Knüttlet düre

Hüt am Morge umdie 7:30 (1:30 ir schwiz) bini in Ho Chi Minh City glandet. Obwou der Flug sehr ruhig isch gsi und ig chli ha chönne schlafe bini komplett ufde Fäuge gsi. D Hitz (33°C) het der Start nid gad eifacher gmacht.
Nachemne Kafi bini vom Flughafe mit öV id Stadt, was chli es Abentür isch gsi wöu Hautesteue me Hautevorschleg si u der Chauffeur nid ahautet wede wosch usstige sondern nume abebrämset u d Türe uftuet u när muesch haut luege wiede usechunsch. Aber es het ömu klappet u für 5000 Dong (18 Rappe) pro Fahrt chame o nid motze.
Ir Stadt hanimir när e Parkbank gsuecht u bi afamau chli häregläge u ha i mim Reisefüerer umebletteret. Wosmir z heiss isch worde bini ir Book Street ines Kafi ghocket woni der Van ha troffe. Är isch e 22 järige Vietnames wo z Australie het studiert. Churzerhand heter beschlosse mir d Stadt us sire Sicht z zeige drum heimirnis am Abe verabredet für am Saigon River öppis ga z trinke. Vorhär bini no i mis Hostel chli ga Schlaf nachehole.
Miteme Grab (Vespataxi) bini när zu däm "Cafe" wo mee e Houztisch mit es paar Getränk u Plastigchinderstüeli zum härehocke isch gsi u ha dert öppis fritierts gesse u öppis süesses trunke. I weis nid genau wases isch gsi aber der Van het mir das empfole u da ig wit u breit die einzigi Touristin bi gsi u är der einzig wo Englisch het chönne ischmir o nid viu anders übrigblibe aus ihm z gloube. Es isch ganz okey gsi u öbs mi Mage o okey findet fingeni de öppe morn use.
Izze bini (immerno oder wider knüttlet) im Hostel u bi gspannt uf morn. Der Van wotmir nome vo Ho Chi Minh zeige u i fröiemi hani e private Local Guide...Les mer