• Flying into Brisbane

    November 14 in Australia ☁️ 27 °C

    Hüt isch wieder mal en längere Reisetag gsi. Am Morge hani mir no es Kafi a eim vo mine Lieblingsplätzli in Airlie Beach gönnt, bevors zrug is Hostel zum Packe gange isch.

    De Flughafetransfer hät dän grad mal für chli Abwechslig gsorgt. Zmitts uf em Weg hämmer plötzlich de Bus müesse wechsle, will öppis nöd funktioniert het. Zum Glück simmer trotzdem pünktlich acho!

    Am Flughafe hani denn fascht mis Sackmesser verlore, will ichs versehentlich im Handgepäck gha han. Di vom Security sind aber mega hilfsbereit gsi und hät mi nomal dur dSicherheitskontrolle zrugg lah. Mis Sackmesser isch denn tatsächlich i eme riesige Sack als separates Gepäckstück mitgfloge. So öppis hani au no nie erlebt!🤷‍♂️

    De Flug nach Brisbane isch denn problemlos verlaufe und au de Transfer is Hostel hät super klappt. Ich bi uf ere Strass mit unzählige Hostels glandet und han glücklicherweise wohl eis vo de schönere verwütscht.

    Am Namittag hani denn grad mal Brisbane erkundet. Was für e riisigi Stadt! Die Skyline mit de Hochhüüser direkt am Fluss isch unglaublich beeindruckend. Au d Autobahn direkt am Wasser isch speziell. Zum e Strass z überquere, hani teilwiis hunderti Meter Umweg müesse mache!

    Bsunders spannend isch au d Tierwelt zmitts i de Stadt. Riisigi Flughünd, wo über eim umenandflüged, und grossi Vögel, wo eim am liebschte grad s Esse wegneh würded.

    Am Abig bini no dur South Bank spaziert. Wunderschöni Park, mit viil asiatischi Touches, vill Lüüt und e richtig lebendigi Samstigabig-Stimmig. Brisbane hät definitiv en tolle erste Iidruck gmacht!

    Morn wartet scho s nächschte Abenteuer:

    - Früeh mit Zug und Fähre uf North Stradbroke Island
    - Quer über d Insel zur Tauchlodge
    - Hoffentlich bald mit Mantarochen tauche!
    - Am Abig möglichst no Australie gege Neuseeland im Rugby luege (Rugby League World Cup Final)
    Read more