Harald auf der Reeperbahn

Punkt 19:00 hei mir üs de aui zäme wieder ir Nechi vor Reeperbahn troffe, gnau gno bim Tattoostudio „endless pain“ (was fürne vertrouenswürdige Name). Vier vo üsem Grüppli hei nämlech am Vortag ä Termin abgmacht, zum äs gmeinsams Tattoo z’mache. Ungefähr 1h und chli (aber zum glück nid ändlose) Schmärze speter simer umnes chlises Dino-Tattoo am Fuess riicher gsi. Dä Dino het natürlech no ä Name brucht und mir heine us diverse Gründ „Harald“ touft. 🦕

Nachem tattowiere heimer äs Restaurant gsuecht und wo dr bevorzugt Taco Lade aber vou isch gsi heimer scho dänkt mir müesse üs miteme Reeperbahn-Döner oder Reeperbahn-Burger vomne schmuddelige Imbiss zfride gäh. Mir hei aber när meh oder weniger per Zuefau äs super vitnamesischs Resti gfunge und fein Znacht gässe. 🍛

Nachdäm simer nochli dürt Reeperbahn gschlendert und hei aui die kurlige Gstaute beobachtet und däm bunte Tribe chli zuegluegt und ire (aständige) Bar dr Aabe lah usklinge. 🍻

Mir hei üs de entschlosse am Morge chli früecher ufzstah für ufe Fischmarkt z‘gah, statt t‘Nacht düre z‘mache und direkt z‘gah. 🐟

KellyRead more