Keeping up with Ötzi (und Virginia)

Gester hani ds schöne Naturno verlah und bi hie uf Auer/Ora cho. Das ganze Italienische und Dütsche verwirrt mi hie leid. I wirde grundsätzlich afa uf Italienisch aagsproche, när weissi nid obsi kei Dütsch rede (cha ja si) und ner merkesi dasi (no) nid fliessend Italienisch cha und vor allem Spanish mit ihne rede, när wächsle si uf Englisch aber rede mitenand Dütsch und när weni o Dütsch rede si alli verwirrt. So isches hie im Südtirol.
Hüt hani mi uf archeologischi Entdeckig gmacht und dr Ötzi lehre kenne. Im Südtiroler Archäologiemuseum isch nämlich die eltischti natürlichi Mumie usgstellt, dr Ötzi, wo vor 5350-5100 Jahr gläbt het und laktoseintolerant isch gsi, Arthrose het ka, ganz dramatisch ufemne Gletscher erstoche und mitem Pfileboge erschosse isch worde UND när het die chlini Diva ono die ganzi Gschicht nöi gschriebe. Dr Ötzi het nämlich d Kupferzit ide Alpe 1000 Jahr zrügg gschobe will vorher hetme no nid so genau Ahnig ka wode Fähigkeite vode Neolithic Lüt. Dr Ötzi-Fund het ono chli Drama gstiftet zwüsche Italie und Österrich, will sisi äxtra ga d Gränze mässe zum luege i welem Land die Mumie jetz gfunde isch worde. 92,5 Meter uf Italo Gränze ischer gsi. E witere Bewiis dass Gränze nid sehr sinnvoll si will gloubs dr Ötzi het kei Ahnig ka dasser sich vo Italie uf Österrich über d Gränze bewegt und 1991 no chli Drama stiftet. Sehr spannend gsi und viel glehrt. Under anderem dass är o Bluetgruppe 0+ isch.

När bini witer vo Bolazano (Bozen) uf Soprabolzano, mitem 1901 Zügli hindere uf Renon (Ritten) - super schöni Ussicht aber bringe grundsätzlich dr Altersdurchschnitt um 30 Jahr abe. När bini wieder zrügg uf Bolzano und Auer. No churz gwäsche und bimne richtig Südtiroler Reschti ga ds Nacht ässe. Die heimi willi allei bi gsi grad ids Verliess ta, isch super gsi!

Morn geiz witer nomeh id Dolomite, Seiser Alm und Prager Wildsee 🏔️Read more