Kuang Si Waterfalls

Mir händ es Töffli vo oisem Hotel wele miete zum d Kuang Si Wasserfäll go azluege. De a de Rezeption, mir nänned de ez mal Düfel (= nöd s hellste Kärzli uf de Turte) het bimene Vermieter eis bstellt. Paar Minute spöter isch au scho es Töffli cho. De Düfel het gmeint, oh hine hets nöd viel Luft im Reife. Mir sölled doch de a de Tankstell no uf pumpe. Beidi sind scho uf em Töffli gsi und händ grad wele losfahre, wo de Bsitzer vom Hotel cho isch und völlig entzetzt gmeint het, mir münd warte es het kei Luft im Hinterrad. Er het das so energisch gseit, dass mer nomal uf de Parkplatz sind. De Düfel isch den mitere, doch rächt moderne Pumpi fürt Töfflipneu, cho und hets unter de Awiisige vom Bsitzer ufpumpt. De Bistzer het den verschroke uf de Pneu zeiget und mir hend gse, das en riisige Nagel drin gesteckt het. Uff, da hämer en grosse Schutzängel gha😇
Mit emene neue Töffli hämer ois den glich no uf de Wäg chönne mache. D Strasse in Laos sind aso scho nöd glich wie in Thailand. D Schlaglöcher müssten eigentlich Schlagkrater heisse, darum simer au ganz gemächlich gfahre.
Bi de Wasserfäll acho hämer die verschiedene Naturpools bestuunt und vieli Föteli gmacht. Die sind wüki schön gsi😊
Am Nami hämer nomal am Pool gfulänzt.
Am spötere Nami simer für de Sunneuntergang uf de Huusbärg vo Luang Prabang, Phousi Hill. D Ussicht isch super gsi, aber es het sooo viel Lüüt gha, das mer schnäll wieder gange sind. Mir händ den defür imene Café grad am Mekong chli chöne si. Am abig hämer am Night Market für öpe 7.- zäme Znacht gässe.
Um au bizli Wiehnachtsstimmig zbecho, hämer im Hotel en Wiehnachtsfilm glueget und no es Guezli gässe😅Weiterlesen