• Tablelands Tour

    November 3 in Australia ☀️ 28 °C

    Wasserfäll, Rägeward und en richtig coole Tag!

    Hüt isch en richtig fantastische Tag gsi! Am 7:30i hät de Wecker glütet, demit ich pünktlich am 8:15i für mini Uncle Brian’s Waterfall Tour parat gsi bi. Im Bus hämer e lustigi Truppe gha, fascht alli us England. D Stimmig isch vo Afang a super gsi, immer wieder Snacks, gueti Musig und vill z lache.

    De ersti Halt isch de Lake Eacham gsi. En wunderschöne See mitten im Regewald, wo vor tuusige vo Jahr us eme Vulkankrater entstande isch. S Bsundere dra: Er wird praktisch nur vom Räge gfüllt und hät kei Fluss, wo ine oder use fliesst. Perfekt für es gemütlichs Bad mal ohni Salz!

    Nachher hämer bimeme Fluss probiert, es Platypus z gseh. Die letschte Täg hets det immer wieder eis gha, aber hüt hät sich leider keis zeigt. Wär scho mega cool gsi, so eis mal i freier Wildnis z gseh.

    Defür isch de nächsti Halt umso spektakulärer gsi: de Curtain Fig Tree. En riesige, verwachsene Baum mit Wurzle, wo wie en Vorhang vom Baum abe hänged. Hät mich total a die gigantische Bäum us em Film Avatar erinnert!

    Nach eme feine Burger zum Zmittag ischs wiiter zu de Millaa Millaa Falls gange. En wunderschöne, hohe Wasserfall mitten im Grüene. Es paar Lüüt sind is Wasser, aber will de Guide selber nöd ine isch, hani denkt, ich lahs au lieber sii. Aso ufem Video gseht mr bini zwar so halbe ine. Und tatsächlich sind nachher es paar vo de andere vo Catfish bisse worde und händ sogar blüetet. Da hemer s Erste-Hilf-Set müesse go hole!

    S absolute Highlight isch aber am Schluss cho: Josephine Falls! Mehreri Wasserfäll hinderenand, glasklars Wasser und en natürliche Rutsche über glatti Felse. Mir sind grad mehri Mal abegschliffered. Eifach genial!

    Es isch en lange Tag mit vill Autofahrt gsi, aber trotzdem recht entspannt und genau s Richtige vor mim Tauchabenteuer. Unterwegs hani wiidr super Lüüt kenneglernt, und au im Hostel gits immer spannendi Gschichte und gueti Tipps vo anderi Reisende.

    Ich gnüsse mini Ziit da würklich mega. Und morn gahts endlich los mit em PADI-Tauchkurs! Ich cha’s chum erwarte, die Unterwasserwelt vom Great Barrier Reef z entdecke.
    Read more