Finding Mt. Fuji

Als ersts simer grad nomal it Onse gumpet. Schön ufgweicht hämer es Zmorge mit sälbergmachtem Brot becho. Das isch aso mal en guete Start in Tag gsi😅✌️
Für die zweit Nacht in Hakone hämer es Hostel buecht, aso hämer zerst oisi Sache dethi müsse bringe. Det het ois d Kana, ganz e herzlichi Japanerin begrüesst und ois alles wichtige für de Tag erchlärt und für am Abig nomal es Onsen reserviert.
Mit em Zug simer zunere Zahradbahn und den uf e Gondle. Es het sich usegstellt, dass Hakone mit St. Moritz befründet isch und mir händ vieli Bilder us de Schwiiz i de Bahne gse😁
Obe acho simer im Krater vo dem Vulkan glandet, wo überall schwarzi kochti Eier verkauft werdet. Die werdet aschienend im schwäfelhaltigem wasser kochet und werdet den schwarz. Klar, hämer das müsse probiere😅
Mit enere andere Gondle isches abe zum Ashi-See gange, wo mer ines Pirateschiff gstige sind.
S Schiff het ois uf die anderi Site vom See bracht, wo mer e super Ussicht uf de Mt. Fuji söti ha. De Tag isch rächt bewölkt gsi und mir händs no ghofft, dass mer de Fuji glich no gsend. Leider hets keis Wulkeloch ge und vo det us hämer ihn nüme gse. Mit chli Fantasie hämer ihn ois vorgstellt😂.

Wieder zrug im Hostel simer gägenüber en japanese Burger go ässe. Naja so japanisig wie ois Kana gseit het, ischer nöd gsi. De Bsitzer schient en riesige USA Fän gsi und het alles wie i de USA dekoriert. Mir händ en sehr feine Burger becho.

Nachher simer no ine Onse, wo mer au für ous allei gha händ. D Kana her gmeint, sie segi bsundrigs heiss und mir sölled s Tüechli mit chaltem Wasser benetze und ois uf de Kopf tue.
De Adi het sich erinneret, dass er i de erste Onse no dänkt het, warum tüend sich alli s Tüechli uf de Kopf? Mit de Ahnam, es söll troche blibe, het er sies det au eifach uf de Kopf ta. Ez isch ihm s Foifi gheit, dass das Tüechli nass zum abchüele söt si. Es het ois schön amüsiert, will, stelled eu vor, was die Japaner wohl dänkt hend, wo er sich es trochnigs Tüechli uf de Kopf ta het😂😂😂😂😂😂

Ps. De Fuji hämer doch einisch für paar Sekunde vo de Gondle use gse😉Читать далее