Kagoshima: shinkansen, shōchū & beach

Mir hei üs vorgno ir erste wuche kyushu - die südlechi vo de 4 houptinsle z bereise. Vo Fukoka - d houptstadt vo kyushu - geits witer zur südlechste grossstadt vo kyushu : kagoshima.
Äs ersts mau stö mir auso i (brav is reieli) für i eine vo de bekannte shinkansenwäge. Mit bis zu 320km/h blochä mir drvo u si scho nach einehaub stund in kagoshima. Esse u trinke im ÖV isch in Japan verpönt, im shinkansen aber zeut das nid, dert schlö si zue, ganz viu fisch, bier, bubbletea und sogar rotwi usm tetrapack heimer gseh, kampai!
Da mir im zug nid gross gfuetteret hei, si mr nachm ickecke im hotel de o gad uf d suechi. Einisch meh hei d outore vom lonely planet nid z viu vrsproche mit „besitzerin reina-san ist ein wahres energiebündel“. Mir hei glück gha hetsi i ihrem minilokau zwöi schämeli frei gha und si so i gnuss vo dem spektaku cho. Yanaban heisst so viu wie „e witzige abä“ und dä heimer defintiv gha. Nachm klassische uhre-schoggi-schwizersmalltalk hetsi üs liebevoll z menu vorgsteut. D chuchi isch offe i rum wo öbe 20 plätz het. Bi de getränk isch säubstbedienig, si het freud gha wo mr di lokali spezialität - shōchū - gad us ersts hei wöue probiere. Imo-jōchū isch 25 vol% und vorauem us süesshärdöpfu hergstellt, trunke wirds entweder pur, mit iis oder no mit wasser. Damit mr nid gad sone pegu hei wie es paar angeri awäsendi hei mr de o gässe. Säubergmachte tofu, edamame u tempura isch aues ungloublech guet gsi u sicher eis vo de kulinarische highlights bis iz!
Am nächste morge heimer de wulche trotzt u si a strand. Dr wäg dert härä hei mr zersch chli müesse sueche aber dank googlemaps isch ds hie nid sone sach. Dert acho heimer zersch vom idrückleche vulkan vis-a-vis no gad nid viu gseh. Dr nisurägä hets o nid viu gmüetlecher gmacht u zuesätzlech drfür gsorgt das mr näbst zwöi windsurfer di einzige gsi si. Dr rägä het de zuegno u mir si bereits imne resti gsi ga ne öv-vrbindig sueche für zrügg, wo d sunne glich isch fürecho und üs wieder zrügg a strand glockt het. Dert simer de o einigi stund blibä und hei badet, gläse u schlaf nachegholt.
Am spätere nami heimer de dr bus zrügg gno u hei nachm dusche imne kaffi üsi witere plän für wuche 2 afa schmiede und üs när no feini nudle zum zNacht gönnt.Read more