Hotelchlötz

Widermau e Rägetag. Aber es isch nid schlimm i ha usgschlafe u när es supper Plätzli zum Brunche gfunde. Nachem Brunch bini no churz dürd Läde vo Hoi An u när hanimi mitem Pierre zeme ufe Wäg nach Da Nang gmacht. Leider giz keni Buse u aui wo hei wöue es Taxi teile hei churzfristig abgseit drum ischnis günstiger cho zwöi Rollertaxi z näh. Z Wätter het ganz okey usgsee bismir si losgfahre u när hez die 40minütigi Fahrt düregschiffet...mit 2 Ruckseck ufem Roller hingerdruffe. Aber mir si beidi guet acho u d Rägeschütz hei o e guete Job gmacht. Nachem Ichecke im Hotel simir dürd Stadt gschlenderet, hei die berüemti Drachebrügg gsee u si imene sehr iheimische Restaurant glandet fürz Znacht. Aber es isch widermau wahnsinnig guet gsi.
Eigentlich hani in Da Nang der Van, woni z Ho Chi Minh City ha glehrt kenne, wider wöue träffe. Är wohnt hie ir Stadt. Är hetmir aber leider churzfristig müesse absege wöuer chrank isch. Drum erkundemir d Stadt izz uf eigeti Fusst.
Da Nang isch eini vode grösste u sich am schnäuste entwickelnde Stedt vo Vietnam. Es het ungloublich viu Bousteue. Die meiste für riisigi Hotelchlötz.
Nachem Znacht simir zrügg iz üses Hotel u hei no e Nachtschwumm im Rooftoppool vom Hotel gno.Read more