Letzter Tag Rom/Anreise Napoli

Gester morga simer a rundi go pumpa 💪🏽 es het gad 2 min vu üserem Hotel as Gym. So a richtigs Oldschool-Gym. Nochdem mier a guats Training ka hend simer in as herzigs klises Kaffee go zmörgala. Inhaber vu dem Käffeli isch a herzigs älters Päärli gsi nu schu das hets mega sympathisch gmacht. Mier hend döt selbergmachti Panini gessa. Zum trinka hets a frisch pressta Orangasaft geh und de Cappuccino het natürlich ni gfehlt😋 Das ganza het um dia 16 € kostet, mier hend den uf 20 € ufgrundet, dia älteri Dama het den 3 mol nohgfrogt ob mier üs würkli sicher sind. Dia sind sehr dankbar gsi, hemer echt schön gfunda🫶🏼

Do de Erol wieder längers Hoor beko het😜 het er zumna Barber wella. Au do sind Google-Bewertiga üsa Begleiter. De ersti het kai ziit ka den simer zum nächsta glofa. Döt ahko gsehmr das a Frau döt Zepter füehrt, de Erol zerst kli skeptisch gsi aber danoh mega begeistert. Dia het das tiptop gmacht halbs Wellness gsi😁 Währenddessa hani mit mina Eltra telefoniert❣️

Am Nomitag simer in da Giardino degli Aranci Orangen-Garten. Döt hemer kli d Ruah gnossa und Hend eifach a moment nüd tua. Als mr üs wieder uf da Weg gmacht hend, het de Erol dia glorrich Idee ka a Orange vum Baum zpflücka obwohl i ihm 10000 mol gseid han das er seb ni söll.. bevor er sie den essa het wella hani ihm nomol gseid er söll ChatGPT froga ob ma das würkli kan.. und tadaa wär het recht ka?? Ich! Dia sind ni essbar gsi. Zum Glück lost min Mah amigs so guat uf mi..🤨😂
Gad bi dem Park isch Aventine Keyhole. Döt luagt ma bi de Tür durchs Schlüsselloch und gseht d Kuppla vum Petersdom. Tür selber kama ni öffna eba wie gseid nur durchs Löchli luaga. I hans probiert zum fötela aber es isch ni so guat ganga.. egal den wichtiger isch z Erlebnis☺️

Anreise Napoli
Hüd am morga simer gad nomol a rundi is Gym, damit de Pump guat verteilt isch😁
Nach em zmorga im Hotel ischs witr ganga nach Napoli. Also was würkli sega muas isch, wie dia do autofahren isch schu bedenklich. Obs im Auto isch oder als Fuassgänger ma muas ständig achtsam si. Mehrfach isch mr mis Herz id Hosa grutscht. I bi froh isch de Erol so a ruhig Person, den i bringa do anders Temprament mit🤯😬
In Napoli ah ko simer ind Parkgarage. Ganz verdutzt hemer gluagt wos gheissa het das mier d Autoschlüssel abgeh müend. Wie mier Schwitzer halt sind eher misstrauisch aber wo mier a Bestätigung und Ticket beko hend het sich üses Misstraua gleid. Und au in da Google Bewertige hends vu dem gschrieba. Vur Parkgarage is Airbnb sinds knapp 2 minuta, mit da Koffera eher a herusforderig gsi wel dia Trottoire do uneba und volla löcher sind😬 Noch dem mier üs igrichtet ka hend simer los richtig Duomo di Napoli. De Dom isch au sehr idrücklich gsi, faszinierend wie alles früher erbaut worda isch und immer no so stoh kann. Was speziell in dem Dom isch, dass 3 mol im Johr a Zeremonie stattfindet - Blutwunder von San Gennaro. Es wird as Gfäss zeigt mit itrocknetem Bluat vum Heiligen San Gennaro, während der Zeremonie verflüssigt sich den das Bluat. Sobald sich zbluat verflüssigt ischs a guats Omen.
Noch dem Bsuach simer kli am umaschlendera gsi. I persönlich finda Napoli gad no lüter als Rom.

Znacht hets dia berüehmti Pizza geh im L’Antica Pizzeria Da Michele. Döt zieht ma a Nummera und wartet bis ma as Plätzli kriegt. Es het genau 2 Sorta Pizza. Wer der Kollegah kennt de isch übrigens au schu do am essa gsi 😬
Mier hend beidi a Margherita gno, tiptop gsi.

Witr ischs zumna Supermarkt ganga, wel mier Wasser hend wella posta und Banana. Als der Erol den selbstständig Banana us em Gstell het wella neh isch so an Typ ko wo gmeint het das dörfi ma nit, er machi das für üs. Haha aschinend macht ma das so, obs us hygienischa Gründ isch..kai ahnig wel komisch isch gsi paar Schritt witr sind eifach au mehreri Hünd im Supermarkt gsi mit ihrna Bsitzer🐶

Ufm Heiweg simer an vielna Obdachlosa verbi - an Ablick wo üs nochdenklich gstimmt het.Read more