Borneo & Philippinen | FindPenguins

Newest first

Trip start
November 2, 2025
Borneo & Philippinen
Singapur
November 3, 2025 in Singapore ⋅ ☁️ 29 °C
Unglaublich aber wahr🙈 vor 845 Täg hend mir üseri Weltreis in Singapur beendet. Somit en super Standort zum üserä Flittermonet 1.0 z starte. Wo mir üseri Weltreis 2.0 startet das staht nu i de Sternä. Was aber sicher nöd i de Sternä staht isch ases e zweiti git und as schu flissig drfür gspart wird. Mir chend fruäh am Morgä in Singapur a und mached üs ufe Weg zum Hotel. Mir werded schu z erstmal innert Sekunde pflotschnass, aber es isch ja zum Glück warm. Mir lünd üs natürli diä eint oder ander Köstlichkeit nöd entgu und bsuäched paar Ort womer schumal gsi sind. Unglaublich lebendig diä Stadt🤤Read more
See translation
TravelerWünsche eu zwei Liebä ganz erlebnisrichi und schöni Flitterholidays - gnüssets 🤩
11/7/25ReplyTranslate
TravelerDanke vielmal🥰
11/7/25ReplyTranslate
12 likes
Borneo & Philippinen
ab uf Borneo🦧
November 4, 2025 in Malaysia ⋅ ☁️ 29 °C
Üser nächste Stopp isch Borneo.
Borneo isch nach Gröndland und Neuginea diä drittgrössti Insle uf dr Welt. Sie isch ufteilt zwüsched drü Länder Indonesiä, Malaysia und Brunei.
Mir bsuäched dr malaysisch Teil, wo us zwei Bundestaate Sarawak und Sabah bestaht, wobi mir üs uf Sabah konzentrieret.
Nachemä kurze Flug landet mir in Kota Kinabalu und nend üsers Mietauto entgegä. Der ÖV da isch eigentli super und du chunsch guet vu A nach B, jedoch hemmer gfunde wieso nöd mal sones Land miteme Mietfahrzüg erkundä und mal luege we das so isch in Asiä😁. Mir sind sehr positiv überrascht, sie fahred sehr aständig, haltet sich ad Verkehrsreglä und d Strasse sind au grössteteils guet. Mir hend üs das viel chaotischer vorgestellt.
In Malaysia sind viel Muslimä oder Christä. Je nach Ort gseht me meh mit Kopftuech. Mir hend z Gfühl as d Frauä da viel z säge hend. Sie schaffed, fahred Auto und sind voll i der Gsellschaft integriert we bi üs, so wes söll si.
Borneo isch fruähner vollständig vu Urwald bedeckt gsi. Leider isch hüt nümme so viel drvu übrig. Es git es paar gschützti Nationalpark, aber sust bestaht der grösstiteil us Palmölplantagene. Malaysia und Indonesia sind diä grösst Palmöl Produzentä und decked 85% vum ganze Bedarf ab. Sie hend gfunde das wunderschöne Borneo mit em ältistä und arterichstä Urwald säg en guete Ort☹️. Dr Urwald isch gnadelos abgholzt wordä. Zum Glück gits gschützi Ort wo diä wunderschüne Tier doch nu es Dihei hend.
Mir sind doch recht verschrocke, we riesig die Plantagene sind. Stundelang reiht sich ei Palme a diä nächst.
Defintiv nu besser druf achte wo Palmöl überall dinä isch. Leider so zägä überall. Mir hoffed fest as diä Nationalpärks, wos nu git, für immer gschützt blibed!!!Read more
See translation
9 likes
Borneo & Philippinen
Kinabatangan River #1
November 6, 2025 in Malaysia ⋅ ☁️ 32 °C
Einä vu de letschtä Primärwälder in Borneo lieht im Danum Valley Nationalpark. E Bsuech det wäri eigentli üserä Wunsch gsi, jedoch gits det nur eis Hotel (was au guet so isch), wo nöd würgli bezahlbar isch für Normalos. Also sueched mir üs en Plan B. Mir entscheidet üs fürä Kinabatangan Nationalpark (Sekundärwald) . Er lieht direkt am zweit längste Fluss vu Borneo. Mir hend det es wunderschüs Hotel gfunde, wo diversi Toure und Usflüg abütet. Das isch das einzig Hotel, wo mir vorbueched hend. dr Rest lueged mir, we meistens, sponti😁. Mir verbringed Täg mit guetem Essä, chille, immer wieder durä Dschungel wanderä oder uferä Flusssafari. Sehr sehr arterich. Itauche i diä schü Natur tuet guet und mir sind froh gits nu so Ort. 🥰

E Primärwald isch en Wald, wo vu menschlichä Igriff witgehenst unberuährt blibä isch und sich über ä längerä Zitrum uf natürlichi Wiis entwicklet het. Biodiversität isch einzigartig. Sekundärwälder sind Wälder, wo sich nach der Zerstörig (Brand, Abholzig oder Naturkatastrophä) wiederentwicklet hend. Diä biologisch Vielfalt isch meist gringer.Read more
See translation
11 likes
Borneo & Philippinen
Kinabatangan River #2
November 8, 2025 in Malaysia ⋅ ☁️ 33 °C
üserä erstä Orang-Utan 🦧🤩😍 und ganz viel anderi wunderschüni Tier.
See translation
TravelerMega kuhl sonen Orang Utan 🤩.
11/10/25ReplyTranslate
TravelerJa hammer😍
11/10/25Reply
TravelerFür was hend ächt diä Vögel es Horn ufem Chopf🤔?
11/10/25ReplyTranslate
TravelerKeine ahnung😅
11/10/25ReplyTranslate
13 likes
Borneo & Philippinen
2
Sepilok Nationalpark
November 9, 2025 in Malaysia ⋅ ☁️ 32 °C
Mir mached nu en Abstecher in Sepilok Nationalpark.
Dr Nationalpark isch bekannt für sini Uffangstation für Orang Utans. D Uffangstation kümmered sich um Orang Utans, wo verletzt oder verweist sind oder ihrä Lebensrum ufgrund de Palmölindustrie verlorä hend. Si werden ufpäppled mit möglichst wenig Menschekontak, so dass si wieder chend usgwilderet werde. Der Park isch riesig, nur e chlinä Teil chan bewanderet werde. Es freut üs hets sone Irichtig, wo sich um Tier kümmered. Im Park lebed natürli nu ganz viel anderi Tier. Es het nu e zweiti Uffangstation gad nebed dra für Sunnäbäre. Au diä kümmered sich um verletzt, verweisti oder in Gfangeschaft ghalteni Bäre. Au da isch Ziel, dass wänn möglich, wieder ider Wildnis chend usgsetzt werde. Üsers Hotel lieht gad bim Igang vum Park. Mir gsehnd ganz viel Tier schu bim Hotel uf de Bäum umäturnä. Nachem Icheckä köhred mir es raschle uf dr Palme und tatsächli höckled e Orang Utan mit Baby det obe🤩 Au im Park hemmer numal tolli Erlebnis mit ihne. Binerä Nachtwanderig dure Park gsemmer entli e grossi Schlange🐍🐍 Und au sust numal wunderschöni Tier. Mir hend glernt, dass uf Borneo fast alles chan überä Urwald gleitä über Eidechsli bis zu Eichhöräli. Am nächste Tag gümmer numal am Tag in Park und suged das ganze zirppä und raschlä uf. Natur isch eifach faszinierend. 🥰🤗Read more
See translation
TravelerToll eui usfüehrige zur reis, witer so, isch spannend! Hebet sorg und glg
11/12/25ReplyTranslate
TravelerDanke vielmal Vreni🤗 liäbs gruässli id Schwiiz
11/12/25ReplyTranslate
Traveler Mir gsehnd en Elefant
11/12/25ReplyTranslate
Travelerjaa, das hemmer au gseh🐘
11/12/25ReplyTranslate
13 likes
Borneo & Philippinen
1
Mount Kinabalu⛰️
November 11, 2025 in Malaysia ⋅ ☁️ 22 °C
Mir fahred wieder richtig Nordä. Üserä nächst Stopp isch dr Mount Kinabalu.
Er isch dr grössti Berg in Malaysia 4095 m höch. Er isch au en Nationalpark miterä einzigartigä Flora und Fauna. Z Klima isch ganz anderst als im Dschungel, es isch frisch und mir mönd sogar diä lange Kleider aleggä. Üsers Zimmer het nöd würgli richtigi Fenster so wirds ider Nacht chalt und fuächt🤣
Der Mount Kinabalu Nationalprak ghört zum UNESCO Weltkulturerbe.
Er beheimatet tusige vu Pflanzeart, unteranderem Orchidee und fleischfressendi Kannepflanze.
In Malaysia git grundsätzlich zwei Jahresziit Regezit und nöd Regezit. Mir sind gad am Afang vu dr Regeziit, somit gümmer öppe in Herbst inä und nümmä alles bluäht. Mir hend paar fleischfressendi Pflanzenä gseh, jedoch verwelkt.
Im Nationalpark gits au diä grössti Bluemä uf dr Welt d Riesenrafflesie.
Si blueht eimal im Jahr für 5-7 Täg. Dr Durchmesser chan bis 1 Meter si. Es git si nur uf Borneo. Schmöcke tuet si anschiinend nöd sehr fein, sondern nach verwestem Fleisch wo Flüge zur Bestäubig alockt. Gseh hemmer si leider nöd.
Me chan im Park dr Gipfel erklimme, wo 2-3 Täg gaht. Es git aber au paar chlineri Wanderig. Mir entscheided üs für diä Variante. Uf de Wanderigä gsehnd mir viel vu dr Vegetation und hend numal diä eint oder ander Begegnig mit dr Tierwelt. Es git ganz viel Schmetterling, Vögel und Affe im Park. Vum Gipfel gsehnd mir nur ganz wenig. Es isch diä ganz Ziit recht neblig.Read more
See translation
TravelerGell, nemed denn keis Büsi in Rucksack mit 🤣
11/14/25ReplyTranslate
Travelerhhahahaha chan für nüt garantierä🤣🤣🐱🐈
11/14/25ReplyTranslate
Traveler 😂
11/18/25Reply
14 likes
Borneo & Philippinen
Inselhopping🌴🌺
November 12, 2025 in Malaysia ⋅ ☁️ 29 °C
Mir reised zrugg nach Kota Kinabalu. Üserä Startpunkt vu dr Borneo Rundreis.
Kota Kinabalu isch d Hauptstadt vu Sabah.
Nach al derä Natur und Rueh isch d Stadt fast chli z viel. Daher sueched mir numal chli Rueh😬
Es git 5 vorglagereti Inslä, wo bekannt sind zum Bade, Schnorchlä und für schüni Stränd. Me chan natürli alli gu bsuech. Mir entscheided üs für zwei chlineri Mamutik und Sapi🌴. Alli inslä sind Teil vumnä Nationalpark. Am Hafe chame es Ticket chaufe und de mitemä chlinä Böötli diä Inselä afahre wome wet.
Diä Rueh het definitiv guet tue.Read more
See translation
13 likes
Borneo & Philippinen
Kota Kinabalu
November 13, 2025 in Malaysia ⋅ 🌧 28 °C
Kota Kinabalu wird vu de Iheimischä nur KK gnännt. Nacherä chlinä Usziit stürzed mir üs is Lebe vu Kota Kinabalu. Es isch sehr gegesätzlich. Es git vieli moderni Ikaufzenträ und Hochhüser, aber hinder denä gits Dörfer, wo diä Arme lebed.
I de Ichaufszenträ git alles was dies Herz begehrt. Jedoch au türi Läde und eb da diä Iheimischä z Geld hend zum Poschnä bezwiefled mir.
Es git nu en riesigä Nightmarket wo alles mögliche abotä wird und me mega günstig chan essä. Uf jedefall es Erlebnis.
D Lüt sind nöd ufdringlich und sehr fründlich. Z Englisch isch jedoch sehr begrenzt. Üs persönlich hend diä chlinerä Ort besser gfalle, womer meistens diä einzige Touristä gsi sind. Mir sind immer fründlich aglächlet wordä, aber natürli au chli agstarrt. Mir hend zwar nur en chlinä Teil vu Borneo gseh aber uf jedefall het Borneo en Platz i üserem Herz🦧Read more
See translation
11 likes
Borneo & Philippinen
2
Brunei🕌
November 15, 2025 in Brunei ⋅ 🌧 30 °C
Bevors für üs witer uf d Philippinä gu Tauchä gaht, nemmer nu eis Land me mit.
Uf Borneo gits drü Länder Indonesiä, Malaysia und Brunei. Brunei isch es Sultanat. Z Sultanat isch e Art Monarchie, wo diä öbersti Herrschaftsgwalt bim Sultan lieht. Das bedütet, dass er diä obersti Macht het und sozägä alles ällei entscheide chan. 😳Es git kei Wahlä. Brunei isch eis vu de riichstä Länder und het kei Staatsschulde. Rich sinds dank Öl wordä. Alli Iwohner (ca. 460'000) vu Brunei mönd kei Stürä zahle.
Brunei bestaht us 70% Regewald, wo gschützt isch. Si leged viel Wert uf Natur. Leider hemmer z wenig Ziit nu en Nationalpark mit zni, aber findets super isch alles gschützt und Palmöl fri🤩
Dr Sultan isch eine vu de richstä Mensche und besitzt dr grössti Wohnpalast vu dr ganze Welt. 1788 Zimmer, 257 Badezimmer und Platz für 5'000 Lüt. Wahnsinn😳
Mir mached binerä Gratistour vum Hotel us en Stopp am Igangstor. Gseh tuet me aber nüt.
Brunei isch sehr sehr muslimisch alli Frau hend Kofptuecher a. es git e riesigs Museum wo hunderti vu verschiednä Koran usgstellt werded.
D Lüt sind alli super fründlich und chend sehr guet Englisch. Jedoch sind nöd würgli alli rich. Es isch en chlinä Teil und der Rest naja. Verteilig isch nöd ganz korrekt. Diä meiste Lüt lebed i Stelzehüser ufem Wasser. Si sind stolz druf, aber für üs gsehts eher us we es Armäviertel. Es het alles det Polizi, Fürwehr, Schuel etc. Es isch e Sehendwürdigkeit. Sehr spannend z gseh we d Lüt lebed.
Dr Sultan kontrolliert alles jede Nachrichtädienst, Schuelmaterial, etc. was zeigt und usgstrahlt wird. Keine dörf öppis böses säge über ihn. Sit 2014 hends Todestraf dur Steinigung wieder ifguährt. Alkohol gits kei zum chaufe im Land. Interessants Land, aber isch üs au nöd ganz ghühr überä chu, bi nur eim Chef, wo alles mache chan was er will. So söttis i dr hüttigä Ziit nümmä si. Si wend recht weltoffä überä chu, sinds aber nöd würgli...Read more
See translation
Traveler Sinds luut gsi?
11/19/25ReplyTranslate
TravelerGaht no da hemmr sho lüüteri affe troffe😅
11/19/25ReplyTranslate
TravelerSpannend das Land, de Sultan het jo gad echli vill ztuä...
11/19/25ReplyTranslate
Travelerja, langwilig wird ihm sicher nöd. 🤣
11/19/25ReplyTranslate
12 likes
Borneo & Philippinen
Malapascua 🦀🌴
November 19, 2025 on the Philippines ⋅ ☁️ 30 °C
Nacheme eher churzä, aber nöd würgli ruhigä Flug landet mir in Cebu. Fürs üs gahts ez nu 3.5 Stund mitem Auto in Norde und de nu e halbstund mit der Fähre bis uf Malapascua. Üsers Dihei für diä nächst Woche, womer üs ganz dr Unterwasserwelt widmed. Cebu City also z Zentrum isch vor ca. 2 Wuche vumnä Taifun troffe wordä. Me gseht mit durä fahre nu d Uswürkigä. Überall hets zerstörti Hüser, umkehrti Autos und Lastwage, Schlamm uf de Strasse etc. D Ufrumarbete hend aber schu gstartet. Leider sind natürli diä ärmstä wieder am Meisten troffe wordä. Bi Malapascua isch dr Taifun nöd durä und alles isch zum Glück nu ganz. Mir hend e wunderschüs Hotel direkt am Meer🤩
Diä erste zwei Täg mached mir z nächst höherä Brevet bim Tauche. Dr Advanced Open Water womer ez bis 30 Meter tüf tauche chend. 💪Es isch streng und drü Tauchgäng pro Tag sind de doch chli viel vorallem wänn dr Tag am 5 startet. Eimal mached mir nu en Nachtaugang und im erste Moment bini nöd so ganz drvu überzoge im dunklä miterä Taschelampe gu tauche, aber es leiht sich schnell da ider Nacht ganz viel anderi Tier gsehsch😍
Dr Spass chunt nöd z churz und schu am zweite Tag tauched mir mit de wunderschöne Fuchshaie. Es sind sicher 10 Stuck eifach spektakulär. Mit ihrer riesigä Schwanzflosse gsehnds absolut elegant us. Dank dere chend si au mehreri Meter usem Wasser gumpe. Mir gsehnd zweimal einä usegumpä eifach cool.
D Fuchshai lebed eigentli ganz tüf im Wasser unde, aber da chends jede Morgä ufä und lünd sich putzä🤩
Au am dritte Tag hemmer numal tolli Begegnigä mit de Haie und ander tollä Tier.
Am Schluss bsueched mir nu e chlini Insel wo eifach paradisisch isch.
Z Motto isch: Eat. Sleep. Dive. Repeat.🤩Read more
See translation
TravelerBests Motto ☝️😎 so muess das sii 😂
11/22/25ReplyTranslate
Travelerhahahaha, aber au strengs Motto😍😁🤣
11/22/25ReplyTranslate
TravelerD reis startet erst etz, etz sinder tauchverruckt 😎😅
11/22/25ReplyTranslate
Travelernonoo git au gnueg a Land zum entdeckä😍
11/22/25ReplyTranslate
2 more comments
12 likes
Borneo & Philippinen
Malapascua #2 🪸🐚
November 23, 2025 on the Philippines ⋅ ⛅ 28 °C
Am Dunnstig mached mir mal e Pause vum Tauche. Mir schlafed us, gnüsseds z Morgä im Hotel, gönned üs e Massage und erkundet chlei d Umgebig. Am Fritig stünd schu diä letschtä Tauchgäng a. Mir gsehnd numal ganz viel tolli Sache, aber nur schu Koralle selber sind es Highlight für sich. Jedi Lüchtet inerä anderä Farb und z Korallemeer isch endlos. Wooow, so schüni Koralle hemmer nu niä gsi und alles isch nu intackt und nöd kaputt💪 Bi jedem Tauchgang zeigt sich es farbigs Korallemeer. 🪸🐚
Mir widmed üs nu de chlinä Meeresbewohner de Nudibranch e Art Meeresschneckä. Sie sind farbig aber sehr schwer z finde.
Am Samstig üserem letschtä vollä Tag mieted mir nu en Roller und fahred d Insle ab. D Insle isch so chli, dass mir in öppe 10 Minutä schu am nördlichstä Punkt achu sind. Leider zeigt sich da au schnell as det wos kei oder fast kei Hotels het nöd würgli ufd Natur glueget wird und alles volle Abfall isch. Sehr schade. Interessant isch es trotzdem gsi. Am Schluss gümmer nu gu schnorchlä und findet e Ort wos ganz viel chlini Babyhaie Schwarzspitz Riffhaie het.
Am Sunntig heissts Abschied ni und witerreise uf Bohol e witeri Inslä. Z Erst mömmer alles zrugg fahre und de an Hafe in Cebu.
D Philippinä het me als 7000 Inslä😬Read more
See translation
12 likes
Borneo & Philippinen
2
Bohol #1
November 25, 2025 on the Philippines ⋅ ☁️ 27 °C
Mit dr Fähre gahts uf diä nächst Insle.
Bohol isch viel grösser und es isch definitiv au viel me los. Gad e chli e Umstellig nach derä Wuchä im Paradies.
Mir mieted e Roller und wännd am nächste Tag eigentli gad d Insle erkundä, aber z Wetter macht üs e Strich dur d Rechnig. Es regnet ganz fest und das eigentli nur eimal. So machts ufem Roller definitiv kei Spass und es blibt üs nüt anders übrig als z Hotelzimmer gnüsse.
Am nächste Tag zeigt sich z Wetter de zum Glück wieder vu sinerä guetä Sitä. Mir mached üs ufä weg zu de Koboldmakis. Das sind chlini, nachtaktivi Baumbewohner wo früähner als Halbaffä bezeichnet worde sind ez aber nümme.
Si hend riesigi Augä, wos aber nöd bewege chend aber drfür e sehr beweglichä Hals (we Ülä). Si hend sehr langi Hinterbei, wos wit gumpä chend.
Si sind winzig und maximal 9-16 Zentimenter gross.
Witergahts dur verschiedeni Dörfli zu de Chocolat Hills. Das sind mind. 1300 Hügeli wo vor Millionä vor Jahre entstande sind.
Mir hend eigentli nu e witeri chlini Inslä wellä bsuechä, aber alli Färtickets sind schu usbuäched. So entscheided mir üs nu chlei me vu Bohol gu aluegä und reised witer is Inland.Read more
See translation
Traveler Das isch denn herzig - hani no nie gseh 🥰
11/28/25ReplyTranslate
Travelerja, sind mega herzig und so chli😍😍 sind au sehr seltä. 🤩
11/28/25ReplyTranslate
9 likes
Borneo & Philippinen
Bohol #2
November 29, 2025 on the Philippines ⋅ ☁️ 27 °C
Im Inland mieted mir numal e Roller. Mir findet schüni Wasserfäll und unzähligi Riisfelder.
Üser Hotel lieht direkt am Meer mit eigetem Husriff. Bim schnorchled gsehnd mir numal wunderschüni Koralle. Für üserä letschti Stopp hemmer üs numal e schüs Hotel direkt am Strand usgsuecht. Mir gnüssed diä letschtä Stunde mit Bade und Cocktails 🤗. D Philippiner sind sehr nett und offä. Überraschenderwis chend viel sehr guet Englisch.
Philippinisch selber het viel Iflüss vu spanisch. Es isch mal e spanischi Kolonie gsi. D Armuet isch aber leider vielnä Ort spürbar.
Und da isch er schu durä üserä 1. Flittermonet, wahnsinn. Ez freued mir üs ufd Skipistä und ganz bsunders uf üserä Lufi🐈🩵Read more
See translation
8 likes

Trip end
November 30, 2025