Rom Tag 1 & 2

An dem Tag simer früeh los, do lut ChatGPT z Kolosseum und z Forum Romanum spöter überlauft mit Menscha & au wel Temperatura agnehmer sind. Do mier 2 kai ticket buacht ka hend fürs Kolosseum hemer das vor Ort wella, definitiva afängerfehler (obwohl de Erol scho mol do gsi isch vor 9 Johr)😬 es het genau no Ticket ka für dia 15:00. Den simer am morga zerst is Forum Romanum. Das Forum isch as politisches, wirtschaftliches und religiöses Zentrum vom antika Rom gsi. Isch schu beidruckend wie das alles no erhalta isch. De nächsti Halt isch den de Trevi-Brunna gsi, uf de hani mi bsunders gfreut. Doch leider het er kai Wasser drin ka ufgrund Wartigsarbeita☹️ Bevor mr den wieder zum Kolosseum zottlet sind simer no zur spanischa Treppa. Döt simer akli am sitza gsi und hend no üsi sprochnochrichta beantwortet vu Fründa und Family. Im Kolosseum ako wird genau alles kontrolliert, ID, Handtäscha eigentlich wie a Flughafa. Wo mier den doba gstanda sind im Kolosseum ischs schu fazinierend gsi wenn ma sich vorstelle was das „Gebäude“ alles schu erlebt het. Au is immer wieder spannend wie sich gwüssi menscha verhalten.. eis gedränge und as umaschupfa.
Wo mier wieder dussa gsi sind hemer üs je an Becher mit gschnittna Stücki Wassermelona gönnt. Mitma stolza Pris vu je 6€.

Rom Tag 2
Hüd hemer üs entschieda zum im Hotel zmörgala, isch ganz ok gsi aber in dena Käffali do gitz vieel bessera Kaffee😂
Mit em Bus simer richtig Petersdom. Am Vorobig hemer wella Tickets buacha fürd Sixtinische Kapelle haha au do hemer wiedermol guatgläubig wie mier sind denkt dass es sicher Tickets ha wird. Dem war nicht so. Es hetti schu Tickets ka mit irgendwelcher Füehriga über 3. Firmena aber de Pris.. hebend eu fest….. 400 Stuz hettens für das wella🤯 hemer natürlich ni buacht. Den simer eifach „nur“ de Dom go besichtiga. Und wooow es isch so imposant gsi, eifach a wohri Kunst. De Dom isch dia grösst Kircha uf dr Welt. Obwohls a heiliga Ort/Kircha isch, isch es megaa lut gsi ussrt imna „Abteil“ wo nur betendi inna dörfen. Heisst kai foti ect, döt ischs mega schön still gsi und ma het mol alles uf sich würka loh könna.

Den isch mis Ziel hüd no gsi as Parfüm zkaufa. Do Rom bekannt isch für einzigartigi Parfüms. De Erol min persönlicha Guide haha het as paar läda ussagsuacht. Han den au eis kauft🥰 nach dem glungama ikauft simer natürlich no uf an Cappuccino.

Znacht hemer üs witeri Spezialitäta gönnt. Vorspies Supplì, dass isch as frittierts Rissbäleli mit tomata Risotto und an Kern mit gschmolzenem Mozarella. Spaghetti Carbonara han i ka -sehr fein gsi! Und de Erol het nomol Cacio e Pepe ka. I glaub wen mier wieder ir Schwiiz sind gitz a moment kai Makkaroni meh😂 Dessert hemer üs hüd au wiedermol gönnt nämlich a Maritozzo, dqss isch as Hefebrötli mitra Sahnefüllig. Es isch ok gsi aber i blib halt amigs lieber bi minera Schoki😬 Czytaj więcej