Haleakalā-Nationalpark

Neuer Tag - nächster Sonnenaufgang. Hüt heimer fasch scho chönne usschlafe. Der Wecker isch ersch am 10 vor 4i losgange. Nachdem mir gester ufem Mauna Kea praktisch alleini si gsi, hets hüt ufem Haleakalā - trotz Zuetrittsbeschränkig am Morge (mir hei zum Glück genau vor 60 Täg chönne reserviere) - wesentlich meh Lüt ka. Derfür si d Temperature erträglicher gsi und zwe Ranger hei der Sunneufgang mit ihrne Gsangskünst begleitet.
Der Haleakalā isch en scho länger nüm aktive Vulkan, wo chli meh als 3000 Meter usem Meer ragt. Si Name bedütet "Haus der Sonne". Nachem Sunneufgang simer zu mehrere Ussichtspünkt gfahre und hei o no e chlineri Wanderig unger d Füess gno. Di Krater-Landschaft het üs beidne super gfalle. Drum heimer üs gnue Zyt glah zum Föteli mache und picknicke. Am Endi vor Wanderig heimer de ufem Parklplatz tatsächlich no zwe Nēnēs gseh. Me chönnt sägä, e Nēnē sig ja nur e Gans. Das würd däm Tier aber niemals grecht, es isch nämlich der Nationalvogel vo Hawaii.Читать далее