Jin for the Win

Hüt isches früeh losgange..am 4:50 heimir (ig u zwöi Französinne) müesse bim Träffpunkt si füre Cai Rang, der grösst schwümmend Markt vo Vietnam ga azluege. Z 5. simir när ufemne chline Böötli dürz Delta tuketlet u nach ca. 30min dert acho. Dä Markt isch quasi d Prodega vor Stadt. D Verchöifer u Restaurantbetriber fahre säuber mit Boot use u gö ga Waar choufe für ire Betrib. D Verchöifer vom Markt hei immer e länge Bambusstäke ufgsteut ufem Boot u z oberst hänkesi das dra wosi verchoufe. So chame im Gwusel vode vile Boot chli der Überblick bhaute.
Mir hei ufem Markt zmörgelet u si när witter ine Früchtegarte.
Dert wird vor Banane über Jackfrücht bis zu Ananas und Konosnus aues apflanzt. Mir hei es paar dörfe probiere und i ha würcklich nonie sone süessi Mango gässe wie dert. Der Garte isch wunder schön gsi u seehr ruhig.
Nachem Garte simir witer ine Showproduktion für Riisnudle dert heimir Schritt für Schritt gsee wie usder Riisblüete e Teig gmacht wird, us däm wärde, wie mir Crepes mache, grossi Fläde gmacht. Die Fläde wärde tröchnet u speter zu Nüdeli gschnitte.
Mitem Böötli isches när wider zrügg id Stadt gange. Dert heimir no e chinesischi Pagode und eini vode Khmer (Kambodscha) gsee. D Jin üse Guide hetnis ufder ganze Tour sehr viu chönne verzeue. Zum Bispiu übere chinesisch Gloube wo seit das ihres Geburtsjahr (1998 Tiger) für Froue es schlächts isch usi drum scho Jobabsage het übercho oder das d Vietnamese Ouge uf iri Boot male wöusi gloube, dass die de Krokodil ide Flüss Angst mache, usi so sicher si im Boot.
Nach däm spannende Usflug simir nomau zrügg izz Hostel ga härelige u när bini mitder Jin ga Zmittag esse. Z Gliche wini Gester ha gesse (bun dau mam tom = Reisnudeln, Tofu, Shrimppaste) das isch ihres Lieblingsesse. Si hetmir erklärt dasi Gester d Touri-Version mit Fishsauce ha gesse. Traditionell isstmes mit Shrimppaste auso hanis eso probiert u i mues sege i verstah guet dases nid Jedermannssache isch. Die het uuuungloublich gfischelet..
Nachdäm z Gwitter isch dürezoge hezimir när no iri Lieblingsmasseurin vorgsteut. Dert hani e 2-stündigi Massage fürne knappe Füfliber gnosse. Bevori mitem Bus i die nächsti Stadt bi gfahre u wöui äuä chli verlore a däm Busbahnhof usserhaub vo Rach Gia bi gstande hetmi der eint Buschauffeur mitgno, id Stadt bracht umir no gad ghoufe es Ticket fürd Fähri für Morn z choufe, wassich glohnt het, so isches tou günstiger cho aus wenis im Internet hätti kouft.
Nach däm länge Tag bini ca. am 11i zimmlich knüttlet i mim Hostel izz Bett plumpset.Read more