacht i de Bar gwarted. So hämmers Boot fast verpasst... irgend es Verständigungsproblem. Schlussändlich hämmer no zerst müesse goh zahle und alli im Boot händ uf üs müesse warte🤣🙈aber de isch die knapp zweustündig Tour los gange... es isch traumhaft gsii. Mir sind i tolli Grotte und händ üses liebgwunnen Polignano a Mare mol vom Meer här chönne bestuune. Es hed sogar en Apero gäh und mir händ mit üsne Sitznachbere, en Familie us Washington, agstosse und üs echli unterhalte sowiit üses Änglisch halt god🙈. Nach der Tour simmer no goh poste und händ gmüetlich im Hüüsli zMittag gnoh. Am Nomi isch de Stefan uf Wanderschaft und ich ha miteme Buech üses Büchtli gnosse. De Obig hämmer de us versehe imene sehr noble Resti in Polignano gässe und sind ganz sicher ned überässe usse. Aber mer händ vell spezielli Sache probiert. Eigentlich wär hüt Alberobello ufem Plan gstande aber... mer händ zlang gschlofe... und so simmer uf Monopoli. Zerst zu dene Tre Buchi... (Guet hed mer finde Pinguine und cha nochäläse was ander do so gmacht händ DANKE) dit hanni eifach grad is Wasser müesse... so herrlichi Stränd... und de simmer is Städtli. Isch wirklich au sehr härzig. Mer händ mega fein und günstig zMittag gässe und händ de dringend nomol en abchüehlig im Meer bruucht. Hüt isch richtig heiss. SWasser isch voll okay vo de Temperatur här... guet de Stefan stimmt mir do sicher ned zue🤣🤣... Aber es isch herrlich gsii i das türkisfarbige Wasser i ztauche... jetzt simmer wieder im Hüssli und möched en gmüetliche Obig do und hoffed morn ändlich uf Alberobello zgho.Read more

    See translation
  • Sandra K.ApulienTraveler

    Alberobello und Matera

    May 24 in Italy ⋅ ☁️ 20 °C

    Hüt hämmers ändlich uf Alberobello zu de Trullis gschafft. sWätter isch hüt mit Wind und nur no 19 Grad eher unfründlich. Mer sind nach de 8tne losgfahre und händ no super chönne parkiere... aber es hed scho sehr viel Lüüt gha. Da ich no keis Cappuccino gha ha hämmer das zerst mol in Agriff welle näh... es sind de zerst no es paar hübschi Wäägli mit Trullis dezwüsche cho🤣nachem Kaffii hämmer üs de is gwüell gstürzt... ich ha nümme chönne höre mit Föteli mache🙈irgendwenn hämmer en Terasse gsichtet.. de Stefan hed gfunde das mer dit ufe müend... so simmer aber de zue verdonneret worde am 11i scho en Spritz znäh... sie hed soviel verschiedeni im Agebot gha und mich es paar loh probiere.. ich ha mich de für Granatöpfel entschiede.(im Stefan hed sie nüt zum probiere gäh drum isch er bim bekannte Aperol Spritz blube) .. nur wenn Du en Drink nimmsch dörfsch uf Terrasse 🙈. Na ja... au en Gschäftsidee🙈.. es isch härzig gsii... hübschi Ussicht und hed sogar no chlii Gebäck gäh. Oh ja und en Christbaumchugele hann ich ihre au no abkauft. Nacheme bsuech imene alte Trulli (so en Art Museeum) heds e Pizza zum zMittag ghä und debie isch dIdee ufcho doch no uf Matera zfahre....Gedacht...getan. Nach de Pizza bini au wieder fit gsii für sAuto und so hämmer üs de uf de wunderschöni Wäg uf Matera gmacht. Ich ha chlii userhalb en Parkplatz gfunde und so hämmer de glii mol "storica" also Altstadt vo Matera gsichted. De Stefan heds fast us de Socke glüpft...Mir sind beidi sprochlos vor dere alte Stadt gstande. Es isch so richtig überwältigend gsii.. und keis Bild wo ich gmacht ha wird dere alte Stadt grächt. Eigentlich hanni jo nümme welle Stäge laufe... aber mer händ eifach müesse die Stadt goh erkunde. Aber irgendwenn gömmer nomol mit vell meh Energie und Ziit. Hoffe mer fest druf uf üsi nächsti Reis nach Apulien. Es gfallt üs zguet und i einisch chasch gar ned alles a luege. Es isch hüt scho fast echli viel gsii für üs mit 2 Städt. Ich bin hüt im schlof no am Föteli mache und oh und ah rüefe. Aber Matera isch ächt en Bsuech wärt und natürlich Alberobello au. Morn Reise mer no chlii wiiter i Süde und as ionische Meer. Freued üs jetzt scho uf dReis.Read more

    See translation
  • Sandra K.ApulienTraveler

    Torre Squillace

    May 25 in Italy ⋅ 🌬 21 °C

    Hüt bini am Morge no churz a üses hübsche Strändli und nachher hed scho bald gheisse 👋👋👋Tschüss Polignano a Mare. Mir händ en knapp 2 Stündigi fahrt vor üs gha. Uf de Autostross heds ganz vell Tempolimit sig 50...aber wennt mit 50g würsch fahre wärsch es Verkehrshinderniss... mit 90 bisch scho vell eis🙈sie fahred scho sehr temperamentvoll 🤣🤣und mängisch echli sehr... na ja lömmer das. Jedefalls simmer nach lustige Strössli und eme feine Kaffeehalt mit feine Gebäckli... mmmmh sind die fein gsii... i üsem neue Hüsli a cho. Es hed mega gwinded... no fester wie gester.. aber de Himmel isch srahlend blau gsii. Üses Hüsli isch am ändi vomene holpprige Wägli diräkt anere Bucht. Vom Balkon us chasch dNatur beobachte und dFarbe vom Sunneuntergang gnüsse. Es hed en mega schöne Torro.. und i de nöchi chasch am nächste Strändli goh ässe. Es Naturschutzgebiet isch au fuessläufig zerreiche und echli es grössers Städtli. Es wird wieder vell zentdecke gäh. Freued üs scho druf.Read more

    See translation
  • Sandra K.ApulienTraveler
    1121

    Erkundigungstoure

    May 26 in Italy ⋅ ☀️ 25 °C

    Am erste Morge simmer zerst mol in Conad wo grad am Strand isch. Im Beizli näbe zue heds es feins Käffeli gäh und nachhär hämmer üs mol mit Läbensmittel i deckt. Zrugg im Hüsli hämmer unbedingt mol welle wüsse was do rundume alles so gid und natürlich Naturschutzgebiet erkunde. So simmer wieder Wandervögel gsii und händ die schöni Natur gnosse. Nachere Mittagsiesta simmer no ei Bucht wiiter goh bädele, also ich und händ serst mol Schwiizer troffe und de e chlii gspröchle mitenand. Zum zNacht simmer nomol fein is Restaurant hind dra und händ de Sunneuntergang gnosse. Am nächste Morge hämmer üse Radius vergrössered und händs Auto gnoh. Ich ha gläse es gäbi do Flamingos und die hämmer natürlich welle gseh. Es isch en härzige chline Naturpark mit eme Seeli, en Landstriich und de sMeer. A dem Seeli sind tatsächlich Flamingos gsii. Mer händ u freud gha. Es isch mega drücken heiss gsii drum simmer de nach 100 Föteli wiiter gfahre und händ imene schattige Restaurant am Meer zMittag gässe... so simmer langsam wieder zrugg gfahre mit ganz vell Zwüschestopps am Meer, oder wieder bimene Torro. Mol goh bädele und en kurzi Siesta sind au no dine gläge. Völlig entspannt hämmer im Hüüsli es feins zNacht bruzzled und lönd de Tag uf üsem hübsche Balköndli no mit läse usklinge und Finde Pinguine schriebe natürlich.Read more

    See translation
  • Sandra K.ApulienTraveler
    111

    Sant'Isidor, Porto Selvaggio & Gallipoli

    May 28 in Italy ⋅ ☀️ 26 °C

    Im Hüüsli hämmer zerst no dMorgestimmig gnosse, chlii usegluegt, gmöleled und eifach chlii verwache. Wo mer los sind heds zerst natürlich es feins Cappuccino gäh. Das hämmer im Nachbersdörfli (Sant'Isidoro) am Strand gnosse. De Rucksack isch mit Badzüg und Wasser packt gsii (leider nüt zässe) und so simmer mit em Auto richtig Gallipoli gfahre. Unterwägs heds für
    Touriste en grosse Parkplatz gha und mir händ eigentlich kei Ahnig gha was üs so erwarted. Mer wänd au ned immer alles so gnau Google und wüsse. De Entdeckergeist will chlii überrascht wärde. De Wald und die Wägli händ üs scho entzückt. Es isch sehr warm gsii aber im Schatte mit em Windli sozäge perfekt. Nacheme abzwieger simmer ane Klippe cho. Wunderschön zum luege. Abelaufe nei... so simmer wieder zrugg uf de Hauptwäg und händ dite de, vomene alte Päärli erfahre, das mer no en Halbstund müend laufe bis zumeme bsunders schöne Strand. Hed sich sehr glohnt. PORTO SELVAGGIO Ich bin ziemlich schnell im Wasser gsii und de Stefan isch echli wiiterglofe zum no i dGrotte goh luege. Bald hämmer gmerkt das mer echli knapp sind mit Wasser und das Ziit fürs zMittag längst dure isch und mer äbe leider nüt zum ässe debie händ. De Zruggwäg zum Auto isch de doch fast en Stund gsii und ich und hunger🙈🤣. Trotzdem simmer no wiiter uf Gallipoli gfahre und dite is erstbeste Resti öppis goh ässe. Aber sogar für dItaliäner isch halbi 4i echli spot fürs zMittag. Aber es hed zum Glück doch no noimed öppis gäh. Gallipoli isch en lustigi Stadt. dAltstadt isch eigentlich es Inseli und mer cha rundume laufe. I de Altstadt sälber heds härzigi Lädeli. Es wärde vorallem Schwümmli verchauft usem Meer und ein Lade hed sganze Johr Wiehnachte🙈🤣. Mer sind de wieder die knappi Stund zum Hüüsli zrugg gfahre und händ de zerst no en Obigspaziergang gmacht bevor mer nach dem spote zMittag as zNacht händ chönne dänke. Bimene Glas Wii und chlii Antipasti hämmer de Tag de abgschlosse.    Read more

    See translation
  • Sandra K.ApulienTraveler

    Räge in Lecce

    May 29 in Italy ⋅ ☁️ 20 °C

    Wo mer verwached sind heds scho grägned. So simmer ganz gmüetlich no chlii im Hüüsli ghöckled und händ de gfunde es wär en guete Tag für i dWöscherei. Da mir mit em Zug do sind hämmer ned für 3 Wuche Chleider debie. Mer händ im nöchst grössere Dörfli au en Wöscherei gfunde und händ gmeint mir müessed alles sälber mache und warte (Selfservice isch ämel a gschriebe gsii) aber mer sind positiv überrascht worde... mir chönnd dWösch ab de 2ne wieder goh hole. So hämmer gfunde das nütze mer und möched die halbstündigi Fahrt doch um Lecce a zluege. So hämmer de bim Bahnhof en Parkplatz gfunde und sind i dAltstadt vo Lecce. Nacheme Käffeli simmer scho bald uf de Piazza del Duomo gstande und händs üs ned loh näh uf de imposanti Gloggeturm Campanile zgho. Es hed en Lift gha de aber stolzi 12 Euro kosted hed pro Person. Es isch aber en herrlichi Ussicht gsii über ganz Lecce, trotz dem verhangene Himmel. Ufem Turm obe simmer no miteme schwiizer Päärli is gspröch cho und well mer nachhär per Zufall au im gliche Restaurant glandet sind hämmer sZMittag zäme gnosse.. bis... es wie us Chüble gosse hed. Mir sind unterem Sunneschirm ned lang in Sicherheit gsii. SWasser isch wie es Bächli under üsem Tisch dure und vom Sunneschirm schön de Nacke derab bis ich au wirklich bis uf dUnterhose nass gsii bin. Mer sind chlii zäme grückt und händs eifach nur no lustig gfunde. Nass isch nass und sÄsse isch sehr fein gsii. Mir hän de usefunde das sie uf de gliiche Camping gönd wo mir am Mäntig au hii gönd und so wärded mer üs no es Drittsmol über de Wäg laufe. Mir sind de dure Räge gliich no dur Lecce gspaziert und händ Sehenswürdigkeiten abklappered und üs inere Konditorei no mit feine spezielle Gebäck vo do i deckt. Nachdem mer zrugg gfahre sind und üsi Wösch gholt händ isch dSunne wieder führe cho und god scho bald wieder under.Read more

    See translation
  • Sandra K.ApulienTraveler

    Porto Miggiano und Otranto

    May 30 in Italy ⋅ 🌬 19 °C

    Gäge de Mittag hämmer üs entschlosse sHüüsli zverlo. De Nachber isch mitere luute Maschine unterwägs gsii und es hed ziemlich gwindet. Mer sind mol richtig Otranto und vorhär no a Porto Miggiano. Zerst hämmer, wo mer nachere Stund a cho sind nur mol Burg beguetachtet und de hämmer ines Restaurant müesse well Blose drückt hed. Mir sind de uf Santa Cesarea Terme cho. Es orientalisch a ghuchts Bonzestädtli. Händ aber amene nätte Plätzli öppis feins zMittag becho. Nachdem Zwüschestopp simmer nomol zrugg gfahre und sind no chlii dur dFelse gstägered und händ sMeer gnosse. Otranto isch scho immer chlii uf üsem Plan gstande und wells ned wiit wäg gsii isch hämmer de Wäg au no gmacht. Nur händ mir sKüsteströssli gnoh und das hed sich so glohnt. Wunderschöni Kürfeli mit traumhafter Ussicht. En wahri Freud. Au Otranto isch en härzigi Stadt und hed sich glohnt goh a luege. En wunderschöni Burg, Grottene wo frühner Mönche drin gläbt händ. En riese Gschicht au mit de Türke im 15. Johrhundert... mer chönnti es ganzes Gschichtsbuech schriebe. So simmer gfüllt wieder richtig Hüüsli und möched üs nur no öppis zNacht und de isch für hüt gnueg.Read more

    See translation
  • Sandra K.ApulienTraveler
    11

    Gmüetlich...

    May 31 in Italy ⋅ ☀️ 24 °C

    Die letschte zweu Täg hämmers gmüetlich gnoh. Gester simmer is Nachbersdörfli spaziert. Natürlich möglichst alles am Meer entlag. Es hed es paar lustigi Umwägli gäh und en chliini Chlätterilag binere alte Muschelzucht... aber mer sind de im Dörfli a cho. Es isch scho ziemlich heiss gsii und drum hämmer üs de hald gliich esone Liegi mit Sunneschirm gmietet. Do hämmers vermisst ned mit em Camper und de Strandusrüstig unterwägs zii. So hämmer de Nomi am herrliche klare Wasser verbrocht, gläse, bädeled, gässe, gschlofe... was mer so macht. Gäge de Obig simmer nochli wiiter glofe aber händ de glii mol umkehrt und sind en chlii en diräktere Wäg hei defür mit Apero am Strand. Dehei hanni mini ID vermisst🙈aso hämmer sHüüsli uf de Chopf gstellt.. Mist. Kei Plan und kei Idee werum. Na ja... ich hoffe wiiter. Jedefalls simmer de nümme furt und händ defür no de Wii ustrunke🤣🙃Hüt hetti Lust gha mol so richtig fein goh zMörgele. Schwierig. In Porto Cesareo isch scho rächt Betrieb gsii... aber überall Dolce zum zMorge. Na ja. Mir sind de no chlii durs Städtli spaziert und uf sInseli use (dit hed üs dIrina no a glütet🎉☀️und mer händ chlii verzellt). De no usgibig goh Aperöle und de tolle Sängerin zu glost wo sich grad vor üs ufgstellt hed. Richtig Feriestimmig. Am Nomi simmer nomol um de Egge bim Hüssli a üsi einsami Strand🙈er isch gragled voll gsii!!!!! Morn isch zItalie Nationalfiirtig. Das hämmer au am Obig gmerkt wommer uf Porto Cesareo sind goh ässe. Mir sind äxtra scho uf die 8ti gange damit mer no Platz findet. Womer zum Restaurant usse sind am 10ni hämmer müesse kämpfe well soviel Lüüt a gstande sind wo inne händ welle. Au dStadt isch fast us allne Nöht platz. Zum Glück hämmer überhaupt en Parkplatz gfunde. Mir sind de fluchtartig is Hüüsli zrug und gnüssed jetzt sMeerrusche ufem Balkon und wie sMondliecht sich im Wasser spiegled.Read more

    See translation
  • Sandra K.ApulienTraveler

    Camping & Santa Maria di Leuca

    June 2 in Italy ⋅ ☀️ 22 °C

    Am Morge hämmer alles packt und natürlich nomol alles nach minere ID dursuecht. Leider Erfolglos. Mir sind no es Abschiedscappuccino goh näh und am 11h los gfahre uf de Camping. Dite hämmer üs en Beachy gmietet. En eifache Wohnwage mit ere deckte Veranda wos au en Chuchiegge hed. Mer müend zwar uf dSanitär für Wasser und WC aber sCampingfeeling liebe mer hald. Händ üs grad deheime gfühlt und de Camping Riva di Ugento isch eine vo de Schönste woni jeh gsii bin. Mer isch imene Wäldli und über en Düne chunsch ane traumhafte Strand. Sie säged do sigid dMaledive vo Italie. Aso mer gnüsseds voll. Händ gester de Platz echli erkunded und es Meerbädi gnoh und öppis feins koched. Am Obig simmer üsne nätte Bekannte wo mer in Lecce känne glehrt händ wieder (im dunkle) über de Wäg glofe. Mer händ zäme no welle en Schlummertrunk näh am Meer aber da dStrandbar scho zu gsii isch simmer eifach echli ghöckle und händ gspröchled mitenand. Sehr gmüetlich gsii. Am nächste Morge hämmer üs no zumene Kaffi am Meer troffe. Sie fahred hüt wiiter. Ich ha de mis Buech packt und bi no chlii as Meer goh läse. Nacheme feine zMittag hämmer üs de uf gmacht uf Santa Maria di Leuca. Mer händ Google Maps wieder ned gfolged und sind am Meer entlang dur härzigi Dörfli gfahre. Aus Städtli und de Faro di Capo vo Santa Maria di Leuca sind beidruckend gsii. Am heiwäg hämmer üs zum Glück au nomol verfahre und sind dur mega schmali Strössli mit wunderbarer Natur gfahre. Ich dörf de Satz "lueg mol die schöne Kakteen" nümme säge. De Stefan isch am verzwiefle🤣🤣... jedefalls simmer de gliich wieder zum schöne Meerströssli zrugg cho und händ diräkt am Meer no öppis chönne trinke. Obwohls zue gha hettid. Mega toll🤩
    Hüt ischs wieder überall gmüetlich und hed viel weniger Lüüt als die letschte 3 Täg. Nächst Wuche fanged do scho dSchuelferie a und die gönd de bis am 14. Septämber. Aber de simmer jo leider wieder deheime.    Read more

    See translation
  • Sandra K.ApulienTraveler

    Campingtag und zrugg uf Brindisi

    June 5 in Italy ⋅ ☀️ 28 °C

    De Tag (Mittwoch 4.6) hämmer miteme Cappuccino am Meer gstartet, aso ich. De Stefan hed miteme Americano aber es feins Schoggigipfeli hed für üs beidi gäh. Nachhär hämmer en wunderschöne Strandspaziergang gmacht und no en neui Strandbar entdeckt. Au de Campingplatz hämmer no usgibig erkunded. De Tag hämmer mit gmüetlich ässe vorem Wohnwage, Siesta mache, goh bädele is Meer (sogar de Stefan 🥰?) Sunneuntergang luege und leider au mit packe verbrocht. Am nächste Morge am 9i hämmer für uf Brindisi, müesse abfahre. Mer händ sAuto vorem Mittag müesse abghäh. Vorhär no Volltanke. Mit chlii Stau hämmers immer no mitere halbstund spazig gschafft und üsi Fahreri hed üs super is Hotel brocht. Nachere Duschi (de Sand hed mol wäg müesse) simmer goh zMittag näh und üsi bald scho obligat Siesta hämmer de brucht. Es isch drücken heiss in Brindisi. Am halbi 6i hämmer wieder i Stadt möge und sind nochli goh Proviant poste für Zugreis morn. Brindisi gfall üs fast no besser als erste mol. Es isch scho es bizzeli es Zruggcho gsii. En Apero i üsem Lieblingsgässli bim Lieblingssänger hed natürlich ned dörfe fähle. Folgem jetzt uf Insta🤣. Au sZnacht und dzrugg spaziere dur die hübsche Gässli isch richtig schön gsii. Jetzt pfusse mer damit mer morn de Wecker ghöred für de Start in letschi Tag vo üsere wunderschöne Reis.Read more

    See translation
  • Sandra K.ApulienTraveler

    Heifahrt

    June 6 in Italy ⋅ 🌙 26 °C

    Am Morge simmer früh uf und nacheme feine (wie immer süesse zMorge) hämmer de holprig Kofferwäg a Bahnhof i agriif gnoh. Leider heds au kei Lift oder en Rampi am Bahnhof, so hämmer dKoffere müesse umeschleppe. Pünktlich isch de Zug am Bahnhof i troffe und die ersti Viertelstund isch alles wie plant gloffe. Doch de hed de Zug a ghalte und es isch emol eifach nüt meg wiiter gange. Zwar immer mol en Durchsag vowäge verspötig und Techniker sig unterwägs........ Nachere guete Halbstund ischs de ändlich wiiter gange und de agseidi Techniker isch bi de Bahnschranke gstande. Wahrschindlich isch dite sProblem gsii. Es isch de wie es Spiel gsii. Mir händ zMilano 60 Minute Ziit zum Umstiege ghaa und dAzeig isch wieder mol uf 42 Min. verspötig de simmer wieder mit fast 240 kmh gfahre de sinds nur no 29 Min gsii... aber mer sind gueter Hoffnig gsii das es längt. Mir sind am 8.29h abgfahre und de am 17.55h a cho statt am 17.10h. Alles halb so wild. Zugfahrt sälber isch wieder herrlich gsii. De Zug isch die erste 4 Stund ziemlich lähr gsii und so hanni immer en Platz gha zum sMeer gseh... Ha nur usegluegt und gnosse. Churz vor Rimini heds rächt Lüüt ghä und isch au luut worde. Die cheibe Handyspielmelodie vom Chind näbe zue lauft mer hüt no noche. Jedefalls hämmer üse SBB-Zug verwütsch in Milano. Au de isch guet bsetzt gsii. En Frauegruppe wo vom Shoppe us Milano ufem Heiwäg gsii isch hed üsed Abteil au mitere hübsche Grüschkulisse gfüllt. So simmer de i Spiesswage üs goh a klimatisiere miteme feine Wurstchässalat und ere Schorle bzw. emen Bier. zGoldau simmer uf dMinute pünktlich i troffe. Am Bahngleis hämmer de Gropi erwarte und siehe da sogar dIrina isch mit Pfingtrose am Bahngleis gstand. De hanni de sogar no es Trändli vergosse vor luter freud. So hämmer en wunderbare Abschluss gha vo üsere fantastische Reis uf und dur Apulien. ☀️❤️🥰Read more

    See translation
    Trip end
    June 6, 2025
  • 2025© FindPenguins
  • Home
  • About us
  • Group Tracking
  • Press
  • Terms
  • Privacy Policy & Cookies
  • Help Center
  • Legal notice