Malta

Der Buschauffeur het so richtig lang ufd Hupi drückt, das nachdem er uf der Fahrt scho mänge andere Bus überholt het und scho mängisch churz ghupet het. Er het offensichtlich sini letzti Fahrt ka und wöue Fyrabe mache. Üs isch das Recht gsi, de simer chli früecher zrügg in Valletta nacheme lange und schöne Usflug uf Comino.

Comino isch e chlini Insel zwüsche Malta und Gozo, wo nur no 3 Iwohner läbe. Mir si miteme chline Boot übere gfahre und hei gli gmerkt, dass mir ke ruehige Ufenthalt dörfe erwarte. Ds Wasser vor Blue Lagoon isch genau so schön türkisfarbig gsi wie uf de Bilder im Reiseführer. Üse Bootskapitän het zielgenau der Steg agstüret, wo grad neu gschliffe und lackiert worde isch für di bevorstehendi Houptsaison. Es het aber scho itz sehr vieli Boot mit Partymusig und no meh Touriste ka. Di ca. 20 Liegestühl si längstens beleit gsi. Bi vier Foodtracks hets Fastfood und vieli Drinks gä, wo me usere Ananas 🍍 het chönne trinke. Am Afang simer chli erschrocke ab all dem Trubel. Aber es het üs när trotzdem super gfalle. Das Comino isch halt eifach en super schöne Flecken uf üsere Erde. Mir si ga spaziere und hei di alte verlassene Gebäude agluegt, wo früecher als Quarantänespital und später als Schuel benutzt worde si. Und de heimer eifach d Sunne und Ussicht gnosse, hei di viele Eidechsli beobachtet und üs es ruehigs Picknick-Plätzli näbe usse gsuecht.

Uf der Rückfahrt heimer no zrüggdänkt a di schöne Stunde und hei chli vor üs ane döset. Aber äbä, das lange Hupe vom Buschauffeur het nüt guets ds bedüte ka. Üse Buschauffeur isch usgstiege, d Strass ufe glüfe und när zrügg cho. Zersch heter d Händ verworfe und när e Zigarette azündet. Vor üsem Bus het en andere Bus en Panne ka und so si mir imene enge Strässli gstrandet. Aber es het sich alles zum Glück als halb so schlimm usegstellt. Mir hei nur rund füf Minute zure andere Haltestell müesse loufe, wo gli en andere Bus zrügg nach Valletta cho. Zwar heimer när müesse stah, si aber rechtzytig zum Znacht und zfride zrügg uf Valletta cho.Læs mere