Doha

A viaxe de volta foi unha malleira. Como tiñamos escala en Doha, puidemos escoller que fose de 3 ou 12 horas... e como nos gusta moito aproveitar as horas, puxémonos a coñecer a cidade catarí. Saír do aeroporto cara ao deserto ás 12 do mediodía foi unha labazada ante unha calor espectacular, o sol abrasador. A primeira parada foi o Museo de Arte Islámica, unha verdadeira marabilla, tanto o edificio como as coleccións. Ademais, desde el tes as mellores vistas do skyline da cidade. Despois quixemos entrar na mesquita e non nos deixaron así que fomos ao zoco, a pasear entre as súas tendas e teterías. É labiríntico e interesante pero non moi grande. A partir das 5 da tarde comeza a poñerse o sol e a atmosfera comeza a poñerse interesante. Antes de regresar ao aeroporto volvemos ver pola noite a baía coa silueta dos edificios con luz artificial. Xa non nos quedaban forzas máis que volver ao aeroporto e intentar descansar un pouco antes do voo.Read more