Amalfi

Tag 2
Am Zistig ischs für üs uf a Bootstrip ganga. Do mier in der Türkei mega Fan davo worda sind hemer da Italiener au Chance wella geh ;)
Tour isch am 09:30 los ganga. Wo ich zBoot gseh han isch mier eher kli mulmig worda do es eher als kliners gsi isch als mier üs bis jetzt gwöhnt gsi sind. De Captain isch a lustigi Socka gsi, begrüesst het er üs mit: „bin kli nervös den hüd isch min ersta Arbeitstag“.. isch natürlich a Witz gsi.. Bereits nach de ersta paar Meter isch mier schu übel worda wels so gwacklet het, denn de Gedanka das es ez no 4h go söll isch für mi de Untergang gsi🫠 Wo mr in dr ersta Bucht a Halt gmacht hend hani mi entschieda zum mi umpositioniera, nämlich Bei wie hoch lagera (siehe Video). In dera Position isch mr den schnell besser ganga, han mi eifach ni gross bewega dörfa😅 am Erol isch am Afang ni übel gsi erst kli spöter denn. Als mr den länger gfahra sind und nüm so langsam unterwegs gsi sind ischs au besser worda vur Übelkeit. Während dera Bootstour simer an verschiedna Sehenswürdigkeita verbi düst. Z.B. z’einta isch a speziells Hotel gsi mitra Suit wo mol a Kapella gsi isch, a Nacht kostet döt 2000€..
Bi de nächsta Bucht wo mr ghaltet hend isch de Erol bis an da Strang gschwumma, döt het er den sehr schöni Steinli gsammlet. Zerst het er denkt seiend Scherba wels so glänzt hend.
Ufm Rückweg hets Limoncello geh und i sega eu dia Amis/Australier hend gsoffa wie as Loch🤣 (insgesamt simer 9 Lüd uf dem Boot gsi, mier 2 🇨🇭, 2 🇦🇺 de Rest Amis). De eint Australier - de Jack - het recht für Unterhaltig gsorgt😅 zum Glück isch mr den nüm so Übel gsi susht hetti das fix ni vertreit. Nach 4h den wieder festa Boda unter da Füess zha isch a schöna Moment gsi😬 Bevor mier den go znacht essa sind, simer üs nomol go frisch macha. De Znacht isch sehr fein gsi und au de Service sehr agnehm. In Gnuss voma guata Service simmer leider no ned so viel koh.

Tag 3
Am Mittwoch simer uf a Wanderig „Weg der Götter“. Zerst simer mit em Bus richtig Bomerano. Vu döt startet dia Wanderig. Kulissa isch während dr ganza Wanderig sehr idrücklich gsi. Es isch kli uf und ab, viel Staub und Treppa. Dia Routa gilt als eini vu da schönsta Wanderiga vu Europa. De Nama „Weg der Götter“ isch ufgrund der atemberaubender Landschaft, dass sie sogar da Götter würdig sie söll.
Am Schluss vu dera Wanderig muas ma 1500 Treppa neh zum uf Positano zglanga. Mini Bei sind am Schluss Matsche gsi haha nuno am zittera wie an Zitteraal🤣 Vu Positano uf Amalfi hemer d Fähra gno. Do es de letzi Obig gsi isch in Amalfi hemer üs entschieda zum im Hotel essa. Im Hotel selber kocht eba d Schwöster vum Bsitzer. Es isch a super Entscheidig gsi den dia het super kocht, halt Hausmannskost🇮🇹
Amalfi het gfühlt ez schu uh viel Touris. Am Erol ischs schu fast zviel gsi😁 lut dem Hotel-Bsitzer sei das aber nu 60%. In da nächsta 2 Mönet wirds no viel meh Lüd ha..

Amalfi het üs sehr gfalla. Au zHotel het a bliebenda Idruck hinterloh, familiär, hilfsbereit und viel Herzbluat. Also falls ier nach Amalfi gönt isch das definitiv as Hotel zum empfehla. Zuadem glaubi dasi nonia im Leba so viel Treppa glofa bin wie in Amalfi. Czytaj więcej