Viu Huen u Emotione

Hüt am Morge am 10ni hanimi mitem Van troffe für bimene Zitat "Nice breskfastplace" ga z zmörgele. Zum Zmorge hez när e Nudusuppe mit auem u weni säge auem meine würklich AUEM wo z Huen härgit geh (Z brune würfuförmige isch Hüenerbluet). Aber i bi ja schliesslich nid hie fürnes Zmorgebuffet mit Rösti u Späck...ah und der Kafi trinkesi grundsätzlich immer mit Kondänzmiuch izz weisi o wiso dä ging so süess isch obwoui jedesmau explizit ohni Zucker bsteue.
Nachem Zmorge simir dürd Stadt gschländeret u under anderem bim historische Postgebeude verbi cho, bir Kathedrale Notre-Dame von Saigon (die wird gad renoviert) u bim Widervereinigungspalast. Der Van het am 2 abgmacht u nachdäm mir e wahnsinnig süesse "Tee" hei trunke heisich üsi Wäge trennt.
I bi witter izz Kriegsopfermuseeum. Das isch herti Chost gsi. I ha e Audioguide gno u bi fasch 3h im Museeum gsi. Das geit über 3 Stockwärch mit verschidene Rüm wo jewils öppis Anders thematisiert wird. Zum Bispiu Chriegsverbräche oder Agent Orange. Das isch es chemisches Mittu wo d USA im Chrieg het igsetzt. D Gwässer si zum Teil bis hüt versücht u Ching chöme ono 4 Generatione speter mit Fäubiudige ufd Wäut. Vorauem d Biuder si ungloublech idrücklich. Nachem Museeum bini chli erschlage zrügg izz Hostel u vo dert us när ga Znacht esse. Bim Znacht hani e Gruppe dütschi troffe. Mit dene bini no chli witerzoge u mir hei e lustige Abe gha. Ide touristische Partystrasse louft hie immer sehr viu egau was fürne Wuchetag das isch.Leggi altro