Aoshima: Surfer, Tacos & Tatami

Nach Kagoshima simer witer richtig Aoshima. Für die Verbindig hets leider ke Shinkansen gha, defür heimer uf de eher länge Fahrt d’Landschaft chönne gniesse. In Aoshima acho heimer grad i üsere Unterkunft icheckt. Wüu hie eigetlech trotz 30 Grad ke Badesaison meh isch simer die einzige Gäst gsi i dere Unterkunft, es paar Spinne 🕷️ hei üs aber defür no Gsellschaft gleistet 😂 Nachem ichecke simer direkt richtig Strand, womer es richtig cools plätzli gfunde hei und de ganz Nami verbracht hei. Es het no ganz es chlises und härzigs Inseli gha, wo mitere brügg mitem Strand verbunde isch gsi. Am Abe simer de no de zahlriche Surfer*inne ga zueluege 🏄‍♂️ Wüu hie alles sehr im Hawaii-Style gstautet isch, hets o fasch nume Restis wo eher westlechs Ässe abiete. Mir si am Schluss imene sehr stylische und feine chline Beizli glandet wo vo Nachos, Tacos bis Spaghetti chli alles het gha.
Wieder zrugg i üsere Unterkunft heimer no üsi Bett parat gmacht. Mir hei z’erste mau imene Zimmer mit Tatami gschlafe. Das si typischi Japanischi Bett, wome am Abe ufbout und am morge wieder zemebout. Zersch leitme e dicki Matte a Bode (Futon), dert druf chunnt ner e eher dünni und faltbari Matratze und am Schluss chunnt no es lintuech druf. Tönt villech für üs Europäer speziell, isch aber sehr bequem und praktisch, weme nid viel Platz zur Verfüegig het ☺️ bevormer witer gö richtig Beppu simer nomau chli am Strand gsi und hei endlech e Udon-Suppe und chli Sushi gässe 😍Read more